Luka 9
9
‘Ua ‘auina atu e Iesu So‘o e To‘asefulu ma le Lua
(Mata 10.5-15; Mare 6.7-13)
1‘Ua vala‘auina e Iesu ona so‘o e to‘asefulu ma le lua, ma foa‘i atu ‘iā te i latou le mana ma le pule e tutuli ai temoni, ma fa‘amālōlō ma‘i ‘ese‘ese. 2‘Ua ‘auina atu fo‘i e ia i latou e tāla‘i le Mālō o le Atua, ma fa‘amālōlō i ē e mama‘i. 3‘Ua fetalai atu fo‘i o ia ‘iā te i latou, “A ‘outou ō, ‘aua tou te ‘avea se mea e tasi e pei o le to‘oto‘o, po o se taga, po o mea‘ai, po o ni tupe. ‘Aua fo‘i ne‘i lua ni ‘ofu tino o se tasi. 4So o se fale tou te ulu atu i ai, ‘ia ‘outou nonofo ai pea se‘ia o‘o ‘ina tu‘ua e ‘outou lenā ‘a‘ai. 5So o se ‘a‘ai fo‘i ‘e te‘ena ai ‘outou, ‘ia ‘outou tu‘ua loa lenā ‘a‘ai ma tūtū atu i ai le pefu nai o ‘outou vae, e fai ma lapata‘iga ‘iā te i latou.”
6‘Ua ō atu i latou ma ta‘amilo i lea ‘a‘ai, ma folafola le Tala Lelei, ma fa‘amālōlō tagata mama‘i.
O le lē Mautonu o Herota
(Mata 14.1-12; Mare 6.14-29)
7‘Ua fa‘alogo Herota lē pulea Kalilaia i mea uma ‘ua faia, ‘ona matuā lē mautonu ai lea o ia, auā ‘ua fai ane nisi, “ ‘Ua toetū mai Ioane nai ē ‘ua oti.” 8A o isi ‘ua fa‘apea, “O Elia lea ‘ua fa‘aali mai.” A o isi fo‘i ‘ua fai mai, “O se tasi o perofeta anamua lea ‘ua toetū mai.” 9‘Ua fai ane Herota, “Na ‘ou vavae‘eseina le ulu o Ioane, a o ai lenei tagata ‘ua ‘ou toe fa‘alogo atu ai i na mea ‘ua tutupu?” O lea sa fia va‘ai ai o ia ‘iā Iesu.
‘Ua Fafaga e Iesu Tagata e Limaafe
(Mata 14.13-21; Mare 6.30-44; Ioane 6.1-14)
10‘Ua toe fo‘i mai le ‘au ‘aposetolo, ma ta‘u mai ‘iā Iesu mea uma na faia e i latou. ‘Ona ō ai lea na o ia ma ona so‘o i le ‘a‘ai o Petesaita. 11‘Ua fa‘alogo i ai tagata e to‘atele, ‘ona mulimuli atu ai lea o i latou ‘iā te ia. ‘Ua talia i latou e ia ma fetalai atu i ai e uiga i le Mālō o le Atua; ‘ua fa‘amālōlō fo‘i e ia i latou sa fia mālōlō.
12‘Ua lata ‘ina goto le la, ‘ona ō ane ai lea ‘iā te ia o so‘o e to‘asefulu ma le lua, ma fai atu, “ ‘Auina atu ia tagata e ō atu i ‘a‘ai, ma faoa ‘a‘ai o lo‘o latalata mai e mālōlō ai, ma maua ai mea‘ai; auā o le mea tu‘ufua lenei.”
13A ‘ua fetalai atu Iesu ‘iā te i latou, “Avane i ai e ‘outou ni mea‘ai.”
‘Ona tali mai ai lea o i latou, “ ‘Ua na o le lima areto ma i‘a e lua ‘ua mafai ‘ona matou maua. ‘E te finagalo ‘ea ‘ia matou ō e fa‘atau mai ni mea‘ai mo nei tagata uma?” 14E tusa o le to‘alimaafe tane sa i ai.
‘Ua fetalai atu Iesu i ona so‘o, “Fai atu i tagata ia nonofo ta‘ito‘alimasefulu i le vaega.”
