Yohana 2

Ihano lya kwandya

1Ha lūshikū lo kadatū lwaho, shikabiza ho shigukulu sha būkwīlīma mu Kana ya Galilaya; nū nina wa ng'wa Yesu walīko. 2Nū Yesu walīko hamò na a bahemba bakwe, nguno baalī balaalīkwa. 3Bahayimanīla yashila ī mvinya; hūna ū nina ūng'wīla, “Bamala ī mvinya!” 4Nang'hwe ū Yesu ūng'wīla gīkī, “Mayū nilekage ū nene, ī likanza lyane lītaalī ū kūshika!” 5Ū nina ūbawīla a batoneeji gīkī, Ūlū alamuwīle mhayo gose gose gwītagi.” 6Jikasangwa jilīho hoi nno itandatū ja mawe, ja kūtūūlīla minzī ga kūmanooja mhambala, ūmo shalī shīmīle sha Bayudaya. Būlī lūnno lwalī lūshikile kokala ngelo itanò nūūlū mpungatī. 7Hūna ū Yesu ūbawīla gīkī, “Jokajagi minzī ī nno.” Būjokoja pa pa pa. 8Ha numa ya henaho ūbawīla hangī, “Dahagi magehu lūūlū muntwalile ū ntaale wa shigukulu!” Ng'hana būntwalīla. 9Ū ntaale wa shigukulu aho wagaloja a minzī genayo, ūbona gīkī īlī mvinya; gwike ūjimīīlwa ūko yafumaga, alīyo a batoneeji abo baalī bagadaha a minzī baalī bamanile. Hūna ū ntaale wa shigukulu ūng'witana ū ntooji. 10Ūng'wīla gīkī, “Pye a banhū bakatengaga tame ī mvinya ī nonu; ūlū būng'wa a banhū bigeja, nūūlū ūlīyīfunya lūūlū nī yīyo īchile shi! Hama ū bebe nibūlī wībīkaga ī mvinya ī nonu, nose gashika makanza aya?” 11Ū wenūbo walī wandījo wa shimanīkījo īsho Yesu akabeeja mu Kana ya Galilaya; shoolecha ikūjo lyakwe, a bahemba bakwe būnsanya. 12Aho yabīta ī yenīyo ū Yesu akaja Kapelanaumu; nū nina na a baana ba ng'wawe būja koi, hamò na a bahemba bakwe, gwike batikalile ko shikū ningī.

Kwejiwa kwa hekalu

13Hūna lūūlū aho yegeela kūshika pasaka ya Bayudaya, ū Yesu ūlinha kūja Yelusalemu. 14Ūkasanga balīmo ū mu hekalu basūlūja ba ng'ombe na ng'holo na mhunda, na bakaabanya ba hela bigashaga. 15Ūsola ngoye ūbeeja mbooko, wandya kūbapeeja pyini ī ng'holo nī ng'ombe jūfuma ū mu hekalu; nī meza ja bakaabanya ba hela ūjisalingūla, ūbitagūja ī hela jabo. 16A bajinja ba mhunda ūbawīla, “Gīnjagi a genaya ū ng'wenūmu, ī numba ya ng'wa Baba mutīgalūchage kūbiza ya basūlūja!” 17A bahemba bakwe būgwizūkwa ūyo gwandīkilwe; gīkī, “Būkūnilya ū wilu kūlwa numba yako.” 18Hūna lūūlū a Bayudaya būnshokeja būng'wīla, Ūlītoolekeja shimanīkījo kī, ī gīkī ū bebe wigeleelilwe kuyīta pyī ī yenīyī?” 19Nang'hwe ū Yesu ūbashokeja ūbawīla, “Īsambagūlagi ī hekalu īyī, nane nakwīyīmīlīja hangī mu shikū idatū.” 20A Bayudaya būng'wīla, “Mm! Ī Hekalu īyī yashishaga myaka makūmi ane n'ītandatū īkūzengagwa, ū bebe hū wīyīmīlīje mu shikū idatū dūhū!” 21Gwike ū wei ohayaga hekalu ya mīlī gokwe. 22Ū Yesu aho wajūūchiwa kūfuma mu bafu, a bahemba bakwe bizūkwa gīkī walī wagūhaya ū mhayo gwenūyo, būshisanya ī shandīkwa, pyī nī mihayo īyo wīhayaga ū Yesu.

Abamanile hape pye a banhū

23Aho alī mu Yelusalemu kūlwa nguno ya shigukulu sha pasaka, bingī bakalīzunya ī lina lyakwe aho bashibona ī shimanīkījo īsho wabeejaga. 24Alīyo ū wei ng'wenekīlī ū Yesu, walī atīītaga mhayo mu kwiyoolecha gīkī babone bansanye, nguno ū wei walī abamanile hape pye a banhū. 25Nose yalī ītīho nguno ya kūng'wīla mihayo ya ng'wa munhū ose ose, īkī ū wei walī amanile īsho shilī mu gatī ya ng'wa munhū.

Currently Selected:

Yohana 2: SUKBI15

Highlight

Copy