Luka BŪSOMBOOJI BO KŪGUNAANA
BŪSOMBOOJI BO KŪGUNAANA
Ū Luka ū mu shitabo shakwe alītoolekeja hape gīkī ū Yesu hū ng'wene ū Mpīja, ūyo ihanga lya Baisilaeli baalī bisagījiwa kūfuma kale. Alīyo na a banhū ba mahanga a gangī hū ng'wene ū Mpīja wabo. Hama alītoolekeja na gīkī ū nīmo go ng'wa Yesu ū ntaale gwalī kūlomeela Nghūlū Jawiza kū bahabī. Washikīlījaga īyo yalī īhangilwe kūfuma kale na nghangi Isaya (Isa 61:1-2). H'ūmo tūlībonela a h'ikanza lyakwe lya kwandya milīmo (Luk 4:14-21). Na lūūlū kūlwa nīmo gwenūyo, tūlīmona ū Yesu gīkī okajiwe nguzu ja ng'wa Moyo Ng'wela pye a makanza ga shikū jakwe ja būtūmami aho alī mu sī. Ū mu shitabo shenīshi tūlībona ū Yesu alībagunaana banhū ba makoye ga būlī mbika. Ī mihayo ya kūbenheleja banhū kūyega nayo tūlīyībona īsambaalile pye a hose ū mu shitabo shenīshi. Ī no-no-no ū mu sula ja wandījo, ī sula ījo jilītūkumūkīja ya kūbyalwa kwa ng'wa Yohana Matīīja, nū kwa ng'wa Yesu. Nū kū būkalīkījo washo ī shitabo shenīshi shilītoolekeja būyegi bo banhū ba ng'wa Seeba, a h'ikanza lya kūshoka kwakwe ng'wigūlū.
Ū ng'wandīki wa shitabo shenīshi hū ng'wene ū ng'wandīki wayo nī mihayo ya kakūlīle ka kūzunya na kasambaalīle ka balondeeji ba ng'wa Seeba Yesu, kwandīja ī likanza lya gīkī ū Seeba Yesu wamalile kūja ng'wigūlū. Ī mihayo yenīyo alīyīsomboola chiza mu shitabo sha Shītwa Sha Batūng'wa.
Ū mu shitabo sha ng'wa Luka īlīmo mihayo mingī īyo batayandīkile a bandīki a bangī: mihayo gītī ya bamalaika kwenha mhola ja kūbyalwa kwa ng'wa Yohana na kwa ng'wa Yesu, mīmbo ga būyegi (tūlībabona ba Malia, Zakalia, na bamalaika); na mihayo ya badīīmi mu būjikū bo kūbyalwa kwa ng'wa Yesu, na ya ng'wa Yesu mu hekalu ha būyanda bokwe. Īlīho na mihayo ya Nsamalia wa shigongo, ya namhala na bitūnja bakwe bajimīīji. Hama īlīho mihayo mingī īyo ītūūlīlilwe ntili kūtinda ū mu shitabo ī shingī; mihayo gītī ya: kūlomba, Moyo Ng'wela, bakīma kūngunaana Seeba Yesu, na ya būkalalwa bo ng'wa Mulungu kūlekeja shibi sha banhū bakwe. Ū ng'wandīki alīyoolecha ī mihayo yenīyī mu būkalalwa kūbatinda a bandīki a bangī.
ĪYO ĪLĪMO
Nguno ya kwandīka (1:1-4)
Kūbyalwa na būnīgīnī bo ng'wa Yohana na Yesu (1:5 — 2:52)
Būtūmami bo ng'wa Yohana Matīīja (3:1-20)
Kūbatīījiwa, na kūgeng'wa kwa ng'wa Yesu (3:21 — 4:13)
Būtūmami bo ng'wa Yesu mu Galilaya (4:14 — 9:50)
Yesu kwīnga Galilaya kūjūtūmama Yelusalemu (9:51 — 19:27)
Nyuma ya būkalīkījo bo būtūmami mu Yelusalemu (19:28 — 22:46)
Kūding'wa na kūbūlagwa ha nsalaba (22:47 — 23:56)
Kūjūūka, kwiyoolecha na kūja ng'wigūlū (24:1-53)
Currently Selected:
Luka BŪSOMBOOJI BO KŪGUNAANA: SNT00
Highlight
Share
Copy
Want to have your highlights saved across all your devices? Sign up or sign in
Sukuma New Testament © Bible Society of Tanzania, 2000.