پێدایش 26

گۆن اِساکا هُدائے اَهد و پئیمان

1چۆ بوت که آ سرڈگارا ڈُکّالے کَپت، اَبێد چه آ پێسری ڈُکّالا که اِبراهێمئے وهدا بوتگ‌اَت. اِساک، گِرارا شت، پیلِستیانی بادشاه اَبیمَلِکئے کِرّا. 2هُداوند، اِساکئے دێما زاهر بوت و گوَشتی: ”مِسرا مرئو. هما سرڈگارا بنند که من ترا گوَشان. 3انّون همے مُلکا دَرامَدێئے پئیما بنند. من گۆن تئو گۆن آن و ترا برکتَ دئیان. اے سجّهێن زمینان ترا و تئیی نَسل و پَدرێچارا دئیان و گۆن تئیی پت اِبراهێما وارتگێن سئوگندا برجمَ داران. 4من تئیی نَسل و پَدرێچا آسمانئے اِستارانی کِساسا بازَ کنان و اے سجّهێن زمینان آیانا دئیان و تئیی نَسل و پَدرێچئے سئوَبا زمینئے سجّهێن کئوم برکتَ گرنت، 5چێا که اِبراهێما منی پرمانبرداری کرت. آییا منی هبر زرت، منی رَهبند و پَرمان و منی هُکم و کانونی برجاه داشتنت.“ 6گڑا اِساک گِرارا نِشت.

اِساک و اَبیمَلِک

7وهدے اۆدئے مردێنان چه اِساکا آییئے لۆگیئے بارئوا جُست کرت، چه تُرسا نگوَشتی که منی لۆگی اِنت، گوَشتی: ”منی گُهار اِنت.“ آییا دلا هئیال کرتگ‌اَت چۆ مبیت که اِدئے مردێن منا بکُشنت و رِبِکّایا ببرنت که آ شَررَنگے.

8اِساک تان مزنێن مُدّتێا همۆدا نِشت. یکّ رۆچے پیلِستیانی بادشاه اَبیمَلِکا چه دریگا ڈنّ جَهلا چارت، دیستی که اِساک گۆن وتی جَن رِبِکّایا دَزجَنیا اِنت. 9اَبیمَلِکا اِساک لۆٹاێنت و گوَشت: ”اَچه اے تئیی جَن اِنت! تئو چێا گوَشتگ که ’منی گهار اِنت‘؟“ اِساکا پَسّئو دات: ”من وتی دلا گوَشت که آییئے سئوَبا یکّے منی جندا کُشیت.“ 10اَبیمَلِکا گوَشت: ”تئو چێا گۆن ما چُش کرت؟ اگن منی مردمے گۆن تئیی جَنا بوَپتێن، تئو گناهے مئے چَکّا دئور داتگ‌اَت.“ 11گڑا اَبیمَلِکا سجّهێن مردم هُکم داتنت: ”هرکَس که اے مرد و اِشیئے جَنا دستا هم پِر بکنت، آییا اَلّم مرکئے سِزا دئیگَ بیت.“

12اِساکا آ ڈگارئے سرا کِشت و کِشار کرت و آ سالا ڈگارا سَد سَری#26‏:12 سَد سَری، بزان سَد برابر، سَد رندا، سَد همینچُک. بَر و سَمر دات، چێا که هُداوندا اِساک برکت دات. 13اِساک سێر و هَزگار بوت و مال و هستی‌ای تان هما هَدّا گێش بئیان بوت که آ سکّێن مزنێن هستۆمندے جۆڑ بوت. 14اِساکا رمگ و گۆرُم و هِزمتکار اَنچۆ باز اَت که پیلِستی هَسَدّیگ بوتنت و 15آ سجّهێن چاتِش بار دات و هاکا پُرّ کرتنت که اِساکئے پت اِبراهێمئے هِزمتکاران، اِبراهێمئے زمانگا جتگ‌اَتنت.

16نون اَبیمَلِکا گۆن اِساکا گوَشت: ”چه مئے کِرّا برئو. تئو سکّ زۆرمند ائے و چه مئے هَدّا در ائے.“ 17گڑا اِساک چه اۆدا در آتک و گِرارئے دَرَگا وتی گِدانی مِکّ کرتنت و نِشت. 18اِساکا هما چات در رُپتنت که آییئے پت اِبراهێمئے زمانگا کۆچَگ بوتگ‌اَتنت و پیلِستیان، اِبراهێمئے مَرکا رند بار داتگ‌اَتنت. اِساکا اے چات هما نام پِر کرتنت که آییئے پتا بَستگ‌اَتنت.