15Sa faia fa‘apenā e so‘o. 16‘Ona tago ai lea o Iesu i areto e lima ma i‘a e lua, ‘ua tepa a‘e i le lagi, ‘ua fa‘afetai i le Atua, ‘ona tofitofi ai lea ma avatu i so‘o e tufatufa atu i tagata. 17‘Ua ‘a‘ai i latou uma ma ‘ua mā‘o‘ona, ‘ona fu‘e lea e so‘o o mea na totoe i ‘ato e sefulu ma le lua.
O le Ta‘utinoga a Peteru e Uiga ‘iā Iesu
(Mata 16.13-19; Mare 8.27-29)
18O le isi aso a o tatalo to‘atasi Iesu, na ō ane ai ona so‘o ‘iā te ia. ‘Ona fesili atu lea o ia ‘iā te i latou, “Fai mai e ā tagata e uiga ‘iā te a‘u? O ai a‘u?”
19‘Ona tali atu lea o i latou, “ ‘Ua fai mai nisi o oe o Ioane le Papatiso; o isi, ‘O oe o Elia,’ a o isi fo‘i, ‘O oe o se tasi o perofeta anamua ‘ua toetū mai.’ ”#Mata 14.1-2; Mare 6.14-15; Luka 9.7-8
20‘Ona fetalai atu lea o ia ‘iā te i latou, “A o ‘outou, o le ā la ‘outou ‘upu ‘iā te a‘u? O ai a‘u?”
‘Ona tali atu lea o Peteru, “O oe o le Keriso mai le Atua.”
‘Ua Fetalai Iesu e Uiga i Ona Puapuagā ma Lona Maliu
(Mata 16.20-28; Mare 8.30-9.1)
21‘Ona vavao lea o i latou e Iesu, e ‘aua ne‘i ta‘uina atu lea mea i se tasi. 22‘Ua fetalai atu fo‘i, “E tatau lava ‘ona matuā mafatia le Atali‘i o le Tagata i mea e tele; ‘e te‘ena fo‘i o ia e toeaina ma ositaulaga sili ‘atoa ma a‘oa‘o tulafono. E fasiotia fo‘i o ia, ‘ae toe fa‘atūina mai i lona tolu o aso.”
23‘Ua fetalai atu o ia i tagata uma, “ ‘Āfai e i ai se isi e fia mulimuli mai ‘iā te a‘u ‘aua ne‘i manatu ifo o ia ‘iā te ia lava, a ‘ia ‘ave lona satauro i aso ta‘itasi ma fa‘a‘oa‘o mai ‘iā te a‘u. 24Auā o lē e fia fa‘asaoina lona lava ola, e maumau; a o lē e fa‘amāumāu lona ola ‘ona o a‘u, e fa‘asaoina. 25Auā o le ā ‘ea se mea aogā e maua e le tagata pe ‘āfai na te maua le lalolagi ‘atoa, a e fa‘aumatia o ia ma maumau ai lona ola? 26‘Āfai e ma se isi ‘iā te a‘u ma a‘u a‘oa‘oga, e ma fo‘i ‘iā te ia le Atali‘i o le Tagata pe a sau i lona mamalu, ma le mamalu o le Tamā ‘atoa ma agelu pa‘ia. 27‘Ae ‘ou te ta‘utino atu ‘iā te ‘outou le mea lenei: E i ai nisi o i latou o lo‘o tutū mai nei e lē o‘o i ai le oti, se‘ia latou va‘aia le Mālō o le Atua.”
‘Ua Liua Foliga o Iesu
(Mata 17.1-8; Mare 9.2-8)
28‘Ua ‘atoa le vaiaso talu ‘ona fetalai atu o Iesu i nei mea, ‘ona ‘ave lea e ‘iā Peteru ma Ioane ma Iakopo; ‘ua maliu a‘e i le mauga e tatalo. 29A o tatalo o ia, sa liua ona fofoga; ona ‘ofu fo‘i ‘ua matuā pupula pa‘epa‘e. 30‘Ua fa‘afuase‘i fo‘i ‘ona fa‘atasi mai i ai o tagata e to‘alua, o Mose ma Elia, ma ‘ua talanoa ma ia; 31o i lā‘ua ia na fa‘aalia mai i le mamalu fa‘alelagi. ‘Ua latou talatalanoa ma Iesu e uiga i lona maliu o le a fa‘ataunu‘uina i Ierusalema. 32A ‘ua momoe gase Peteru ma isi so‘o. ‘Ua ala i latou, ‘ona iloa lea e i latou le mamalu o Iesu, ma tagata e to‘alua o ē sa tutū fa‘atasi ma ia. 33‘Ina o le a tu‘ua Iesu e ia lā‘ua, sa fai atu loa Peteru ‘iā te ia, “Le Ali‘i e, ‘ua lelei ‘ona ‘ua matou ‘i‘inei. O le a matou faia ni fale ‘ie se tolu; o le tasi mo oe, o le isi mo Mose, ma le isi mo Elia.” (O le ‘upu moni na te le‘i iloa ana tala sa fai.)
