Mattayo 21

Hooseaneega aba hitteayda Yerusaleemu

(Mark 11:1-11; Luk 19:28-40; Yoh 12:12-19)

1Iiduw nea gwaneekkiissa Yerusaleemu ghwahitta Betfaagi, mida giijeeda masaytunajeega, hean goojeakta Yeesu giinealan iyyeenya, 2nea gwayeeshsha, “Aweayeena ea ahitta gharang'da mida madeadeang'wa, deagheatta gajadaaha digeeda sirat ea gureandaannyi; goottinnyi ak gooyeannean. 3Ama rukuneegwa siida ng'asheanda, gooyeeshshi, ‘Gagasa Ng'uttamiida,’ ak gaygwasikseegwa.” 4Suh seaniin geesindunu gwadeaschi sea ng'asheanda ghayi rugu sibaneeda nea gwayi,

5“Ayeeshshiina hudeaba Sayuuni,

Ang'wearda, sugoochcheandaang'u ghwaan headaang'u,

ea ng'eeni nea gwading'da digeeda,

gureenda digeeda, dayeenda digeeda.”

6Gaweay Giinealanga ak gwasinda ng'asheega gida rukusiinda Yeesu; 7goorjeanu digeeda ea gureandannyi ak gookkwealsa hang'weakka nyaawa badahuukka ak goopteada aba badayda. 8Ghoabwarghaan emeeda hang'weakka nyaawa aba jeeda naweeda, nea buuneeda suurja gaptu seenga geediga ak ghoabwarghaan aba jeeda naweeda. 9Goojuur emeetuw asheeda ea gea huydean nea gwayi, “Hoosaana Balleanda Dawdi! Sing'ushsha dea jea ghwaana gheawunga Ng'uttamiida! Hoosaana aba humng'eeda.” 10Damanda hittaawa Yerusaleemu, ghwadakghuyan mujiineasean. Hean gwayi buuneeda, “Siisi ng'eaha?” 11Gwayi emeetuw, “Nii sibaneeda was, Yeesuuyda leabu Nasareetteeda Galilaaya gil.”

Yeesu gawa jeeda gheeda sibatta Aseetta

(Mark 11:15-19; Luk 19:45-48; Yoh 2:13-22)

12Gawa Yeesu jeeda gheeda sibatta Aseetta, hitta ghahoan fuga shaayda haleanjeeda ea gea shaah aba jeeda gheeda sibatta Aseetta, ak goobimbiineada measajeega fuga nyarja lappiya, ea hoorgajeega fuga shaayda gharibajeega. 13Gwayeeshsha saawa, “Geang'waar gideaba, ‘Gheenyu gajeeguura gheeda sumoorra ghawooda;’ amaduw ghoanung' agooga ghoaw gwaleeda funnya geat mareanghooga.”

14Gaweay headannyi fuga badoojiga ea gea ng'oawwi ak ghwanyasa jeeda gheeda sibatta Aseetta, ak ghoahaap. 15Iiduw nea ghwadaa ashoohoodiga hees ea ng'oorshoodiga ng'asheega deamdeameadi sin, ea ghuusiga diibiga ajuur aba jeeda gheeda sibatta Aseetta nea gwayi, “Hoosaana Balleanda Dawdi!” Gwanyareesi; 16geeyeeshsha niny, “Heappi niyiinyi gida nyah fiisu?” Gwayeeshsha Yeesu saawa, “Ea huumwa ghayi, miyoassoamwana gideaba,

‘Aba ghuusiga diibiga ea gea ghameekka manang'i

gaygwaduumshooweey muuchchi?’”

17Hit ghang'eat ghwanung'wa heeda, ak gwaritteawa mujiini ak gawa Bettaniya ak gwalla hoowa.

Yeesu ghamwaashta shaboogheechcheanda

(Mark 11:12-14, 20-24)

18Sakteayda nea gagal mujiini, ghwayeachchi. 19Ghwadaah shaboogheechcheanda mida ghuutta naweeda, ak gaweesa, ama hitta heeda ghwadaa mandeawana haghweega geaghus seenga akghwahit. Ng'atta gwayeeshsha geetta, “Adagudijiili haghweega ea ghoaw gweannyeekka manda mudeanooda!” Ghaghajamiit geettida aba geeshangiga. 20Daa giinealanga, ghahamng'eanyi nea gwayi, “Ghwasaan anda geedi gabay ghaghajamiit?” 21Ghwasha Yeesu nea gwayeeshsha saawa, “Aba huumwa geayeeshshineegwa, iyondeawi masaweega nea manda jeesingeagwa machmajeega, ghoammuuschi nea majeaghus nii bea shaboogheechcheandean akghwahit, gajoammusa eara gideaba gajayeeshshiina giijeeni, loadaada ak geejakseey jeeda basooda, ak gaygwasa. 22Amaduw iyondeawi masaweega, ak goomuschi nea ghoamwaashchi ghawooda gajanyasa haleanjeessean oogasayi.”

