Lukka 15
15
Gisilleanda roat
(Mat 18:12-14)
1Eaweechcha gaweesa Fuga ang'ng'oonyi gwaadi ea fuga ring'eega gooleeysiit niny. 2Hean ghoaniikghi Farisayajeega ea ng'oorshoodiga nea gwayi, “Siisi gaguursa fuga ring'eega ak gombuuttooschi.” 3Hean gwarukusa galeega nea gwayeeshsha, 4“Nii gajea anasihi aba jeedeang'wa mideawa gisil bughala, ama roat agi ea maygwanung'usa heeda giikka was seedaam adamwashshageashiin, ak gawa dareabeetta gagasa diitta roadiin ea ghwanyas?”
5“Amaduuw nea ghwanyas, ghwayiin ghattaannyi nea gahoosan. 6Amaduw nea ghwahitta gheannyi gaguursa fuga duupchi ea fuga ascheayi ak gwayeeshsha, ‘Ahoosaana sea aniini aba gideaba naanyaaschi gisilleandeanyu roat.’ 7Asi gwasnu, ak geayeeshshineegwa, gaygwanda hooseaneega muuchchi aba humng'eada appadayda siyagi mideawa ring'eeda ak gwaduukkuna, maygawuurji fukka was seedam ea damwashshageesh doobiiweadi magassa duukkuunoodean.”
Shilingajeanda roat
8“Nii gajea ana gatmu, mideawa shiliingaji damanamughuush, amaroat akkalealla ea maygorabeat gheaboonyaneeda, ak goobuus gheeda ak gagasiischi muuchchi ea ghwaanyasi? 9Amaduw nea ghwanyas gaguursa fuga duupchi ea giischeawdaannyi ak gwayeeshsha, ‘Eehoosana easasean aba gideaba nanyaschi shilingajeandida gwachchi roadiin.’ 10Asi gwasnu, ak geayeeshshineegwa, gaygahoosan malaykajeega Aseetta appadayda siida assagi mideawa ring'eada iduukkuuna.”
Balleanda roat
11Hean gwayeeshsha, “Ghayi gwanda siisi mideawa ballooji iyyeenya; 12gwayeeshsha damwanang' ghwaan, ‘Bwaabwa, gwalnean haleanjeeda miisean.’ Ng'atta gagwalsa duwaaw halleanjeeda nyaawa. 13Ama miighang'atta eawoojusu saang'a ghang'eat balleanda mwanang' ghwashaayda haleanjeedaannyi sean ak gawa bareannyeekka ea gawa ng'eanyiida sheagi, hitta ghwasaksakta haleanjeedaanyi. 14Geeyi bwak ama niduulu haleanjeedaannyi sean ghang'eat geejeeda haw aba ng'eanyiitta, ak eara niny gaba fuga gasa gichcheaghwaak. 15Iiduw gawa gadiyeeda aba hichpa siyagi bea ng'eanyiitta, ak ghwanung' siitta gawa madamnyeandaannyi ghoarear ukkurmajeega. 16Iiduw Gagasa ghwaak hamitta ak ukkurmajeega ak ea manda siisi adaw gil. 17Jeeng'u aba Jeadaannyi gwayi, ‘Gwadeannaan soomjooga agiischi aba ghaheanya, ea ghwalach hamichchoojiga nea aniini gayghabwaran jalooda aba hiji!’ 18Gaydang'eat dawa heeda ghweandeanyu ak geayeeshshi niny, ‘Bwaabwa neadiiysi humng'eeda ea madeadaang'u; 19ak ea mammisean gideaba gajeegureewean jeeptaang'u, nung' dawurji fiisu was soomjoogeaba gheang'uun.’ 20Ghang'eat ak gabiikta heeda ghwaan. Hean nea gudu ea dildeaweat ghoang'wearda ghwaan ama daa ghabwayda ak ghafwach ghwadeapta nea ghwasam gheatta.”