34A o fetalai pea o ia, sa lafoia mai le ata o le ao, ma ‘ua ufitia ai i latou uma; ‘ona matata‘u ai lea o so‘o. 35‘Ona fa‘alogoina ai lea o le si‘ufofoga mai le ao, fai mai “O lo‘u Atali‘i lenā ‘ua ‘ou filifilia, ‘ia ‘outou usiusita‘i ‘iā te ia.”
36‘Ua mavae atu le si‘ufofoga, ‘ona tu mai lea o Iesu, ‘ua na o ia. E le‘i tautala lava se isi o i latou i nei mea uma, pe ta‘u atu fo‘i se tasi i na aso se mea o ia mea na latou va‘ai i ai.
‘Ua Fa‘amālōlō e Iesu le Tama sa i ai le Agaga Leaga
(Mata 17.14-18; Mare 9.14-27)
37O le aso na soso‘o ai na ō ifo ai i latou mai le mauga, ‘ona fetaia‘i lea ma Iesu o tagata e to‘atele. 38‘Ua ‘alaga mai fo‘i se tasi mai tagata ma fai mai, “Le a‘oa‘o e, ‘ou te ‘ai‘oi atu ‘iā te oe, se‘i e alofa mai i lo‘u atali‘i, o si o‘u atali‘i e to‘atasi. 39A osofia o ia e le agaga leaga, ‘ona fa‘afuase‘i lea ‘ona ‘e‘ē, ma fa‘apa‘ū i lalo ma lili, ‘ua fāuā lona gutu, ma ‘ua tu‘i pala ‘iā te ia lava; ‘ua tau lē mafai ‘ona alu ‘ese le agaga leaga mai ‘iā te ia. 40Na ‘ou ‘ai‘oi fo‘i i ou so‘o ‘ina ‘ia latou tuli‘esea le agaga leaga, ‘ae le‘i mafaia e i latou.”
41‘Ona tali atu lea o Iesu, “O ‘outou o tupulaga faigatā ma le lē talitonu! O le ā le umi e tatau ai ‘ona tatou fa‘atasi ma ‘ou fa‘apalepale atu ‘iā te ‘outou?” ‘Ona fetalai atu loa lea o ia i le tagata, “Aumai ia lou atali‘i ‘i‘inei.”
42‘Ua alu ane le tama, ‘ona lafotūina lea o ia i lalo e le temoni, ‘ua ta‘avalevale ma ‘ua lili. ‘Ona vavao atu lea e Iesu le temoni, ma ‘ua fa‘amālōlō i le tama, ‘ona tu‘uina atu ai lea o ia i lona tamā. 43‘Ua matuā ofo tagata uma i le mana silisili ‘ese o le Atua.
‘Ua Toe Fetalai Iesu e Uiga i Lona Maliu
(Mata 17.22-23; Mare 9.30-32)
A o ofo pea i latou i mea uma na faia e Iesu, sa fetalai atu o ia i ona so‘o, 44“ ‘Ia ‘outou matuā mafaufau i mea nei o le a ‘ou ta‘uina atu ‘iā te ‘outou; auā o le a tu‘uina atu le Atali‘i o le Tagata i lima o tagata.” 45‘Ae sa lē iloa e i latou le uiga o lea ‘upu, auā sa lilo ‘iā te i latou, ma ‘ua lē mafai ‘ona latou malamalama i ai. ‘Ae sa fefefe i latou e fesili atu ‘iā te ia e uiga i lea mea.
O Ai ‘Ea e Aupito Sili?
