Slene 6
6
Zhili mberefaŋe kezha kemane ka ghwene ta Yɛsə
1Ma vəa ŋkwa shɛ ne, kambake geva ka təkwə təkwə Yɛsə. Nahe ghena kedzawa kwelɛ ka Zhəwif nyi kegeze ghena ta ka Grɛk le ka Zhəwif nyi te hɛɗi. Kaŋgaɗe ghə mbeli nyi kegeze ghena ta ka Grɛk, ma ke hɛ: «Dewə kemane ka wedidia n'yɛ mbeli.» 2Pa ka təkwə təkwə Yɛsə nyi meŋe bakeghəmbe tsenete pɛtɛa mbeli nyi kezele ghena ta Yɛsə. Ma ke hɛ: «Kehite geva ŋkɛ sha ghen'yɛ kasərə geze nda ghena ta Shala ke mbeli kezha slene ta wəshi kezeme we. 3Ka kesaka ma, jara ma tsehave mbeli nyi hawe mbeli va hɛ, nyi viɗikɛ hɛ Sefəa Shala, nyi nza ntsehwele va hɛ mberefaŋe hwa gheyɛ. Kateve nda n'yɛ kaka nehe wəshi kezeme. 4Ma ghen'yɛ le ŋa n'yɛ ne, səkwə ghə ŋa n'yɛ slene ba'a zlape nda ghena ta Shala ke mbeli.» 5Pa tsene ta mbeli yɛte ghena shɛ. Pa hɛ ntave Ɛtiyɛne, wəndə nya keyɛhwe Shala kwele kwele ba'a nza Sefəa Shala viɗi mbe, Filipe, Prokore, Nikanor, Timon, Parmɛnas, Nikolas, nde Antiyoshe nya kezhɛrenyɛ kala ka Zhəwif vəashi. 6Pa hɛ ghereŋeyi hɛ kwa kema ta ka ghwene ta Yɛsə Kriste. Pa hɛ səkwəte ghə ba'a dapaghe dzeve kənəa hɛ.
7Nahe ghena ta Shala kemtsehete geva kalə mbe kema mbe kema. Kwele kwele ka təkwə təkwə Yɛsə mbakete geva mbe Zhɛrəzalɛm. Kwele kwele ka dzeghe Shala nyi keyɛhwe.
Kese ta Ɛtiyɛne
8Nahe Shala kendeke nda berete ta ŋkɛ ba'a ɗe ta ŋkɛ ke Ɛtiyɛne. Tagha gɛ, ntake ŋkɛ kamene wəshi meŋele nyi kwele kwele ba'a wəshi kencɛ wəshi hwa mbeli. 9Pa kweci mbeli ɗema ghena ta Ɛtiyɛne, mbeli nyi kambeli nyi ketsene geva mbe cɛ kesəkwə ghə nya heka mbeli kacɛ kesəkwə ghə ta mbeli nyi waɗe, nyi kaka Zhəwif nyi mbe Sirɛne ba'a Alɛgezandri, ma kweci, kaka Zhəwif nyi mbe Silisi ba'a Azi. Ntake hɛ kaghəpə le Ɛtiyɛne. 10Ama kaghereŋe hɛ kwa kema ta ŋkɛ we, kwa nza ŋkɛ le ntsehwele nya ndeke nda Sefəa Shala geze ghena ŋkɛ. 11Tagha gɛ, pa hɛ ndeke nda cɛdɛ ke kweci mbeli kezha geze hɛ: «Nahe n'yɛ kefa nda ŋelekɛ Moyize ŋkɛ ba'a Shala», a ke hɛ. 12Tsagha heɗete mbeli, mbelia jama ba'a ka rafe wəsə mahalegə hɛ. Dacɛ hɛ keseve Ɛtiyɛne, ntəŋə hɛ le kalə sha mbeli nyi te ghəa hɛɗia ka Zhəwif. 13Te ŋkwa shɛnyɛ, pa hɛ hekakɛ kweci mbeli nyi keve nda fete gəmə, ma ke hɛ: «Ma wəndə nya ne, keveci keveci ghena nya ndiremi ŋkɛ te ghɛa Shala nya keveyi geva kaŋa Shala ba'a wəsə mahalegəa Shala ŋkɛ. 14Nahe n'yɛ kefave nya geze ŋkɛ kateŋzla ghɛa Shala ta ɓəmə Yɛsə nde Nazarɛt ba'a katezhɛre wəshi keshi nyi kese va Moyize ŋkɛ.» 15Kavereghe Ɛtiyɛne pɛtɛa mbeli nyi mbe cɛa shɛ. Pa hɛ nakɛ kema ta ŋkɛ kala ŋa nde ghwene ta Shala.
Currently Selected:
Slene 6: BEK12
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.
