Juan 1

So l'enaxat l'aqtac ñi Dios, somayi ñigui na shiÿaxaua

1Co'ollaq chita'ague da qai'ot 'enauacna, qaq nal'ena da huo'o so l'enaxat l'aqtac ñi Dios. Qaq se'eso l'enaxat l'aqtac ñi Dios, somayi hueta'aguet ñi Dios, qaq somayi Dios. 2Qaq co'ollaq chita'aguena, qaq somayi nal'ena da hueta'aguet ñi Dios. 3Qaq ñi Dios co'ollaq i'ottacna, nachi ÿachigoxotchigui somayi 'enauac nam i'otpi. Qaq 'enauac nam huo'o qaica ca saq chigoqchigui somayi. 4Qaq somayi nachiso so chigoqchigui da nca'alaxa, qaq de'eda nca'alaxa nachida da yi'oqojlec naq'en na shiÿaxauapi. 5Qaq de'eda yi'oqchiguiñi, damayi icoÿadelec na napalaxa, qaq na napalaxa sa ishit da ÿalamat.

6Huo'o so shiÿaxaua mayi lamaxashic ñi Dios, somayi l'enaxat Juan. 7Qaq somayi anac, da yaqto' i'axat de'eda yi'oqchiguiñi, yaqto' 'enauac na shiÿaxauapi ishit da da'amqajnataxan, chigoqchigui da l'aqtaxanaxac somayi. 8Qaq so Juan sa ishit da nachiso som yi'oqchiguiñi, cha'ayi somayi qanamaq, da yaqto' i'axat de'eda yi'oqchiguiñi. 9Qaq som ÿoqta 'eesa da yi'oqchiguiñi mayi icoÿadelec 'enauac na shiÿaxauapi, somayi mashi nvittega ana 'alhua.

10Qaq se'eso l'enaxat l'aqtac ñi Dios, somayi hueta'a ana 'alhua. Qaq nai'ctaxa da ñi Dios ÿachigoxotchigui somayi co'ollaq i'ot ana 'alhua, qalaxayi nam huetalec ana 'alhua sa ishit da ÿauatton. 11Qaq somayi anaÿa na maichi lalamaxat lma', qalaxayi na maichi lalamaxat lauo' l'ecpi sa ishit da ÿaconguet. 12Qalaxayi ñaqaiyita huo'o na ÿaconguet qataq i'amaqten somayi, qaq nachina na ÿanem da ÿoqta 'itchiguiñi da llalaqpi ñi Dios. 13Qaq namayipi sa ishit da 'eeta'am da lañoxoc na llalaqpi na yi'oqchigui shiÿaxauapi. Mayi da ñiguiñi, qalaq chigoqchigui da lqopitaxanaqtaic, huo'otaq da lhuennataxac namayipi, cha'ayi namayipi ÿataqta llalaqpi ñi Dios.

14Qaq se'eso l'enaxat l'aqtac ñi Dios, somayi nañigui da lataxac na yi'oqchigui shiÿaxaua. Nachi somayi qomi' hueta'agueta, qalaq ÿataqta nlaqchigui da lauotaxanaqtaic qataq dam 'eesa lataxac. Qaq qomi' sauanaqchigui da lli'oxoyic dam ñi'oxoyic mayi maichi lalamaxat lli'oxoyic som 'oonolec llalec ñim qadta'a Dios. 15Qaq so Juan i'axattac co'ollaxa somayi, 'eeta':

–'Eda da aÿim sa'axatta'aguet co'ollaq shiita': “Huo'o ca aÿim nca'attaueegue, qaq que'eca aÿim nca'attaueegue, ca mayi aÿim napacalec, cha'ayi nal'ena da huo'o co'ollaq saxanaqca aÿim.”

16Qaq 'enauac da shinaqta saconaxaguet dam chochaq huañi lsallaxa dam lqouagaxanaqtaic mayi nacalec lÿa da qomi' ÿanema. 17Na nqataxacpi co'ollaq qoÿan, qalaq chigoqchigui qanqoÿin so Moisés; qaq da nauotaxanaqtaic qataq dam 'eesa lataxac, damayi chigoqchigui so Jesucristo. 18Ñi Dios qaica ca ishit da ilogui, qalaxayi so 'oonolec llalec mayi ÿataqta neto'ot ñimayi, somayi nachiso so qomi' ÿauattonaxanaxanque ñi qadta'a.

So Juan mayi nachilaxanataxanaq i'axatta'aguet so Jesucristo

(Mateo 3.11-12; Marcos 1.7-8; Lucas 3.15-17)

19Na judiopi mayi lma' yi Jerusalén ÿamaq na ntaxaÿaxanaxanecpi da qaitaxaÿapegue' ñi Dios qataq nam Leví llalaqpi mayi ltaua namayipi da nnataxana so Juan da chaq negue'tso somayi. 20Nachi somayi 'enapeco':

–Aÿim sa ishit da nachaÿim ca nta'a nca'alaxaqui.

