Hechos 3
3
Qanataden so sa da'añiiguelo naua lchil
1Qaq huo'o so na'a'q nachi so Pedro qataq so Juan tayishiguema aso n'onaxanaxaqui late'edai co'ollaq mashi dashita aso nala', cha'ayi nachi laloxoqui da qai'ot da qouagaxaunaxac. 2Qaq huo'o so shiÿaxaua mayi nachi 'eetai'salo naua na'axa'te da hueta'a aso n'onaxanaxaqui. Somayi nachi chigoqteuo da sa da'añiiguelo naua lchil. Qaq somayi qaÿi'iguelaxattau'a so lasom mayi l'enaxat 'Onaxaic, da qoÿaataña, da yaqto' somayi ÿashilatac nam inoxootapegueuo. 3Qaq se'eso shiÿaxaua co'ollaq ila'aguet so Pedro qataq so Juan da taidau'a aso n'onaxanaxaqui, nachi ÿashilata'pe. 4Nachi so Pedro qataq so Juan ilotro'ot somayi. Nachi so Pedro 'enapego' somayi, 'eeta':
–Ña qomi' 'auamato'oto.
5Nachi se'eso shiÿaxaua huo'o da lqochoxo da ÿamataiguilo soomayi, cha'ayi ipi'itaxaatega da huo'o aca qoÿanem. 6Qalaxayi so Pedro 'enapego' somayi, 'eeta':
–Aÿim qaca aca aÿom plata, huo'otaq oro. Qalaxayi da aÿim hueto'ot 'am sanem, 'eeta': 'Am sedolec da l'enaxat so Jesucristo mayi Nazaret l'ec da 'am shinapega da qoñishiguem, nachi 'auqueuoÿapigui'.
7Nachi so Pedro ÿacona na lhuaq aloic somayi, nachi nachaalataxaañi. Huaña, nachi da'añiiguelo naua lchil qataq naua nqonacamo somayi. 8Nachi se'eso shiÿaxaua, somayi ÿataqta npadenaxaashiguem da nachajñi, nachi jec da queuoÿapigui'. Nachi lÿatreuo soomayi da tau'a aso n'onaxanaxaqui. Huaña, nachi queuotapigui', padenaxaatac qataq ÿi'oxodeetac ñi Dios. 9Nachi 'enauac na shiÿaxauapi ÿauaachigui somayi da queuotapigui' qataq ÿi'oxodeetac ñi Dios. 10Nachi 'enauac somayipi ÿataqta i'aalac qataq i'elaqchit de'eda qaÿauaachigui. Cha'ayi 'enauac da qaÿauatton se'eso shiÿaxaua qataq qaÿaÿaten da nachiso som dashilaxaatac naxa mayi nso'ootañi ca lasom aso n'onaxanaxaqui mayi l'enaxat 'Onaxaic.
Da l'aqtaxanaxac so Pedro co'ollaq hueta'a cam qaÿamata'ac nqasoxoc so Salomón
11Nachi se'eso shiÿaxaua mayi qanataden, somayi nachi sa ishit da iÿotreec soua Pedro qataq so Juan. Nachi 'enauac na shiÿaxauapi nqalgoqta'a ca huetra'a soomayi mayi l'enaxat nqasoxoc so Salomón, cha'ayi ÿataqta huo'o da l'aalaxa. 12Nachi so Pedro co'ollaq ila'a de'eda nqochoxo, nachi 'enapego' so shiÿaxauapi, 'eeta':
–Qami' Israel l'ecpi, ¿chaq tá'ainco' yi ÿapacteec da qadqochoqoi? ¿Tá'ainco' da qomi' qauloito'oto, chaqno' da huo'otaq nachiqomi' da maichi ñatadenaq de'eda shiÿaxaua, huo'otaq da maichi qad'añaxac huo'otaq ca qad'amqajnataxanaxac ñi Dios ca sedoxolec damayi da yaqto' iqueuoÿapigui'? 13Qalaxayi ñim nDios so hua'au qadta'a Abraham, qataq so Isaac, qataq so Jacob, ñimayi nachiñi ñi ÿanem da lta'adaic l'amaqchic so llalec Jesús, som qami' qai'añiu'a co'ollaxa na nta'alpi. Nachi so nta'a Pilato co'ollaq nshitaique da ÿaxaneec, qalaq qami' sa qauaÿamaxayiñi. 14Nachi qami' sa qauÿaxañiu'a da qaisouec so shiÿaxaua mayi qui'itta qataq no'on da lataxac; nda'a't da qami' qauÿaxañiu'a da qaisouec som laataxanaxaic. 15Qaq 'eda da 'eetec da qami' qaualauachi som chigoqo'ot da achaalataxac. Qalaxayi ñi Dios qaltaq nca'alaxateec somayi, qaq 'enauac de'eda qomi' sauanaqchigui. 16Qaq nachida dam l'enaxat se'eso Jesús, huo'otaq da qaipi'iÿa'a da l'enaxat somayi, dam chigoqchigui da l'añaxac de'eda shiÿaxaua mayi qauauañiichigui qataq qadauattonataqui. Qaq de'eda 'eetec da qaipi'iÿa'a so Jesús, nachida dam ÿataqta imauec da no'oita naq'en de'eda shiÿaxaua mayi 'enauac da qoñiita qauloito'ot.
