wandījo 14

Abulamu kūnguna Lutu

1Ū mu shikū jenījo, ntemi Amulafeli wa Shinaali, na Alioki ntemi wa Elasa, na Kedolaoma ntemi wa Elamu, hamò na Tidali ntemi wa Goyimu, 2bakamba būlūgū kwilwisha na ntemi Beela wa Sodoma, na Bilisha ntemi wa Gomola, na Shinabi ntemi wa Adima, na Shemeba ntemi wa Zeboyimu, hamò na ntemi wa Bela (h'ī Zoa). 3A batemi benaba ū wa Sodoma, wa Gomola, wa Adima, wa Zeboyimu, nū wa Bela būgasangūlīla a mabità gabo, būūkihela mu sī ya ntubīlo gwa Sidimu (h'ī Nyanza ya Munhu). 4Baalī ha sīlīlī ya būsugi bo ntemi Kedolaoma, būshisha myaka ikūmi n'ībīlī bakūntūmamīlaga, alīyo ū mu ng'waka gw'ikūmi n'idatū būngomela.

5Ū mu ng'waka gw'ikūmi n'īnè, ū ntemi Kedolaoma na a batemi abo walī wiyigwile nabo būja kwilwisha būlūgū na a banishi babo būbapyena, Balefaimu būbapyenela Ashiteloti-kanaimu, Bazuzimu būbapyenela Hamu, Baemimu būbapyenela Shaveni-kiliataimu, 6hamò na Bahooli, a bene būbapyenela mu sī ya magūlya ya Seili; būūkashika na Eli-palani, kūjīlīīla kw'itogolo lītī na banhū. 7Hūna būgalūka, būbasanga bana Eni-mishipati (h'ī Kadeshi); būyīpyena pyī ī sī ya Baamaleki, na a Baamoli abo bikalaga mu Hazezoni-tamali.

8Nabo a batemi ba Sodoma, Gomola, Adima, Zeboyimu, nū wa Beela (h'ī Zoa) būkuminga mabità gabo. Būbūūka bajile kū sī ya ntubīlo gwa Sidimu, būūkamba būlūgū 9kwilwisha nū Kedolaoma ū ntemi wa Elamu, nū Tidali ū ntemi wa Goyimu, nū Amulafeli ū ntemi wa Shinaali, hamò nū Alioki ū ntemi wa Elasa, batemi bane benabo kwilwisha na batanò. 10Ū mu sī ya ntubīlo ī ya Sidimu, gaalīho machongo mingī ga laami; na lūūlū aho baheewa a batemi ba Sodoma na Gomola, bahayūpeela bamò ba banhū babo būyūgwīla ū mu machongo genayo, bangī būpeelela kū ngūlū. 11A bapyeni būshisola pyī ī shikolo sha bana Sodoma na a bana Gomola, nī shilīwa shabo būduta bajile. 12Nū Lutu, ū ng'witūnja wa nzunaye wa ng'wa Abulamu būnsola, hamò nī sabo jakwe, nguno wikalaga mu Sodoma.

13Ūmò wa banhū abo bakapūlūgūka wiza ū kūlī Abulamu ū Ng'hebulania, aho washika ūng'winha ī yenīyo. Ī kaya ya ng'wa Abulamu ī shikū jenījo yalī hihī na mitī ya ng'wa Mamule muna Amoli, ndūgūye wa ng'wa Eshikoli na Aneli; a bose baalī banwani biye ū Abulamu. 14Ū Abulamu aho wigwa gīkī ū ndūgūye wadimagwa nding'wa, ūsolanhya bagosha ba mbagashūūla magana adatū n'ikūmi na banaane (318), ba kūbyalīlwa ha kaya yakwe; pye baalī balangilwe kalwīīle ka būlūgū. Ūkūūbīja kūshisha ipandī lya Dani. 15Mu makanza ga būjikū ū Abulamu ūbagaba a banhū bakwe mu magele, hū būbadumīla a banishi, būbaheeba būpeela. Būbakūūbya kūshisha Hoba, sukuma ya Damasko. 16Ūshipīja pyī ī shikolo īsho shalī shasolwa; ūnshosha nū ndūgūye ū Lutu, nī sabo jakwe, hamò na a bakīma, na a banhū a bangī.

Melikizedeki na Abulamu

17Ū Abulamu aho washoka kūfuma ū kū būlūgū ūbo akampyena ntemi Kedolaoma hamò na a batemi abo walī wiyigwile nabo, ū ntemi wa Sodoma ūja kwibona nang'hwe, ūnsangīla mu mbūga ya Shave (makūlū gaho sī ya ntemi). 18Melikizedeki, ntemi wa Salemu,#14:18 Salemu: H'ī Yelusalemu. nang'hwe wiza, ū ng'wene wenha migatī na divai. Ū wei walī ngabīji wa ng'wa Mulungu ūyo alī Higūlya no. 19Hūna lūūlū aho washika ūmfuuha ū Abulamu, alīhaya gīkī,

“Ū Abulamu īīlūkīlwe mbango

na Mulungu ūyo alī Higūlya no,

ū Nseemi w'igūlū na sī.

20Nīyo akumīlījiwe ū Mulungu

Ūyo alī Higūlya no,

ūyo wabatūūlile a banishi bako

mu nkono gwako.”

Hūna ū Abulamu ūng'winha īmò ya ng'wikūmi ya shikolo shose. 21Ū ntemi wa Sodoma ū ng'wene ūng'wīla ū Abulamu gīkī, “Ninhage nene a banhū, ū bebe ūtwale ī shikolo.” 22Alīyo ū Abulamu ūng'wīla ū ntemi wa Sodoma gīkī, “Ū nene naamalile kūlahīla kūlī SEEBA, ū Mulungu ūyo alī Higūlya no, ū Nseemi w'igūlū na sī. 23Naahayile gīkī natūdūla kwanukūla shikolo shako shose shose, yaya nūūlū kalūgoye, nūūlū ni katungījo ka shilaatū dūhū yaya gete; ūtizūpandīka nzīla ya kūhaya gīkī, ‘Nansabije ū Abulamu.’ 24Natanukūlaga shose shose, ūlū ītī īsho baalyile dūhū a banhū bane, nī shisho bigeleelilwe kwanukūla a banhū abo baalī baajile hamò nane, a ba Aneli, Eshikoli, na Mamule; a bene ni basolage īsho baanogelile.”

Currently Selected:

wandījo 14: SUKBI15

Highlight

Copy