19وهدے اِساکئے هِزمتکاران آ دَرَگئے تها زمین کۆتک، تچۆکێن آپئے چاتے دَرِش گێتک، 20بله گِرارئے شپانک گۆن اِساکئے شپانکان اَڑِتنت و گوَشتِش: ”اے آپ مئیگ اِنت.“ گڑا اِساکا اے چاتئے نام اِسِک#26‏:20 اِسِک، بزان اَڑ و کُڑ، جنگ و جێڑه. کرت، چێا که گِرارئے مردم گۆن آییا اَڑِتگ‌اَتنت. 21اِساکئے هِزمتکاران دگه چاتے جَت، بله اِشیئے سرا هم اَڑِتنت، گڑا آییا اے چاتئے نام سِتنَه#26‏:21 سِتنَه، بزان جنگ و جێڑه، پِتنَه و پَسات، هِلاپ بئیگ. کرت. 22اِساک چه اۆدا لڈِّت و شت. دگه چاتے جَتی. نون اِشیئے سرا کَسّا اَڑ و کُڑ نکرت. اِساکا چاتئے نام رَهوبوت#26‏:22 رَهوبوت، بزان پْراه و شاهِگانێن جاگه. کرت و گوَشتی: ”نون هُداوندا مارا پْراه و شاهِگانێن جاگهے داتگ و ما همے سرڈگارا سێر و آبادَ بێن.“

23اِساک چه اۆدا دێم په بێرشێبَها شت. 24هما شپا هُداوند آییئے دێما زاهر بوت و گوَشتی: ”من تئیی پت اِبراهێمئے هُدا آن. متُرس، چێا که من گۆن تئو گۆن آن. من وتی هِزمتکار اِبراهێمئے سئوَبا ترا برکتَ دئیان و تئیی نَسل و پَدرێچا گێشا گێشَ کنان.“ 25اِساکا اۆدا کُربانجاهے اَڈّ کرت و هُداوندئے نامی تئوار کرت. وتی گِدانی همۆدا مِکّ کرت و آییئے هِزمتکاران همۆدا چاتے جَت.

اِساک و اَبیمَلِکئے اَهد و پئیمان

26اَبیمَلِک چه گِرارا وتی سَلاهکار اَهوزَّه و وتی پئوجئے سَرلشکر پیکولئے همراهیا اِساکئے کرّا آتک. 27اِساکا چه آیان جُست کرت: ”شُما گۆن من دُژمنی کرت و منا چه وتی کِرّا گلّێنت. نون چێا منی کرّا آتکگێت؟“ 28آیان پَسّئو ترّێنت: ”ما شَرّیئے سرا دیستگ که هُداوند گۆن تئو گۆن اِنت، پمێشکا ما گوَشت که باید اِنت مئےشمئے نیاما کَسَم و سئوگندے ببیت. بیا اَهد و پئیمانے بندێن 29که تئو مارا آزارَ ندئیئے، اَنچۆ که ما ترا آزار نداتگ و گۆن تئو شَرّ بوتگێن و ترا په سلامتی و اێمنی چه وتی کِرّا رهادَگ کرتگ. نون ما گِندێن که ترا چه هُداوندئے نێمگا برکت رَستگ.“ 30گڑا اِساکا په آیان مِهمانیے کرت و آیان وارت و نۆشِت. 31دومی سُهبا ماهلّه پاد آتکنت و اِساک و اَبیمَلِکا گۆن یکدگرا سئوگند وارت. اِساکا مردم رهادگ کرتنت و آ، چه اِساکئے کِرّا په سلامتی و اێمنی شتنت.

32هما رۆچا اِساکئے هِزمتکار آتکنت و وتی جَتگێن چاتئے بارئوا هالِش دات. گوَشتِش: ”ما آپ در گێتکگ.“ 33اِساکا اے چاتئے نام شێبَه#26‏:33 شێبَه، بزان سئوگند یا هپت. کرت و تان رۆچِ مرۆچیگا آ شهرا بێرشێبَهَ#26‏:33 بێرشێبَه، بزان سئوگندئے چات یا هپتێنانی چات. گوَشنت.

ایسّوئے دو جَن

34وهدے ایسّوئے اُمر چِلّ سال بوت، گۆن هیتّی کَبیلهئے بِهیری نامێن مَردێئے جنکّ یودیت و هیتّی اێلۆنئے جنکّ بَسێمَتا سوری کرت. 35ایسّوئے اے جَنان، اِساک و رِبِکّائے زندگی اَزاب کرت.

Currently Selected:

پێدایش 26: HPKB

Highlight

Copy