Slene 3
3
Mbe ta gweleba
1Ma kwa mtsa veci ne, cape yɛ Piyɛre le Zhaŋe kadzeme ghɛa Shala kezha səkwə ghə. 2Ma mɛa ghɛa Shala nya nza sləa ŋkɛ kaMɛa cɛ nya ndeɗe, tagha kwete wəndə nya yake mbeli sawa kwa hwə kagweleba. Keveci keveci kele ŋkɛ mbeli kase tagha yitea səkwə cɛdɛ ŋkɛ va mbeli nyi kedzembe ghɛa Shala. 3Newe ke ne, kase yɛ Piyɛre le Zhaŋe kadzembe ghɛa Shala. Ntake ŋkɛ kasəkwə wəsə va hɛ. 4Mteghere yɛ Piyɛre le Zhaŋe vate ntsə te wəndəa shɛ, ma ke Piyɛre shɛ: «Newe n'yɛ!» 5Mba wəndəa shɛ kanewe hɛ. Ma zəzə ŋkɛ ne, katekemave wəsə ŋkɛ va hɛ. 6Ma ke Piyɛre shɛ: «Mze kwa tɛawetɛa keɗema mze kwa tere tere va 'ya we. Ama wəsə nya va 'ya ne, kave ŋa ŋkɛ 'ya: le sləa Yɛsə Kriste, nde Nazarɛt ne, sate kadzeghwa.» 7Pa ŋkɛ keseve ŋkɛ te dzeve kwa zeme ba'a kesakate ŋkɛ te ŋkwa. Te ŋkwa shɛnyɛ ne, pa yɛ seɗa ta ŋkɛ ba'a yɛ daŋwela ta ŋkɛ kemave berete. 8Pelɛhetɛme ŋkɛ sate te seɗa ta ŋkɛ, ntake ŋkɛ kadzeghwa. Shilimə ŋkɛ mbe ghɛa Shala le hɛ le dzeghwa, bale ba'a tsahe Shala. 9Nahe pɛtɛa mbeli kenakɛ ŋkɛ kadzeghwa ba'a katsahe Shala. 10Ma kwa ɗepe hɛ gheŋkɛ gweleba nya kese mentishɛ mɛa Mɛ nya ndeɗe ta ghɛa Shala kezha səkwə wəshi ne, pa hɛ dakenji ba'a nzanji heheɓake pɛtɛa nci, va wəsə nya kemenete nda geva.
Ghena ta Piyɛre mbe ghɛa Shala
11Ma kwa ɗema wəndəa shɛ slə yitea yɛ Piyɛre le Zhaŋe ne, pɛtɛ mbeli heheɓake, kase mbeli kwele kwele sha hɛ le hwɛ kadzembe gelɛŋka nya heka mbeli kaGelɛŋka ta Salomon. 12Ma kwa nakɛ wəsəa shɛ Piyɛre ne, ma ke sha hɛ: «Ka Israyɛl, va wa nza yɛ heɓake va mbe ta wəndə nya wa? Va wa newe yɛ kala ghen'yɛ nde mbete wəndə nya le berete ta n'yɛ keɗema va nya ndeke nda ghə n'yɛ ke Shala wa? 13Nahe Shala ta ka shihɛ ɓəmə, Shala ta Abraham, Izak ba'a Zhakob kendeke nda zləvə ke wəndəa ŋkɛ nya kemene nda slene, gheŋkɛ Yɛsə. Gheyɛ le ghəa ŋayɛ ka pamte Yɛsə ba'a ka wəfəyite ŋkɛ kwa kema ta Pilate kwa ɗe ŋkɛ kapele ŋkɛ. 14Pa yɛ ɗema wəndə nya keveyi geva tekeleke ba'a nya tiɗiɗi. Nahe yɛ ke'yɛwe kezha pele ŋayɛ nde mpə ŋkwa mbeli. 15Nahe yɛ kepeslekɛ meghea mpi. Ama nahe Shala kekelakame ŋkɛ same kwa kwele, ghen'yɛ ya kaka negha fete yite. 16Te zlaɓa ta yɛ nya mbe sləa Yɛsə se mbele ta wəndə nya ɗepe nya yɛ ba'a nya newe nya yɛ. Yɛ nya yɛhwe Yɛsə wəndəa shɛ nde mbete ŋkɛ kwa ntsə ta ŋayɛ.
17Ma tsetsenya gɛ ka kesaka meyɛ ɗa, nahe 'ya keɗepe tsema tsema nza wəsə nya menete nda yɛ ba'a mbeli nyi te ghəa ŋayɛ laka ɗepema ta ŋayɛ. 18Ama kezha yipə ghena nyi se ka mɛ ŋkwa ta Shala pɛtɛ gezete ghena Shala. Nahe ŋkɛ kegezete katesa yaka Mɛsi. 19Ma gɛ ne, mpi mə dzeve ba'a zhɛre nda mə geva ke Shala kezha kelemte jaɗafa ta ŋayɛ ŋkɛ te wənə. 20Tagha gɛ, kateve ŋayɛ yɛ vəa zhɛne mpi ba'a kateghwene ŋayɛ Yɛsə, Mɛsi nya ntave ŋkɛ vəashi ŋkɛ. 21Kaba ne, pelɛ ghweme tenza Yɛsə hwa'a te veci nya tezhɛre pɛtɛa wəshi kamɛnɛfɛ kala nya gezete Shala laka ka mɛ ŋkwa ta ŋkɛ nyi keveyi geva tekeleke. 22Ma ke Moyize gezete: Kateghwene nde mɛ ŋkwa Mahwətə Shala ŋayɛ kala 'ya, katenza ŋkɛ kawəndə nya mbe hwelefe ta ŋayɛ, kateve sleme yɛ yitea ghena nyi tegeze ŋayɛ ŋkɛ. 23Ma yayata wəndə nya ketefa nda ma ghena ke nde mɛ ŋkwa shɛ ne, katekele ŋkɛ mbeli shave hwa mbelia Shala ba'a katepesle ŋkɛ mbeli. 24Nahe ka mɛ ŋkwa ta Shala ghala se te Saməyɛl ba'a nyi kese kwetere wəmbəa ŋkɛ kegezete ghena ta və nya tsetsenya. 25Nahe meɗe mɛ nya meɗeyi nda Shala ke mbeli laka ka mɛ ŋkwa ta ŋkɛ kenza kezha gheyɛ. Ma gheyɛ ne, Nahe yɛ kenza mbe jikə geva nya menete Shala le ka shihɛ ŋayɛ yɛ, kwa nza ŋkɛ ma ke sha Abraham: Katewəpi mbeli nyi te hɛɗi 'ya laka hwelefe ta ŋa. 26Kaŋa ŋayɛ mpelɛa kelakame nde mene slene ta ŋkɛ Shala kwa kwele, kezha wəpi ŋayɛ ghweneke ŋkɛ ŋkɛ laka zhɛremte yayata wəndəa ŋayɛ seyi vare jaɗafa ta ŋkɛ.»
Currently Selected:
Slene 3: BEK12
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.
