Slene 9

Sol kazhɛre kande zele Yɛsə

1Ma Sol le ŋa ŋkɛ ne, keveci keveci ɗe mpə ta mbeli nyi kezele Nde sleke ŋkwa ŋkɛ. Cape ŋkɛ kalə sha wəndə kwelea ka dzeghe Shala 2ba'a 'yɛwete yɛ palepa va ke mbelia jama ta cɛ kesəkwə ghə nyi mbe Damas. Ma kentsate mbeli nyi kezele hweŋkwa ta Nde sleke ŋkwa ŋkɛ, zhili keɗema mi mbe ne, katefə hɛ ŋkɛ kehwepe hwepe kase teke mbe Zhɛrəzalɛm.

3Ntəŋə ŋkɛ kwa hweŋkwa. Ma takwa takwa ŋkɛ yitea Damas ne, vəkə kwete waŋe sawa pelɛ ghweme kadzeghə, kaɓele ŋkɛ tɛawe tɛawe. 4Tahwepare ŋkɛ te hɛɗi, pa ŋkɛ fate kwete ghena, ma ke: «Sol, Sol, yitea wa ghweze mɛ na hwa 'ya wa?» 5Ma ke Sol: «Wa sləa ŋa wa Nde sleke ŋkwa?» Ma ke ŋwələa shɛ shɛ: «'Ya ya kaYɛsə nya ghweze mɛ na hwe. 6Ama sate, kwiɗi kadzembe meleme, kategeze ŋa wəsə nya temene na mbeli mbagha.» 7Pa mbeli nyi kebeghe Sol ghereŋenji, hehake hɛ, kashɛ hɛ geze kwete ghena va ghazlənə we. Kafa ghena shɛ hɛ, ama kenakɛ wəndə hɛ we. 8Pelɛhetɛme Sol sate te ŋkwa, newe ke sha ŋkwa ne, kashɛ newe ŋkwa we. Pa mbeli keseve ŋkɛ te dzeve kala ghwələ kadzembe Damas. 9Hɛ mahekene menete ŋkɛ kaghwələ, kaɗema kazeme wəsə kezeme ba'a kasa wəsə kesa.

10Kwete wəndəa Yɛsə nya nza sləa ŋkɛ kaAnaniyas ya mbe Damas. Pa Nde sleke ŋkwa ncɛte nda geva, ma ke shɛ: «Ananiyas.» -- «Wa nya 'ya nya, Nde sleke ŋkwa», a ke Ananiyas. 11Ma ke Nde sleke ŋkwa shɛ: «Sate, kwiɗi tsetsenya kwa hweŋkwa nya nza sləa ŋkɛ kahweŋkwa nya Tiɗiɗi shɛ na dzeki ghɛa Zhəwdas, 'yɛwete nde Tarse nya nza sləa ŋkɛ kaSol. Ghə yasəkwə ŋkɛ tsetsenya 12ba'a newe yanewe wəndə nya nza slə kaAnaniyas ŋkɛ kadzeki kezha dape dzeve kənə yitea newe ŋkwa ŋkɛ zhɛkwa.» 13Ma ke Ananiyas shɛ: «Nde sleke ŋkwa, nahe 'ya kefate ghena nya geze mbeli te wəndəa shɛ ba'a wəshi nyi ndiremi ndiremi nyi menete nda ŋkɛ ke mbelia ŋa pelɛ Zhɛrəzalɛm. 14Kezha gheŋkɛ se ŋkɛ teke le berete nya ndeke nda mbeli nyi te ghəa ka dzeghe Shala kezha kese mbeli nyi keheka sləa ŋa.» 15Ma ke Nde sleke ŋkwa shɛ: «Kwiɗi, nahe 'ya kentave wəndəa shɛ kezha nza kande negha fete ta ɗa mbe kema ta kweci hwelefefi ba'a ka meghea kɛfia nci, tsagha ka Israyɛl perə. 16'Ya le ghəa ɗa nde tencɛ nda yaka nyi tesa ŋkɛ tewəmbəreke sləa ɗa.»

