wandījo 23

Kūcha kwa ng'wa Saala

1Ū mu būlamu bokwe ū Saala, akashisha myaka igana na makūmi abīlī na mpungatī (127); 2hūna ūcha, balī Kiliati-alaba (h'ī Hebuloni) mu sī ya Kanaani; ū Abulahamu akalīla no, alīnīla ū Saala. 3Hanuma y'ikanza ū Abulahamu ūbūūka, wīnga aho wanīlīlaga ū nke, ūūkahooya na Bahītī.#23:3 Bahītī: Bitūnja ba ng'wa Heti (Lola na Ng'hī. 5,7,10,16,18 na 20). 4Ūhaya, “Ū nene nalī nshimīzi, nizile kwikala mu sī ying'we; nijingījagi ipandī lya sī a henaha, napandīke ha kūnjīka ū nke wane ūyo wazumalīkaga.” 5A Bahītī būnshokeja ū Abulahamu gīkī, 6“Baba tūdegelekage; gīkī ū bebe ūlī munhū ntaale no ū mu bise, ū ng'wenūmu tūlī na mapandī gise gawiza no, ūmo tūkajīkīlaga; njīkage dūhū ng'wenūmo ū munhū wako. Atīho nūūlū ūmò ū mu bise wa kūkwima ipandī lya kūjīkīla, nūūlū wa kūkūlemeja ūtizūnjīka ū munhū wako.” 7Ū Abulahamu ūbūūka, winama n'ikūjo ū kū būtongi wa banhū ba mu sī yenīyo, a Bahītī. 8Ūbawīla, “Ūlū mulīzunya nanjīke ū munhū wane, nidegelekagi. A bing'we nilombelagi ū kūlī Efuloni, ū ng'wana Zohali; 9anijingīje ī lipilinga lyakwe ī lya Makipela, īlo līlī kū mhelo y'ilaale lyakwe. Nīyo anijingīje mu mpango gwalyo gete ūmo gūlī, nane nabize n'ipandī ū mu bing'we, lyane nane lya kūyūjīkīla.” 10Ū Efuloni ū Ng'hītī, nang'hwe walī igashije hamò nabo a banhū ba lūganda lwakwe; hūna ūnshokeja ū Abulahamu, badegelekile pye a Bahītī abo baalī biza a ha mita gwa nzengo. 11Ūhaya gīkī, “Ali lūūlū baba, niigwage gete; nalīkwinha ī lilaale nī lipilinga īlo līlīmo, nalīkwinha mu būtongi wa banhū bane aba; njīkage ū munhū wako.” 12A henaho ū Abulahamu winama hangī ū kū būtongi wa banhū ba sī yenīyo. 13Ūng'wīla ū Efuloni, pye badegelekile; ūhaya gīkī, “Baba niigwage, ūlū ūlīzunya, ū nene nakwinhe ī sabo ya kūlenganīla nū mpango gwalyo ī lilaale lyenīlo; anukūlaga naje nakanjīke ū munhū wane.” 14Ū Efuloni ūnshokeja ū Abulahamu alīhaya, 15“Baba nidegelekage; ū mpango gw'ilaale gūlī shekeli magana anè ja feza, ī shenīsho nasho shikolo kī a ha gatī yako nū nene? Solaga baba ūnjīke ū nyagi#23:15 Nyagi: Munhū ūyo azumalīkile, nūūlū mfu. wako!” 16Ū Abulahamu ūgūzunya ū mpango gwa ng'wa Efuloni, ūmpimīla ū būdito wa sabo īyo akīhaya; ūng'winha kū būtongi wa Bahītī. Jalī shekeli magana anè ja feza, kūlenganīla nū būdito ūbo botūmamīlagwa na basūlūja ū mu shikū jenījo.

17Na lūūlū ī lilaale lya ng'wa Efuloni īlo lyalī Makipela ya Mamule, lyūlolwa chiza ī mbīmbī jalyo ūmo jalī jigelelile; ī lilaale lyenekīlī lyūmanīka, nī lipilinga īlo lyalīmo, pyī nī mitī īyo yalī īzwile moi. 18Hūna lyūtūūlwa mu makono ga ng'wa Abulahamu, kū būtongi wa Bahītī, pye abo baalī biza a ha mita gwa nzengo. 19Hanuma ya henaho ū Abulahamu ūnjīka ū nke wakwe ū Saala, ū ng'wipilinga īlo lyalī ng'wilaale lya Makipela hihī na Mamule (ya Hebuloni) mu sī ya Kanaani. 20A Bahītī būbiza balītūūla mu makono ga ng'wa Abulahamu ī lilaale lyenīlo nī lipilinga lyamo, lībize ipandī lyakwe lya kūjīkīla banhū.

Currently Selected:

wandījo 23: SUKBI15

Highlight

Copy