21Nachi qaltaq qaÿi'iguelaxalec da qainat, qoÿiita':

–Qaq ¿chaq négue't 'am qone'? ¿Peta'a nachi'am Elías?

Nachi so Juan 'enapeco':

–Sa ishit da nachaÿim Elías.

Nachi qaltaq qaÿi'iguelaxalec da qainat, qoÿiita':

–Qaq ¿peta'a nachi'am que'eca n'aqtaxanaxanec mayi qai'axatta'aguet da naÿa'cna?

Nachi somayi ÿasat, 'eeta':

–'A'i, sa ishit da nachaÿim.

22Nachi qoÿiitega, qoÿiita':

–Qaq ¿négue'to' 'am qone'? Cha'ayi qomi' sauoqtaique da huo'o ca qayi'ac 'ad'aqtac da sedaxa yim qomi' nama'q. ¿Ña qomi' 'au'aqtaxanemactaxa chaq negue't dam qoneta?

23Nachi so Juan 'enapeco':

–Qomyi nachaÿim mayi aÿim chimaqtapeguelec ca tojlec 'alhua, qaq da iÿaxanaxac, shiita': “Qauqataxañiÿai' qome ca ÿataqta ÿashicteec nqa'aic ñi qadataxala'” –qaq damayi nachida da 'enapec co'ollaxa so l'aqtaxanaxanec ñi Dios l'enaxat Isaías.

24Qaq se'eso inattac so Juan, somayipi lamaxashic na fariseopi. 25Nachi somayipi inattac so Juan, 'eeta':

–Qalaq ¿tá'ainco' qone' yi 'auachilaxanataxan, yi sa ishit da nachi'am que'eca nta'a nca'alaxaqui, qataq sa ishit da nachi'am Elías, huo'otaq que'eca n'aqtaxanaxanec mayi qoÿinac naÿa'cna?

26Nachi so Juan 'enapeco':

–Aÿim sachilaxanataxana na 'etaxat. Qalaxayi da qoñiita huo'o dam qami' huetanguilo mayi sa ishit da qauauattoñi, 27damayi aÿim nca'attalec, qaq nai'ctaxa da damayi nal'ena da huo'o co'ollaq saxanaxa da aÿim huo'o. Qataq sa ishit da yalou'a da ñaqa't naua lapela'te lque'te.

28Qaq 'enauac de'eda huaña yi 'alhua l'enaxat Betábara mayi pa'aigue da nala' lliguishiguem yi tala Jordán, yim huaña co'ollaq dachilaxanataxaatac so Juan.

So Jesús nachiso so qagueta llalec mayi chigoqo'ot ñi Dios

29Qaq so lÿa na'a'q, nachi so Juan ila'aguet so Jesús da naÿaxaama somayi, nachi somayi 'eeta':

–Ña qauloÿa, 'ena cha'aguet na qagueta llalec mayi chigoqo'ot ñi Dios, nam nqat qome 'enauac na nasouaxashitpi ana 'alhua. 30Qaq aÿim sa'axattac namayi co'ollaq shiita': “Huo'o na aÿim nca'attalec, namayi nal'ena da huo'o co'ollaq saxanaqca aÿim, cha'ayi namayi nachi 'eetai' da huo'o.” 31Qaq aÿim sa ishit da sauatton co'ollaxa namayi. Qalaxayi aÿim ñanacto'ot da sachilaxanataxaatega na 'etaxat, yaqto' nam llalaqpi so Israel ishit da ÿauatton namayi.

32Nataq'en so Juan 'enapeco':

–Aÿim sauaateguet so Espíritu Santo da chigoqtot na piguem, 'eeta'am na qoto', nachi talec somayi. 33Qaq aÿim ñaq saxanaxa da sauatton chaq negue'tca que'eca shiÿaxaua. Qalaxayi ñi aÿim namaq da yaqto' sachilaxanataxana na 'etaxat, ñimayi aÿim 'enapega co'ollaxa, 'eeta': “Qom 'am 'auauaachigui so Espíritu Santo da huo'otaq anac, nachi talec ca shiÿaxaua, qaq que'eca shiÿaxaua nachica qome ca dachilaxanataxana so Espíritu Santo.” 34Qaq aÿim mashi sauaachigui somayi, nachi sa'axattac da somayi nachiso so llalec ñi Dios.