17Tagha gɛ, cape Ananiyas. Hwa'a ŋkɛ ki ghɛa shɛ, pa ŋkɛ dapaghe dzeve kənəa Sol, ma ke shɛ: «Sol, wəza meyɛ ɗa, nahe Nde sleke ŋkwa Yɛsə nya kencɛte ŋa geva kwa hweŋkwa nya se na kadzeghwa kwa keghweneke ɗa sha gha kezha zhɛne na kanewe ŋkwa ba'a kezha nza na viɗikɛ va Sefəa Shala.» 18Te ŋkwa shɛnyɛ ne, telakwe kwete wəsə teɗe sawa te ntsə ta ŋkɛ kala jɛpəli, kanewe ŋkwa ŋkɛ ghwɛaɗɛaɗɛa zhɛkwa. Pa ŋkɛ sate te ŋkwa ba'a pa mbeli menete nda batɛme. 19Ma kwa zehwe wəsə kezeme ŋkɛ ne, pa geva ta ŋkɛ kemave berete zhɛkwa.

Sol kazlape ghena ta Yɛsə kwa Damas

Pa Sol hɛakɛ hɛ le ka təkwə təkwə Yɛsə nyi kwa Damas. 20Te ŋkwa shɛnyɛ, ntake ŋkɛ kazlape nda ghena ke mbeli mbe cɛ kesəkwə ghə, ma ke: «Yɛsə ya kaWəzege ta Shala.» 21Heheɓake mbeli nyi kefa ghena ta ŋkɛ, ma ke hɛ: «Ashɛ wəndə nya nde mpə mbeli nyi keheka sləa Yɛsə mbe Zhɛrəzalɛm wəka? Ashɛ yitea kese hɛ kalə sha mbeli nyi te ghəa ka dzeghe Shala se ŋkɛ teke wəka?»

22Ama nahe berete kembakete nda geva ke Sol yitea geze ghena ta Yɛsə, kashɛ ka Zhəwif nyi mbe Damas zhɛne nda kwete ghena kwa ncɛte nda ŋkɛ ke hɛ nahe Yɛsə ya kaMɛsi we.

23Kwetere wəmbəa hɛ ɓɛhwɛ ne, pa ka Zhəwif tsate ghena kezha pesle Sol. 24Ama pa Sol fate ghena shɛ. Kalə mbeli kaya mɛ degha ta meleme viɗi le veci kezha pesle ŋkɛ. 25Ama pa mbeli nyi yite keleghe ŋkɛ dzawa te zli kwa kwaciga le zewe.

Sol pelɛ Zhɛrəzalɛm

26Ma kwa dzeme Zhɛrəzalɛm Sol ne, pa ŋkɛ dzeghakɛ kajikə geva le mbeli nyi ketəkwə təkwə Yɛsə. Ama nahe pɛtɛa mbeli keghazlənənji ve, kayɛ kande təkwə təkwə Yɛsə nya kaganda ŋkɛ we. 27Pa Barnabas beghakɛ ŋkɛ kalə sha ka ghwene ta Yɛsə Kriste ba'a gezete nda ke hɛ tsema tsema nakɛ Nde sleke ŋkwa Sol kwa hweŋkwa ba'a tsema tsema gezete nda Nde sleke ŋkwa. Pa ŋkɛ gezete nda ke hɛ tsema tsema ncɛte nda ghena ta sləa Yɛsə Sol le hwepe ghə ke ka Damas. 28Ghala se mɛa vecia shɛ, jikə yɛ Sol le ka ghwene ta Yɛsə, dzeyi teke dzeyi teke ŋkɛ mbe Zhɛrəzalɛm kageze ghena te sləa Nde sleke ŋkwa le hwepe ghə. 29Kageze nda ghena ke ka Zhəwif nyi kegeze ghena ta ka Grɛk perə, kaghəpə Sol le hɛ. Kazele hweŋkwa mbelia shɛhɛ kapesle ŋkɛ. 30Ma kwa fate ka kesaka meghekɛ, pa hɛ begheghe Sol kadzembe Sɛzarɛ, zhɛne ne, kadzembe Tarse.