21“Hean gwayeeshsha Balleandida niny, ‘Bwaabwa aniini neadiiysi humng'eeda ea madeadaang'u, mammiisean gideaba gajeegureewean ballandang'u.’ 22Ghwalamda Ghwaan ak gwayeeshsha soomjoogaaschi, ‘Alamwaja ayeanni hang'dida miyyiin ak gookkwealsi, nea gooshshuupchi moonneeda ghuniida nea goolleapsi eara geekka; 23ak gooyeadu meaydida riishaadiin ak goonuuschi, eayaaga nea geehoosannyi; 24aba gideaba balleanji iitteanyuun ghayi nimi, ak ghamneawa ea niduudu; ghayi niroat ak ghamneawa ea sinyas.’ Ak geebiissa eang'ng'eat hooseaneega.”
25“Abeeda Oorjeadaannyi haw gwanda madamnyeanda, damani duugwandeawa naweeda nea niriiksa gheedean ghwayiiy ghuutta sarmeeda ea deangheeda. 26Gaguursa soomjeanda ak ghoanyaashta nea gwayeeshsha, ‘Gwandaani hiji?’ 27Geeyeeshsha niny, ‘Nibiigu oorjeeda geamadu ak ea ninuus gweanu meayda riishaat aba gideaba nibiigu nea gudeamajeek.’ 28Ghwanyareas balleandida hawiin, ak ghaheawa gawa ghoah. Iiduw gwaritta ghwaan jarooda ak gamearmearani niny ghwaan ghoah, 29ak ghwasha nea gwayeeshsha ghwaan, ‘Daa, aniini naaweachcheay gweannyeekka saang'a, nea mwoang'ng'wa danung'waada huumeandaang'u; nea migoonean eara dayeenda ak geahoosannyi sea fuga eaduupcheewi. 30Ghamneawa nea ghwahidu balleanji iittaang'uun duulu haleanjeedaang'u sea gadeemga hiseadean ginuuksi meayda riishaat!’ 31Gwayeeshsha niny, ‘Balleandeanyu, ang'iing'i geendeaydooschi galagasean ak haleanjeeda eandeawi sean ea gaagu. 32Ak gichcha iisihoosan ghwahit geeng'weala aba gideaba orjeeni bea geamaduun ghayi nimi, ak ghamneawa ea niduudu, ghayi niiroat, ak ea sinyas.’”
Currently Selected:
Lukka 15: DTGANT09
Highlight
Share
Copy
Want to have your highlights saved across all your devices? Sign up or sign in
Datooga New Testament © Bible Society of Tanzania, 2009.
Lukka 15
15
Gisilleanda roat
(Mat 18:12-14)
1Eaweechcha gaweesa Fuga ang'ng'oonyi gwaadi ea fuga ring'eega gooleeysiit niny. 2Hean ghoaniikghi Farisayajeega ea ng'oorshoodiga nea gwayi, “Siisi gaguursa fuga ring'eega ak gombuuttooschi.” 3Hean gwarukusa galeega nea gwayeeshsha, 4“Nii gajea anasihi aba jeedeang'wa mideawa gisil bughala, ama roat agi ea maygwanung'usa heeda giikka was seedaam adamwashshageashiin, ak gawa dareabeetta gagasa diitta roadiin ea ghwanyas?”
5“Amaduuw nea ghwanyas, ghwayiin ghattaannyi nea gahoosan. 6Amaduw nea ghwahitta gheannyi gaguursa fuga duupchi ea fuga ascheayi ak gwayeeshsha, ‘Ahoosaana sea aniini aba gideaba naanyaaschi gisilleandeanyu roat.’ 7Asi gwasnu, ak geayeeshshineegwa, gaygwanda hooseaneega muuchchi aba humng'eada appadayda siyagi mideawa ring'eeda ak gwaduukkuna, maygawuurji fukka was seedam ea damwashshageesh doobiiweadi magassa duukkuunoodean.”
Shilingajeanda roat
8“Nii gajea ana gatmu, mideawa shiliingaji damanamughuush, amaroat akkalealla ea maygorabeat gheaboonyaneeda, ak goobuus gheeda ak gagasiischi muuchchi ea ghwaanyasi? 9Amaduw nea ghwanyas gaguursa fuga duupchi ea giischeawdaannyi ak gwayeeshsha, ‘Eehoosana easasean aba gideaba nanyaschi shilingajeandida gwachchi roadiin.’ 10Asi gwasnu, ak geayeeshshineegwa, gaygahoosan malaykajeega Aseetta appadayda siida assagi mideawa ring'eada iduukkuuna.”
