Piiligu 14
14
Seema Abram n daa moligi Loti n ŋa
1-2Jemanso nadimseesi n daa n ya n tuusi taaba yi toowa niŋi.
Nadima banaasi yuya n ŋa: Babilon naaba Amafel, Elasa naaba Ariyok, Elam naaba Kedolaama, a ni Goyiim naaba Tidal. Nadima banu mi yuya n ŋa: Sodom naaba Bera, Gomora naaba Besa, Adima naaba Sinaaba, Zeboyiim naaba Semeba, a ni Bela naaba. O yuyinni n niŋi Zowa.
3-8Nadima banu maa daa n laŋsi taaba, ba wa ti zabi Sidim nantaŋŋu puwa, seela n niŋi yaarim teeku la. Yuma pii ni ayi puwa, ba daa n bani naaba Kadilaama suurisi niŋi. Yuma pii ni ata daana, ba zagsi maa ba n di n ba o suurisi niŋi. Yuma piini anaasi daana, Kedolaama ni nadima seesi n ba o saani la niŋi naŋgbanluŋko wa ti zabi n nyaŋŋi Rifam dima, a yi Asiteraf Kanayim, Zuzim dima, a yi Ham, Emim dima, a yi Kiriatam paaligu niŋi, Horiti dima, a yi Idom zoori zu, a kari ba lala wa ti paa El-Paran n niŋi tambisigu paaligu la torigu. Niŋi n na, ba pori nyaaŋa ta En-Misipa, Kadesi n na la. Ba nyaŋŋi Amaleki dima, a yi ba tiŋgbaŋŋu maa zaa niŋi, a nyaŋŋi Amori dima seesi n ba Hazazon Tama la.
Niŋi n na, nadima banu la niŋi naŋgbanluŋko, ba ni ba toowa zabiriba, wa ti laŋsi Sidim falimini niŋi, a leeli yaarim teeku la. Barima n niŋi Sodom, Gomora, Adima, Zeboyiim, a ni Bela (o yuyinni n niŋi Zowa) nadimaa ni ba toozabiriba niŋi siriya nisaaniŋi ba zabi nadima banaasi la 9seesi n niŋi, Elam, Goyiim, Babilon dima naaba ni Elasa, nadima banu ya n tuusi ba banaasi. 10Sidim falimini maa zaa daa niŋini kootaali boga, jemanso Sodom ni Gomora nadima n zora maa, niriba maa seesi li kootaali boga maa puusi, ka ba seesi zo n du zoori zu. 11Ka nadima banaasi maa ti kaasi Sodom ni Gomora dima bunso zaa nyem, haali ba bindira zaa. 12Ka ba gbaa Loti, Abram sunzo biya, a ni o bunso zaa nyem gaari. 13Daba yindaana, daa n chee n wa ti yeli Abram, Hiburu daba la, bunso zaa n niŋi. A jemani maa Abram daa n zinni leeli daba so ba n boona Mamiri, Amori daba, titintaasi see. Daba maa mabiisi n daa n niŋi Esikol ni Aneri, ba ni Abram daa n mari ni naŋgbanluŋko. 14Jemanso Abram n wumi maa ba gbaa o sunzo bii gaari, o laŋsi o laanta puu toozabiriba zaa, ba daa n ba niriba kobsita ni pii ni banii, o mari ba kari nadima banaasi maa bobiri, a wa ti paa ba Dan tiŋgbaŋŋu niŋi. 15Nisaaniŋi n na, o barigi niriba maa gbulagbula, yiiŋu, ba ŋme ba dindima maa niŋi, a nyaŋŋi ba. O kari ba lala haali, a wa ti paa Hooba, Damasika kiŋkagili sagbinni, 16ba va binseesi zaa ba n naa maa. Ka mari Loti ni o bunso zaa, a ni pogiba ni nivuseesi zaa ba n ma n gaari la pori n ta.
Seema Mekizade n nafa Abram n ŋa
17Jemanso Abram n daa n zabi n nyaŋŋi naaba Kedolaama ni o nataaba la, ka pori n ta Sodom naaba tuusi u falimini so ba n boona Sava la niŋi, ka ba boona u naaba falimini. 18Ka Mekizade, so n niŋi Salem naaba, ka na kpari n niŋi Duuma Naawunni nakarigu la sandaantumina, o mari paanusi ni daam ti ti Abram, 19a nafa u yeli, “Naawunni nakarigu la, so n maali saazu ni tiŋŋa la, o nafa Abram. 20Kpeesigu niŋini Naawunni nakarigu, so n ti e nyaŋŋi e dindima la toori.” Abram nyisi binseesi zaa o ma n yi toowa puu ta la bu piipii zu ti Mekizade.
21Sodom naaba yeli Abram, “Mari binseesi zaa e n ma n ta la, ka naa niriba la wune ti ma.” 22Abram yeli u, “M peya, nimbirimootiri, a yi Duuma nufu niŋi, so n niŋi Naawunni nakarigu saazu ni tiŋŋa zaa maana, 23a maa m ki naa bunso zaa n niŋi e toori, haali borabi koo sabitaa mii gba. E da ti yeli dindaso maa, mani n naa Abram loobi bindaana.” 24M ki naa sen zaa, ama binseesi m toozabiriba n di la ko. Ama, tori n ti seesi n paasi n niŋi la Aneri, Esikol, a ni Mamiri.
Currently Selected:
Piiligu 14: hag
Highlight
Share
Copy
Want to have your highlights saved across all your devices? Sign up or sign in
© 2015, Ghana Institute of Linguistics, Literacy and Bible Translation (GILBTT)