31Tagha gɛ, kwelɛŋe ya va Jikə ta ka Kriste nyi mbe Zhəwdɛ, Galilɛ ba'a Samari. Kantsə geva hɛ ba'a kahawe hɛ va Shala, kambake geva hɛ laka kemane ta Sefəa Shala.

Mbele ta Ɛnɛ

32Ma kwa nza Piyɛre kadzeghwa te yayata hɛɗi ne, pa ŋkɛ dzawa sha mbelia Shala nyi mbe Lida. 33Pa ŋkɛ sləyi kwete wəndə nya nza sləa ŋkɛ kaƐnɛ, meɓelahe ŋkɛ te gezle ta ŋkɛ ghala va deghese, kemte mte geva ta ŋkɛ. 34Ma ke Piyɛre shɛ: «Ɛnɛ, wa nya Yɛsə Kriste nya kambe ŋa. Sate, kelete gezle ta ŋa.» Te ŋkwa shɛnyɛ ne, pelɛhetɛme ŋkɛ. 35Ma kwa nakɛ wəndəa shɛ ka Lida ba'a ka Saron ne, pa hɛ zhɛreke geva kase sha Nde sleke ŋkwa.

Dorkas kazhɛne kanza teghweme

36Kwete male nya keyɛte Yɛsə nya nza sləa kaTabita ya shɛ mbe Zhopɛ. Ma ghena mbe sləa nta le ghena ta ka Grɛk ne, Dorkas, geze ta ŋkɛ, kɛme. Kakwa mcɛlə nde ba'a kaɗa nda wəshi nde ke ka titikwəa kɛfi. 37Pa zereghwe keseve vəa ŋkwa shɛ, mtiwə nde. Ma kwa pɛkɛ ŋkɛ mbeli ne, pa mbeli keleghe ŋkɛ kadzeme cɛ nya mencikə. 38Takwa takwa yɛ Lida le Zhopɛ. Ma kwa fave ka təkwə təkwə Yɛsə mbe Lida Piyɛre ne, pa hɛ ghwenakɛ nda mɛ laka mbeli bake, ma ke hɛ shɛ: «Təhwə təhwə, nde kadzembe meleme ta n'yɛ kahe kahe.» 39Ntəŋə Piyɛre le hɛ te ŋkwa shɛ. Ma kwa ntsehe hɛ ne, pa mbeli begheghe kadzeme cɛ nya pelɛ ghəa cɛa shɛ. Pɛtɛ ka wedidi nyi tagha tseneke nda geva le nehwene, pa hɛ ncɛte nda yɛ tɛagware ba'a lekwesa nyi tsate Dorkas kwa nza nde mba teghweme. 40Pa Piyɛre gezete nda ke mbeli kajive. Pa ŋkɛ gwəɗəŋə kasəkwə ghə. Tewətelɛwe zhɛrete geva laka wəndə kemte mte, ma ke: «Tabita, sate ŋa.» Pa malea shɛ pelakɛ ntsə. Ma kwa nakɛ Piyɛre nde ne, pa nde sate nda mentishɛ. 41Pa Piyɛre keseve ŋkɛ te dzeve ba'a kesakate ŋkɛ. Pa ŋkɛ hekakɛ mbelia Yɛsə ba'a ka wedidi, pa ŋkɛ ncɛte nda ŋkɛ teghweme ke hɛ. 42Nahe pɛtɛa ka Zhopɛ kefave ghena shɛ, kwele kwele nyi keyɛhwe Nde sleke ŋkwa. 43Pa Piyɛre teməakɛ temə kwele kwele mbe Zhopɛ, ki ghɛa Simon nde keɓe hweta.

Currently Selected:

Slene 9: BEK12

Highlight

Copy