Balleanda roat
11Hean gwayeeshsha, “Ghayi gwanda siisi mideawa ballooji iyyeenya; 12gwayeeshsha damwanang' ghwaan, ‘Bwaabwa, gwalnean haleanjeeda miisean.’ Ng'atta gagwalsa duwaaw halleanjeeda nyaawa. 13Ama miighang'atta eawoojusu saang'a ghang'eat balleanda mwanang' ghwashaayda haleanjeedaannyi sean ak gawa bareannyeekka ea gawa ng'eanyiida sheagi, hitta ghwasaksakta haleanjeedaanyi. 14Geeyi bwak ama niduulu haleanjeedaannyi sean ghang'eat geejeeda haw aba ng'eanyiitta, ak eara niny gaba fuga gasa gichcheaghwaak. 15Iiduw gawa gadiyeeda aba hichpa siyagi bea ng'eanyiitta, ak ghwanung' siitta gawa madamnyeandaannyi ghoarear ukkurmajeega. 16Iiduw Gagasa ghwaak hamitta ak ukkurmajeega ak ea manda siisi adaw gil. 17Jeeng'u aba Jeadaannyi gwayi, ‘Gwadeannaan soomjooga agiischi aba ghaheanya, ea ghwalach hamichchoojiga nea aniini gayghabwaran jalooda aba hiji!’ 18Gaydang'eat dawa heeda ghweandeanyu ak geayeeshshi niny, ‘Bwaabwa neadiiysi humng'eeda ea madeadaang'u; 19ak ea mammisean gideaba gajeegureewean jeeptaang'u, nung' dawurji fiisu was soomjoogeaba gheang'uun.’ 20Ghang'eat ak gabiikta heeda ghwaan. Hean nea gudu ea dildeaweat ghoang'wearda ghwaan ama daa ghabwayda ak ghafwach ghwadeapta nea ghwasam gheatta.”
21“Hean gwayeeshsha Balleandida niny, ‘Bwaabwa aniini neadiiysi humng'eeda ea madeadaang'u, mammiisean gideaba gajeegureewean ballandang'u.’ 22Ghwalamda Ghwaan ak gwayeeshsha soomjoogaaschi, ‘Alamwaja ayeanni hang'dida miyyiin ak gookkwealsi, nea gooshshuupchi moonneeda ghuniida nea goolleapsi eara geekka; 23ak gooyeadu meaydida riishaadiin ak goonuuschi, eayaaga nea geehoosannyi; 24aba gideaba balleanji iitteanyuun ghayi nimi, ak ghamneawa ea niduudu; ghayi niroat ak ghamneawa ea sinyas.’ Ak geebiissa eang'ng'eat hooseaneega.”
25“Abeeda Oorjeadaannyi haw gwanda madamnyeanda, damani duugwandeawa naweeda nea niriiksa gheedean ghwayiiy ghuutta sarmeeda ea deangheeda. 26Gaguursa soomjeanda ak ghoanyaashta nea gwayeeshsha, ‘Gwandaani hiji?’ 27Geeyeeshsha niny, ‘Nibiigu oorjeeda geamadu ak ea ninuus gweanu meayda riishaat aba gideaba nibiigu nea gudeamajeek.’ 28Ghwanyareas balleandida hawiin, ak ghaheawa gawa ghoah. Iiduw gwaritta ghwaan jarooda ak gamearmearani niny ghwaan ghoah, 29ak ghwasha nea gwayeeshsha ghwaan, ‘Daa, aniini naaweachcheay gweannyeekka saang'a, nea mwoang'ng'wa danung'waada huumeandaang'u; nea migoonean eara dayeenda ak geahoosannyi sea fuga eaduupcheewi. 30Ghamneawa nea ghwahidu balleanji iittaang'uun duulu haleanjeedaang'u sea gadeemga hiseadean ginuuksi meayda riishaat!’ 31Gwayeeshsha niny, ‘Balleandeanyu, ang'iing'i geendeaydooschi galagasean ak haleanjeeda eandeawi sean ea gaagu. 32Ak gichcha iisihoosan ghwahit geeng'weala aba gideaba orjeeni bea geamaduun ghayi nimi, ak ghamneawa ea niduudu, ghayi niiroat, ak ea sinyas.’”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Datooga New Testament © Bible Society of Tanzania, 2009.