wandījo 21

Kūbyalwa kwa ng'wa Isaka

1Ū SEEBA ūngeniha ū Saala gīt'umo walī wang'wisagīgīja; na ng'hana ū SEEBA ūng'wītīla ū Saala ūmo walī wisagīgīja. 2Hūna ū Saala ūbūūcha nda, ūmyalīla ū Abulahamu ng'wana ngosha mu būnamhala bokwe, ng'wikanza īlo Mulungu walī wang'wīla. 3Nang'hwe ū Abulahamu ūng'wilīka ī lina lya Isaka ū ng'wana ūyo Saala akamyalīla. 4Ū Abulahamu ūnsaala ū ng'witūnja wakwe ū Isaka aho washisha shikū inaane, gīt'umo Mulungu walī wanagīīlīla. 5Ū Abulahamu walī na myaka igana (100) aho alībyalwa ū ng'witūnja wakwe ū Isaka. 6Ū Saala ūhaya, “Ū Mulungu wanenhelile seko, na būlī ng'wene ūyo alagwigwe ū mhayo gwenūyū akūseka hamò nane.” 7Ongeja hangī kūhaya, “Nani ūyo walī ashikile kūng'wīla Abulahamu gīkī, ‘Nū Saala adūgije konhya baana?’ Alīyo ī haha angū ūūyū namyalīla ng'wana ngosha mu būnamhala bokwe!”

Haagali na Ishimaeli kwīnjiwa

8Ū nīgīnī ūkūla kūshisha ūgijiwa; ū mu lūshikū lwa kūgijiwa, ū Abulahamu akabeeja shigukulu shitaale. 9Alīyo ū Saala ūbona gīkī ū ng'witūnja ūyo Haagali muna Misili walī wamyalīla ū Abulahamu, alī n'ibengwe. 10Hūna ūng'wīla ū Abulahamu gīkī, “Ng'wīnjage a henaha ū nsese ng'wenūyū nū ng'wtūnja wakwe; nguno ū ng'witūnja wa nsese ng'wenūyū atīko kūbiza na wingīji hamò nū ng'witūnja wane ū Isaka.” 11Ū mhayo gwenūyo gūkankoya no ū Abulahamu, kūlwa nguno ya ng'wana wakwe. 12Alīyo ū Mulungu ūng'wīla gīkī, “Ūtakoyage no kūlwa nguno ya ng'witūnja wako nū nina.#21:12 Nina: Nūūlū ū nsese wako nkīma. Ū Saala ng'wigwage mu yose īyo alīkūwīla; nguno ū būbyīle wako būkūbalwa kūbītīla mulī Isaka. 13Nū būbyīle wa ng'witūnja wa nkīma ū nsese, nakūwīta kūbiza ihanga, guno nang'hwe ng'witūnja wako.” 14Kū ntondo yaho ū Abulahamu wipuuna dilū, ūsola shilīwa na minzī ng'wibūūkījo,#21:14 Ng'wibūūkījo: Nūūlū mhīnda; babeejaga mhīnda ja ndīlī kūlwa kūtūūlīla minzī, mabeele nūūlū walwa (divai). ūng'winha ū Haagali ūshibūūcha; hūna ūnshindīkīla. Ū Haagali ūbūūka ajile alī hamò nū nyanda; ūja akūyūngaga hose hose ng'witogolo lya Beeli-sheba.

15A minzī gūshila ū ng'wibūūkījo al'ū ng'witogolo ng'wenūmo; ūntūūla ū nyanda mu mbeho y'isaka līmò lyaho. 16Hūna ū wei wīnga ho ūkigasha kakūle, gītī bū kūle bo kūluuta kawe, wandya kūlīla ng'hūngū; kūnū akwiwīlaga wei ng'wenekīlī gīkī, “Natūdūla ū kūng'wiloleela ū nyanda alīshilīlīkīīla kūcha!” 17Ū Mulungu ūng'wigwa ū nyanda alīlīla, hūna Malaika wa ng'wa Mulungu ūng'witana ū Haagali kūfuma ng'wigūlū, ūng'wīla gīkī, “Haagali ūlīkoyiwa kī? Ūtoogohage; ū Mulungu wang'wigwaga ū nyanda ūmo alīlīlīla aho alambalalile henaho. 18Jaga ūkandime ū nkono gwakwe ū nyanda, ūngūngūmūle; nguno nakūng'wīta kūbiza ihanga itaale.” 19Hūna ū Mulungu ūgakundūlīla a miso gakwe, ūbona itaba lya minzī; ūja ho ūkalyokaja minzī ī libūūkījo lyakwe, wiza ūng'winha ū nyanda ūng'wa. 20Ū Mulungu walī hamò nū nyanda ng'wenūyo, kūshisha ūkūla. Akabiza ng'wikaji wa ng'witogolo, ū nīmo gwakwe gwalī būlasi; 21Ūyikala ng'witogolo lya Palani, ū nina ūja Misili ūkankoobela nkīma ūtoola.

Abulahamu na Abimeleki kwiyilahīlīla

22Ū mu shikū jenījo, ū Abimeleki hamò na Pikoli, ūyo walī ntaale wa bashilikale bakwe, būng'wīla ū Abulahamu gīkī, “Ū bebe ū Mulungu alī hamò nang'ho mu yose īyo ūkwītaga. 23Na lūūlū nilahīlīlage kū būtongi bo ng'wa Mulungu, gīkī ūtalizūniiboneela mu mhayo gose gose, ū nene ng'wenīkīlī na a baana bane, nū būbyīle wane ūbo būkwiza ha numa yane. Ūmo naakwītīlile yawiza ū bebe, nū nene nīītīlage gīko, pyī nī sī yane, ūmo ūkwikalaga gītī nobeji.” 24Nang'hwe ū Abulahamu ūhaya, “Nalīkūlahīlīla.” 25Hūna ū Abulahamu wibūūla ū kūlī Abimeleki kūlwa lwinzī lwakwe ūlo batūmami ba ng'wa Abimeleki baalī balwidaatya. 26Alīyo ū Abimeleki ūhaya, “Ū nene natandeebile ūyo wagwīta ū mhayo gwenūyū, walī ūtaalī kūniwīla; lelo hū naagwigwa.” 27Na lūūlū ū Abulahamu wenha ng'holo na ng'ombe wiza ūng'winha ū Abimeleki; ī likanza lyenīlo a banhū benabo biyilahīlīla. 28Ū Abulahamu ūkomanya ndogoosa mpungatī ja ng'holo kūfuma ū ng'widaale, 29Ū Abimeleki ūmūja gīkī, “Ī ndogoosa ja ng'holo ī mpungatī jenīji wajikomanya, ja mbika kī?” 30Ū Abulahamu ūnshokeja, “Ī ng'holo mpungatī jenīji jafumaga mu nkono gwane, janukūlage kūlwa būkanhīji gīkī hū nene naalūsīmba ū lwinzī lwenūlū.” 31Na lūūlū ī lipandī lyenīlo litanwa Beeli-sheba, kūlwa nguno a banhū benabo bakiyilahīlīla a henaho. 32Aho bamala ū kūlagana ū mu shilahīlo shenīsho, ū Abimeleki nū Pikoli, ū ntaale wa bashilikale, būshoka kū sī ya Bafilisti. 33Ū Abulahamu ūhamba nshishi ī Beeli-sheba; a henaho ūlīkumīlīja ī lina lya ng'wa SEEBA, ū Mulungu wa welelo na welelo. 34Ū Abulahamu akashinga shikū ningī ū mu sī ya Bafilisti.

Currently Selected:

wandījo 21: SUKBI15

Highlight

Copy