17Qaq aÿim saÿaten, qami' ÿaqaÿa't, da co'ollaq qami' qataq nam qadataxala'aipi qaualauachi so Jesús, qalaq sa ishit da ÿoqta qauaÿajñiita dam qau'ochiitac. 18Qalaxayi de'eda naigui da ÿataqta ipacchiguilo naua 'ena'pe ñi Dios co'ollaq i'aqtaxanaxan so l'aqtaxanaxanecpi da 'eeta': “Que'eca samaq nta'a nca'alaxaqui, camayi ÿataqta huo'o qome da nque'ejnaxac.” 19Qaq ÿoqo'oyi qaualachi' qome naua qan'onataxacolli', nachi qavi'iguelaqÿa ñi Dios, yaqto' qaÿapalaxa't naua qadasouaxashi'chilli'. Nachi ñi qadataxala' Dios ishit da qami' ÿanema caua na'axa'te da qaulaquiitapiguiñi. 20Nachi qami' qanamaxalo so Jesús mayi nta'a qadca'alaxaqui, som nal'ena co'ollaxa da qaÿauotaique da qadca'alaxaquii. 21Qalaxayi so Jesucristo nagui iuen da ñaq neta'ague da piguem, to' qom ivita ca na'a'q da ñi Dios nadalaxat 'enauac na l'onatacpi, cha'ayi ñimayi nachida dam 'enapec co'ollaq i'aqtaxanaxan som hua'au l'aqtaxanaxanecpi mayi qui'itta. 22Cha'ayi nachida dam 'enapec so Moisés co'ollaq 'eetega som hua'au qadta'alpi, 'eeta': “Ñi Dios mayi qadataxala', ñimayi qami' namaxalo qome ca l'aqtaxanaxanec. Camayi maichi qadalamaxachi qadqaÿai. Camayi 'eeta'am qome aÿim da qami' qanamaxalo. Qaq ÿoqo'oyi camayi ÿataqta qaualaqailec qome cam 'enapec. 23Cha'ayi 'enauac qome nam sa ishit da ÿalaxalec camayi, nachi qanqateeguesop na llalaqpi so Israel, nachi qaÿalauat.”
24Cha'ayi 'enauac som hua'au n'aqtaxanaxanecpi, chigoqchiguiña so Samuel qataq anac so laÿipi, nachi 'enauac qai'axatta'agueta ne'enaua na'axa'te mayi souaqtaiguilo. 25Qaq de'eda ÿachaxanapec co'ollaxa ñi Dios da ÿan, mayi i'aqtaxanaxanec so l'aqtaxanaxanecpi, damayi qadalamaxachi. Qataq ñimayi i'ot da ÿauotaique qadaÿamqai co'ollaq naÿamaxate' som hua'au qadta'alpi, nachi 'enapega so Abraham, 'eeta': “'Enauac qome na ÿotta'a't shiÿaxauapi mayi huetalec ana 'alhua huo'o da nqouagaxa, ÿachigoxotchigui cam 'ai'alaqpi.” 26Qaq ÿoqo'oyi ñi Dios co'ollaq qaltaq nca'aleec naq'en so llalec Jesús, nachi i'auaxaachiguiñi da qami' namaxalo, da yaqto' qami' ÿanema ca no'on qoyiquiaxaqui, yaqto' ñi 'oonolec da qoñiita ishit da ÿaxaneec ca sa ÿaÿamaxañi.
Currently Selected:
Hechos 3: TBSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
