wandījo 5
5
Kwandīja kūlī Adamu kūshisha kūlī Noa
1Īyī yene mihayo ya kwihela kwa shibyalīlwe sha ng'wa Adamu. Ū Mulungu aho wanseema ū munhū, akaameeja mu suso yakwe wei ng'wenīkīlī. 2Ūbaseema ngosha na nkīma; aho wamala kūbaseema ūbafuuha, ūbinha lina lya munhū. 3Ū Adamu aho washisha būlamu bo myaka igana na makūmi adatū (130), ūbyala ng'wana ngosha wa kūng'wikola we, mu suso yakwe; ī lina lyakwe ūng'wilīka Seti. 4Kūfuma a ha kūbyalwa kwa ng'wa Seti, ū Adamu akikala ho myaka magana anaane (800); ūbyala na bitūnja bangī, hamò na bashīke. 5Ī myaka ya būlamu bo ng'wa Adamu ī yose yalī magana kenda na makūmi adatū (930), hūna ūcha. 6Ū Seti aho washisha myaka igana n'ītanò (105), ūmyala Enoshi. 7Kūfuma a ha kūbyalwa kwa ng'wa Enoshi, ū Seti akikala ho myaka magana anaane na mpungatī (807). Ūbyala na bitūnja bangī, hamò na bashīke. 8Ī myaka ya būlamu bo ng'wa Seti ī yose yalī magana kenda n'ikūmi n'ībīlī (912), hūna ūcha. 9Ū Enoshi aho washisha myaka makūmi kenda (90), ūmyala Kenani. 10Kūfuma a ha kūbyalwa kwa ng'wa Kenani, ū Enoshi akikala ho myaka magana anaane n'ikūmi n'ītanò (815). Ūbyala na bitūnja bangī, hamò na bashīke. 11Ī myaka ya būlamu bo ng'wa Enoshi ī yose yalī magana kenda n'ītanò (905), hūna ūcha. 12Ū Kenani aho washisha myaka makūmi mpungatī (70), ūmyala Mahalaleli. 13Kūfuma a ha kūbyalwa kwa ng'wa Mahalaleli, ū Kenani akikala ho myaka magana anaane na makūmi anè (840). Ūbyala na bitūnja bangī, hamò na bashīke. 14Ī myaka ya būlamu bo ng'wa Kenani ī yose yalī magana kenda n'ikūmi (910), hūna ūcha. 15Ū Mahalaleli aho washisha myaka makūmi atandatū n'ītanò (65), ūmyala Yaledi. 16Kūfuma a ha kūbyalwa kwa ng'wa Yaledi, ū Mahalaleli akikala ho myaka magana anaane na makūmi adatū (830). Ūbyala na bitūnja bangī, hamò na bashīke. 17Ī myaka ya būlamu bo ng'wa Mahalaleli ī yose yalī magana anaane na makūmi kenda n'ītanò (895), hūna ūcha. 18Ū Yaledi aho washisha myaka igana na makūmi atandatū n'ībīlī (162), ūmyala Enoka. 19Kūfuma a ha kūbyalwa kwa ng'wa Enoka, ū Yaledi akikala ho myaka magana anaane (800). Ūbyala na bitūnja bangī, hamò na bashīke.
20Ī myaka ya būlamu bo ng'wa Yaledi ī yose yalī magana kenda na makūmi atandatū n'ībīlī (962), hūna ūcha. 21Ū Enoka aho washisha myaka makūmi atandatū n'ītanò (65), ūmyala Matusela. 22Kūfuma a ha kūbyalwa kwa ng'wa Matusela, ū Enoka ūmala myaka magana adatū (300) akūshimīzaga hamò na#5:22 Hamò na Mulungu: Nūūlū, mu kūng'wigwa Mulungu. Mulungu. Ūbyala na baana bangī bagosha na bakīma. 23Ī myaka ya būlamu bo ng'wa Enoka īkabiza magana adatū na makūmi atandatū n'ītanò (365). 24Ū mu shimīzīle yakwe ū Enoka wikalaga hamò na Mulungu, hūna kwimanīla oya ū kwilonga, nguno ū Mulungu akansola. 25Ū Matusela aho washisha myaka igana na makūmi anaane na mpungatī (187), ūmyala Lameki. 26Kūfuma a ha kūbyalwa kwa ng'wa Lameki, ū Matusela akikala ho myaka magana mpungatī na makūmi anaane n'ībīlī (782). Ūbyala na bitūnja bangī, hamò na bashīke. 27Ī myaka ya būlamu bo ng'wa Matusela ī yose yalī magana kenda na makūmi atandatū na kenda (969), hūna ūcha. 28Ū Lameki aho washisha myaka igana na makūmi anaane n'ībīlī (182), akabyala ng'wana ngosha; 29Ūng'wilīka ī lina lyakwe Noa; ūhaya gīkī, “Akūtūlūngūja ū mu katūmamīle kise nū būdito wa milīmo ya makono gise, īyo tūlī nayo kūlwa makoye ga sī īyo SEEBA wīzuma.” 30Kūfuma a ha kūbyalwa kwa ng'wa Noa, ū Lameki akikala ho myaka magana atanò na makūmi kenda n'ītanò (595). Ūbyala na bitūnja bangī, hamò na bashīke. 31Ī myaka ya būlamu bo ng'wa Lameki ī yose yalī magana mpungatī na makūmi mpungatī na mpungatī (777), hūna ūcha. 32Ū Noa aho washisha myaka magana atanò (500), ūbabyala ba Shemu, Hamu na Yafeti.
Currently Selected:
wandījo 5: SUKBI15
Highlight
Share
Copy
Want to have your highlights saved across all your devices? Sign up or sign in
Sukuma Bible © Bible Society of Tanzania, 2019.