(Mata 18.1-5; Mare 9.33-37)
46Sa tupu se fefinaua‘iga i so‘o, po o ai o i latou e sili. 47‘Ua silafia e Iesu o latou manatu, ‘ona tago ai lea o ia i le tamaitiiti, ‘ua fa‘atū i ona tafatafa. 48‘Ona fetalai atu lea o ia ‘iā te i latou, “O le tagata na te talia le tamaitiiti lenei i lo‘u igoa, ‘ua na talia a‘u; o le tagata fo‘i na te talia a‘u, ‘ua talia e ia lē na ‘auina mai a‘u; auā o lē e aupito itiiti ‘iā te ‘outou uma, e sili lava o ia.”
O Lē e le Tete‘e ‘iā te ‘Outou e ‘au lea ma ‘Outou
(Mare 9.38-40)
49‘Ona fai mai lea o Ioane, “Le Ali‘i e, sa matou iloa le isi tagata o lo‘o tutuli e ia temoni i lou suafa; ‘ona matou vavaoina ai lea o ia, auā e lē o fa‘atasi mai o ia ‘iā i matou.”
50‘Ona fetalai atu lea o Iesu ‘iā te ia ‘atoa fo‘i ma isi so‘o, “ ‘Aua tou te vavaoina o ia, auā o sē e lē tete‘e mai ‘iā te ‘outou, e ‘au o ia ma ‘outou.”
‘Ua Lē Talia Iesu i se isi Nu‘u o Samaria
51‘Ua latalata i ona po e si‘itia ai Iesu, ‘ona tonu ai lea i lona finagalo o le a malaga loa i Ierusalema. 52‘Ua ‘auina atu fo‘i e ia nisi e muamua atu i ona luma, ‘ona o lea o i latou ma afe i le isi nu‘u o Samaria, e sauni ai mea uma mo ia. 53A o tagata o lea nu‘u ‘ua latou le talia o ia, auā ‘ua latou iloa lelei o lana malaga e aga‘i atu i Ierusalema. 54‘Ua iloa lenei mea e ona so‘o o Iakopo ma Ioane, ‘ona fai ane lea o i lā‘ua, “Le Ali‘i e, ‘e te finagalo ‘ea ma te fai atu ia alu ifo le afi mai le lagi e fa‘aumatia ai i latou?”
55A ‘ua fāliu Iesu ma a‘oa‘i atu ‘iā te i lā‘ua. 56‘Ona ō atu ai lea o i latou i le isi nu‘u.
O ē o le a Mulimuli ‘iā Iesu
(Mata 8.19-22)
57‘Ua ō atu i latou i le ala, ‘ona fai ane ai lea o le isi tagata ‘iā Iesu, “O le a ‘ou mulimuli atu ‘iā te oe i so o se mea ‘e te maliu atu i ai.”
58A ‘ua fetalai atu Iesu ‘iā te ia, “E i ai lua o alope, e i ai fo‘i moega o manu felelei, a o le Atali‘i o le Tagata e leai se mea e moe ai o ia.”
59‘Ua fetalai atu o ia i le isi tagata, “Mulimuli mai ia ‘iā te a‘u.” A ‘ua fai mai o ia, “Le Ali‘i e, tu‘u mai ia se‘i ‘ou alu muamua e tanu lo‘u tamā.”
60‘Ua tali atu Iesu ‘iā te ia, “Tu‘u pea ia ē ‘ua oti e tanu e o latou tagata oti. ‘Ae alu oe e tāla‘i le Mālō o le Atua.”
61‘Ua fai mai fo‘i le isi tagata, “Le Ali‘i e, ‘ou te mulimuli atu ‘iā te oe, ‘ae tu‘u mai ia se‘i ‘ou fa‘amavae muamua i lo‘u ‘āiga.”
62‘Ua fetalai atu Iesu ‘iā te ia, “So o se isi lava ‘ua amata ‘ona galue i le suōtosina ‘ae tepa pea i tua, e lē aogā o ia i le Mālō o le Atua.”
Currently Selected:
Luka 9: SCNT
Highlight
Share
Copy
Want to have your highlights saved across all your devices? Sign up or sign in
Samoan Contemporary New Testament © Bible Society of the South Pacific, 2009.
