Mark 16

Same ta Yɛsə kwa kwele le mpi

(MAT 28.1-8; LWK 24.1-12; ZHŊ 20.1-10)

1Ma kwa nahe veci kezhɛne mpi ne, pa Mari wəzha ta ka Magdala, Mari meghekɛa Zhake ba'a Salomɛ pave 'wərdə kezha dzeme kasheke te geva ta Yɛsə. 2Masheke masheke vəa ŋkwa demase, samema ta veci ne, cape hɛ kadzeme kwele. 3Ma ke hɛ kwelɛ ghəa nci: «Wa nde tepəŋə ɓəmə pelɛ seyi mɛ tse wa?» 4Newe ke hɛ ne, nahe pelɛ nya wəba shɛ kepəŋəmte geva, talɛ ŋwela ŋkɛ. 5Pa hɛ dzawa kwelea shɛ, pa hɛ nakɛ kwete mempɛhweta mentishɛ te kwa zeme mbe gare kwa tɛawetɛa, benake hɛ va ghazlənə. 6Ama ma ke sha hɛ: «Ghazlənəma yɛ ma, Yɛsə nde Nazarɛt yazele yɛ, nya baŋete mbeli te sheghwə kwa zleŋkwa. Nahe ŋkɛ kesame kwa kwele le mpi, mba ŋkɛ teke we. Newe ma mə, wa nya ŋkwa nya se ŋkɛ te nya. 7Kwiɗi mə tsetsenya, geze nda mə ke mbeli nyi ketəkwə təkwə le Piyɛre perə. Mpelɛa tedzawa Galilɛ ŋkɛ ke gheyɛ, kwagha tebegeme yɛ le kala nya gezete ŋayɛ ŋkɛ.»

8Pa hɛ same kwa kwele ba'a hwɛnji cakeɗake le kwele, kabare bare hɛ va ghazlənə. Kese hɛ kageze nda ghena shɛ ke yayata wəndə va nya nza ghazlənə kazhɛ nda ke hɛ we.

Yɛsə kancɛ nda ghə ke Mari wəzha ta ka Magdala

(MAT 28.9-10; ZHŊ 20.11-18)

9Ma kwa same Yɛsə kwa kwele le mpi masheke masheke te vecia demase ne, pa ncɛte nda geva ke Mari wəzha ta ka Magdala, nya ŋkamte 'yi'yɛghwə ŋkɛ mberefaŋe shave mbe kaba. 10Pa nde lə kagezete nda ke mbeli nyi ketəkwə təkwə, teheɗe kema va mbelia shɛhɛ, mbe nehwene hɛ. 11Ma kwa fate hɛ teghweme Yɛsə ba'a nahe nde kenakɛ ŋkɛ ne, kese hɛ kayɛ we.

Yɛsə kancɛ nda ghə ke mbelia ŋkɛ bake

(LWK 24.13-35)

12Kwa sebe ta ŋkɛ, pa Yɛsə ncɛte nda geva ke kweci bake hwa hɛ, le kwete nza tekeleke kwa hweŋkwa hɛ kadzemte. 13Pa hɛ se kagezete nda ke kweci, ama pa hɛ ɗema yɛ shanda.

Yɛsə kancɛ nda ghə ke ka ghwene ta ŋkɛ meŋe kwetɛŋeghəmbe

(MAT 28.16-20; LWK 24.36-49; ZHŊ 20.19-23; SLN 1.6-8)

14Kwa sebe ta ŋkɛ, pa Yɛsə ncɛte nda geva ke ka ghwene ta ŋkɛ meŋe kwetɛŋeghəmbe vəa ŋkwa nya zeme wəsə kezeme hɛ. Pa ŋkɛ ŋelete hɛ va nya ɗema yɛ va hɛ ba'a va nya nza wənəa nci ntɛaŋe ntɛaŋe, kwa ɗema hɛ yɛ ghena ta mbeli nyi kenakɛ nahe ŋkɛ kesame kwa kwele. 15Ma ke sha hɛ: «Kwiɗi mə dzeyi te hɛɗi lema, geze nda mə Ghena kwatenca nya ganyɛ ke mbeli pɛtɛ. 16Ma wəndə nya keyɛte ba'a menete nda batɛme mbeli ne, pələsə tenza ŋkɛ, ama wəndə nya keɗema yɛ, kateve nda geva fete. 17Wa nyi wəshi kencɛ wəshi nyi ketebeghe mbeli nyi keteyɛhwe nyi: Kateŋka 'yi'yɛghwə hɛ te sləa ɗa, kategeze kweci ghena hɛ. 18Katekese shishi hɛ le dzeve ta nci, katesa wəsəa kwamasa hɛ, ama katezhɛ nda nde ke hɛ we, katedape dzeve hɛ kənəa ka zereghwe, katembe hɛ.»

Yɛsə kazhɛne geva kadzeme sha Shala

(LWK 24.50-53; SLN 1.9-11)

19Ma kwa gezemte nda ghena ŋkɛ ke hɛ kala nya ne, cape Nde sleke ŋkwa Yɛsə kadzeme ghweme, ntishɛ ŋkɛ te kwa zeme ta Shala. 20Cape mbeli nyi ketəkwə təkwə kalə kazlape Ghena kwatenca nya ganyɛ dzeyi te yayata ŋkwa. Nahe Nde sleke ŋkwa kemenete slene le hɛ, nahe ŋkɛ kencɛte nda kaganda ta ghena nya zlape hɛ ke hɛ laka wəshi kencɛ wəshi nyi mene hɛ.

Currently Selected:

Mark 16: BEK12

Highlight

Copy