Soua hua'auchiyiñi lapaxaguenataqa so Jesús

35Qaq so lÿa na'a'q, nachi so Juan qaltaq hueta'a yi'iyi 'alhua, qataq soua dos soua nale't. 36Qaq co'ollaq ÿauaategue so Jesús, nachi 'enapeco':

–Ña qauloÿa, 'eso cha'ague som qagueta llalec mayi chigoqo'ot ñi Dios.

37Nachi soua dos nale't so Juan co'ollaq hua'aqchiyigui de'eda, nachi ca'atregue so Jesús. 38Nachi so Jesús co'ollaq nqoilec, nachi ila'agueta soomayi da ca'attrauo, nachi inatta'pe, 'eeta':

–¿Négue't ca qanmichiitaique?

Nachi soomayi 'ena'po':

–'Am mayi 'auapaxaguenataxaatac, ¿huá'ague ca qoneta'ague?

39Nachi so Jesús 'enapeco':

–Qayalaÿi, ña qaumejnaxañiÿa.

Nachi soomayi je'c da demejnaxaada, nachi ÿauaada ca netaña somayi. Nachi huetra'asop somayi se'eso avit, cha'ayi huo'o ca mashi las cuatro se'eso avit.

40Qaq so 'oonolec soua hua'aqchiguilo co'ollaxa so Juan, nachi ca'ateguelo so Jesús, somayi nachiso so Andrés, som lqaÿa so Simón Pedro. 41Qaq so Andrés co'ollaxa ÿataqta i'auaxaachiguiñi da nqo'ona so lqaÿa Simón, nachi 'enapega, 'eeta':

–Qomi' ñauanaxai' ñim qoÿiitega Mesías –de'eda n'enaxat naigui da Cristo, nta'a nca'alaxaqui.

42Ime, nachi so Andrés ÿauec so Simón da ÿauega ca netaña so Jesús. Qaq so Jesús co'ollaq ila'aguet somayi, nachi 'enapega, 'eeta':

–'Am Simón mayi 'am llalec so Jonás, nagui 'am qaÿamata'ac da 'ad'enaxat Cefas –de'eda n'enaxat naigui da Pedro, coma'.

So Jesús iÿaxana so Felipe qataq so Natanael

43Qaq so lÿa na'a'q, nachi so Jesús ÿauotaique da taigue da 'alhua Galilea. Nachi natenalec so Felipe, nachi 'enapega, 'eeta':

–Aÿim qoquegue.

44Qaq se'eso Felipe, somayi nachi lma' yi pueblo Betsaida, yim nataq'en lma' so Andrés qataq so Pedro. 45Nachi so Felipe jec da nmitaique so Natanael. Nachi da'aqtaxanem, 'eeta':

–Qomi' mashi ñauanaxai' ñim shiÿaxaua mayi ÿiyiñi co'ollaxa so Moisés naua lqataxaco mayi nanettrañi ana lede, ñim nataq'en ÿiyiñi co'ollaxa so l'aqtaxanaxanecpi ñi Dios. Ñimayi nachiñi ñi Jesús, ñim llalec so José mayi lma' yi pueblo Nazaret.

46Nachi so Natanael 'enapeco':

–¿Peta'a ishito' da huo'o ca no'on da lataxac da chigoqchiguiña yi Nazaret?

Nachi so Felipe 'enapeco':

–'Ayala, ña 'aumejnaxana ñimayi.

47Nachi so Jesús co'ollaq ila'aguet so Natanael da naÿau'a, nachi 'enapega, 'eeta':

–'Ena na ÿoqta 'eesa da llalec so Israel, namayi sa ishit da tenataxanaxaic.

48Nachi so Natanael denataxan, 'eeta':

–¿Huá'ague co'ollaxa, qaq aÿim 'auauatton?

Nachi so Jesús 'enapeco':

–Qomyi 'am selota'a can saxanaxa da 'am iÿaxana da Felipe, can qoueto'ot ada higo lchiyic.

49Nachi so Natanael 'enapeco':

–'Am mayi 'auapaxaguenataxaatac, nachi'am llalec ñi Dios, qataq nachi'am lta'a na Israel llalaqpi.

50Nachi so Jesús 'enapeco':

–¿Aÿim 'au'amaqten peta'a, souaxat da shiitega da 'am selota'a can qoueto'ot ada higo lchiyic? Qalaxayi nagui 'am shinapega da ÿataqta lta'adaic qome ca 'adauanaqchic, saq 'en'am de'eda.

51So Jesús nataq'en 'enapeco':

–Ÿataqta 'eesa de'eda qami' sa'axatema nagui, da qami' qauloÿa'a qome na piguem qom qanauatoigui, nachi na namaxashic piguem l'ecpi taÿashiguemecda, qataq da naÿaña na shiÿaxaua llalec.

Currently Selected:

Juan 1: TBSNT

Highlight

Copy