Geannyaash Yeesu heeda nyasa gheambalmeadaannyi

(Mark 11:27-33; Luk 20:1-8)

23Iiduw nea gawa Yeesu jeeda gheeda sibatta Aseetta goonealshi, damani anealsheewean gaweay heeda ashoohoodiga hees ea gweargwa ak geannyaash, “Ng'asheesu deenuun gisni aba gheambalmeedeabeang'a, gagoonnyi ng'eaha gheambalmeani?” 24Ghwasha Yeesu nea gwayeeshsha, “Eara aniini gaydanyasheagwa ng'ashaanjagi; ama oashaayi abeeda eara aniini gaydarukuneegwa gheambalmeani easnni ng'asheesuun headaanyasi. 25Gibaattiisanda Yohaana gwaleabu yeenu? Gwaleabu humng'eeda ghana leabu heeda buuneeda? Hean goonyeari geat saawa gideaba, iisiyeeshshi, ‘Gwaleabu humng'eeda,’ abeeda gaygwayeeshshineasa, ‘Abeeda ghwasaan andamoamwasi?’ 26Ama siyeeshshi. ‘Gwaleabu heeda buuneeda,’ earada geawwalli emeeda; aba gideaba ghwanal buuneassean gideaba Yohaana sibaneeda.” 27Hean ghwasha ghuutta Yeesu nea gwayeeshsha, “Meanali.” Ghwayeeshsha saawa, “Eara aniini abeeda ea maydarukneegwa heeda aanyasi gheambalmeani easni ng'asheesu seaniin.”

Gissigala oorju iyyeenya

28“Heappi ghoadaaktiin? Gwandeawa siyagi oorju iyyeenya; gaweesa dea madeeda ak gwayeeshsha, ‘Balleanda, askwareani una ak gisni gadiyeeda aba jeeda madamnyeanda misabiibu.’ 29Ghwasha nea gwayeeshsha, ‘Maydawa.’ Iiduw gwaduukkuunna ak gawa. 30Gaweesa siitta bea iyyeenyean ak gwarukuteayda gidagwachchi; ghwasha nea gwayeeshsha, ‘Gaydawa, Siida mureeda,’ ak ea mawa. 31Heappi! Aba jeedeaba fiisu assiyyeenyean gwasin anneeda gidagasa ghwaan?” Gwayeeshsha saawa, “Diitta bea madeedeani.” Ng'atta gwayeeshsha Yeesu saawa, aba huumwa, geayeeshshineegwa, fuga ang'ng'oonyi gwaadi ea fuga hiseada gaygoosheedeaweegwa beatta jeeda sugoochcheandumeeda Aseetta. 32Aba gideaba Yohaana ghayi ghwaan heedeang'wa aba naweeda doabiiwaat ak ea moamwasi agooga, amaduw ghamwas fuga ang'ng'oonyi gwaadi ea fuga hiseada. Earappeadi noadaayi haleanjeeni seaniin ghanyea miyaduukkuunana ghana amwasa niny.

Gissigala fuga aragaan madamnyeanda misabiibu

(Mark 12:1-12; Luk 20:9-19)

33“Olleysiniit gideagali nuut. Ghayi gwanda siisi bea gheeda ak gwandeawa madamnyeanda misabiibu ak gooneaweesa hilgweanda ak gwasin heeda jea eesissa difaayi aba jeeda ak ghwadeas eara madalooda, ak ghoadaw fuga jea gooragan, ak ghang'eat gawa bareannyeekka aba ng'eanyi nuut. 34Neekiit damanda haghweega goojeakta soomjoogaaschi heedeaba fukka aragan madamnyeandean gaweay gweadu haghweegaaschi. 35Gageanu fuga ghayi ragan madamnyeandean ak ghoang'ngwaay soomjookka siichcheaktean ak geabwar akkalealla, nea niirja geenuus, nea niirja geefutta lagheanga. 36Gabiikta goojeakta soomjooga suuk saang'a naawa gea madeeda; gabiikta gichcha gwasma fiisu gidada. 37Aba huydeanda goojeakta balleandaannyi nea gwayi, ‘Gayghoawal gheang'da balleandeanyu.’ 38Iiduw nea ghwadaa fugiga ghayi aragan madamnyeandean balleandida gabaloola saawa nea gaba geat gideaba, ‘Nii siichchea gwahearaniischi gil, eabwara ghami ak geegeandi hearaniischoadaannyi.’ 39Hean geang'ng'waay ak geerrutteawa madamnyeandida bea misabiibuun ak geenuus. 40Abeeda iihidu siidida bea madamnyeanda misabibuun gaygwahindaan fukka ghayi aragan madamnyeandean?” 41Geeyeeshsha niny, “Gayghwalas uhuudeaba fukka munyasiin, ak ghoadaw madamnyeandida fii suuk jea gooragan ak geattaw haghweega aba damandaannyi.” 42Gwayeeshsha Yeesu, “Heappi miyoassoamwana iitteaba ng'asheanji aba jeeda Ng'ooruutka?

‘Lagheaneeda ghayi anaawaghaang' deekshoodiga

niiw lagheaneeda haw bea sindeetta;

ng'asheanji gwaleabu heeda Ng'uttamiida,

ak ea daamdaamwaat aba gheanyangaasa?’

43Aba nii geayeeshshineegwa, sugoochcheandumeeda Aseetta gajearreadeagwa ak geattaw eemwa nuut ammu gagu haghweagaschi.” 44Ne siida jea ghoabeada aba uhuudeaba lagheaneeni gaygagiishachchi; nea siida wassean jea gobeedeaysa, gayghang'aal ea goosha.

45Hean iiy Ashohoodiga hees ea Farisayajeega ng'asheagaschi galageadiini, gwajeeng'u gideaba gabaloola saawa. 46Hean geebiissa eegasa gichchea eang'ng'waayda, amaduw geawal buuneeda aba gideaba ghwadaa gideaba sibaneeda gil.

Currently Selected:

Mattayo 21: DTGANT09

Highlight

Copy