Хосталыышкын 12

Хосталыышкын болгаш Хаарган далганнар байырлалдары

(Лев. 23:5-8; Сан. 28:16-25; Ы. х. к. 16:1-8)

1Дээрги-Чаяакчы египет черге Моисей биле Ааронга мынча деп чугаалаан: 2«Бо ай силерге өске айларның башкылыы, чылдың бирги айы болзун. 3Бүгү израиль ниитилелге мону чугаалаңар. Бо айның онгу хүнүнде кижи бүрүзү бодунуң өг-бүлезинге бир анай-хурагандан шилип алзын. 4А өг-бүледе улус эвээш, бүдүн мал эъдин чаңгыс угда чип шыдавас болза, чоогунда чурттап турар кожазы-биле кады, эът чиир кижилерниң санын барымдаалап, шуптузунга четчир кылдыр анай-хураганны шилип алзын. 5Ол мал четпес-дудуу эвес, бир харлыг эр мал болур ужурлуг, хой-даа, өшкү-даа мал төлү болза ажырбас. 6Ол мал силерге бо айның он дөртке чедир кадагалаттынып турзун#Сан. 9:10-11, а он дөртте кежээки имир дүжерге, израильчилерниң бүгү ниитилели анай-хураганнарын дөгерер ужурлуг. 7Оон оларның ханын узуп алгаш, ол эътти чиири бажыңнар эжиктериниң ийи кастыын база кырыкы доора ыяжын ооң-биле чаап алзыннар.

8Ол дүне анай-хураганның эъдин отка хааргаш, ажыткы-биле хөөтпейн хаарган далганнар-биле болгаш ажыг оът холуу-биле кады чизиннер. 9Чедир хаарбаан азы сугга хайындырган мал эъди чивеңер, а отка бажы, хол-буттары база ишти-хырны-биле катай бүдүнге хаарып чиңер. 10Ол дүне-ле эъттиң дөгерезин чиптиңер, а эртенге чедир артып калган кезээн өрттедиптиңер. 11Анай-хураганның эъдин чиирде, бүрүнү-биле кеттинип, куруңар куржанып, идииңер кедип алгаш, даянгыыжыңар тудуп алгаш, чиңер – ол дээрге Дээрги-Чаяакчыга бараалгаткан Хосталыышкын байырлалының аъш-чеми-дир#12:11, 27 Хосталыышкын байырлалы, Хосталыышкын өргүлү – еврей дылда «песах» дээн сөс. Бо сөс «пасах» – «оюп эртер» дээн кылыг сөзүнден укталган (13, 23, 27 шүлүктерни көр). . 12Мен бо дүне египет черни өттүр таварып эрткеш, Египетте бар кижилерниң-даа, мал-маганның-даа дун төлдериниң дөгерезин чок кылып каар мен база Египеттиң бүгү бурганнарын шиидип, кеземче көргүзер мен#Сан. 33:4. Мен – Дээрги-Чаяакчы-дыр мен! 13Силерниң чурттап турар бажыңнарыңар эжиинде чагган хан тускай демдек болур: ону көрүп кааш, силерни оюп эрте бээр мен, Египеттиң чонун чылча шаап турумда, ол өлүмнүг халап силерге хора чедирбес.

14Шак бо хүн силерге тураскаалдыг болзун, бүгү салгалдарыңарга ол хүннү Дээрги-Чаяакчы дээш байырлал кылдыр байырлазын. Силерге кезээ мөңгеде доктааткан кылдыр байырлаңар. 15Чеди хүн дургузунда ажыткы-биле хөөтпейн хаарган далгандан чиңер; бирги хүнде-ле бажыңнарыңарга турган ажыткының шуптузун үндүр октаптыңар, бирги хүнден чедиги хүнге чедир ажыткылыг аъш-чем чиир кижи израиль чоннуң аразынга амылыг артпас. 16Бирги база чедиги хүнде силерге ыдыктыг чыыштар болуп эртсин: ол хүннерде кандыг-даа ажыл кылбаңар, чүгле кижи бүрүзүнге херек аъш-чемни белеткеп болур силер. 17Далганнар байырлалын утпайн сагыңар, Мен ол хүнде силерниң чурум-чыскаалдыг бөлүктериңерни египет черден үндүрүп эккелген турар мен. Шак ол хүннү силерниң бүгү салгалдарыңар утпайн чорзун, ол дээрге кезээ мөңгеде доктааткан дүрүм-дүр. 18Бирги айның он дөрткү хүнүнүң кежээзинден эгелээш, чээрби бирги хүнүнүң кежээзинге чедир ажыткы-биле хөөтпейн быжырган далган чиир силер. 19Чеди хүн дургузунда бажыңнарыңарга ажыткы турбас ужурлуг. Ажыткылыг аъш-чем чиир кым-даа кижи, ол кижи өскээртен келген-даа болза азы израиль черниң үндезин чурттакчызы-даа болза, израиль ниитилелдиң аразынга амылыг артпас. 20Ажыткылыг аъш-чем чивеңер: бүгү аал-ораныңарга ажыткы-биле хөөтпейн быжырган далган чиңер».

21Моисей израиль чоннуң бүгү баштыңнарын чыып алгаш, мынча дээн: «Өг-бүлелериңерге анай-хурагандан шилип тудуп алгаш, Хосталыышкын байырлалында чиири-биле дөгериңер. 22Иссоп деп чадаң үнүштү боодалдай тудуп алгаш#Лев. 14:6; Сан. 19:6, 18; Ыд. ыр. 50:9, савада ханче суккаш, эжиктериңерниң доора ыяжы болгаш кастыктарын хан-биле чаап калыңар, а оон эртенге чедир бажыңнарыңардан үнмеңер. 23Дээрги-Чаяакчы египетчилерни кезедип турар үезинде, доора ыяжында болгаш кастыктарында хан чаап каан эжик көрүп кааш, ол бажыңны оюп эрте бээр база узуткакчының бажыңыңарже кирип, хора чедирерин болдурбас. 24Бо чагыгны силерге база салгалдарыңарга кезээ мөңгеде берген хоойлу дег кадагалаңар. 25Дээрги-Чаяакчының Бодунуң аазаанын ёзугаар силерге берип турары черге чеде бергеш-даа, бо ыдыктыг чаңчылды сагып чоруңар. 26Кажан ажы-төлүңер силерден „Бо чүү ындыг чаңчылыл?“ деп айтырар болза#Хост. 13:14; Ы. х. к. 6:20; Иис. 4:6: 27„Бо дээрге Дээрги-Чаяакчыга бараалгаткан Хосталыышкын өргүлү-дүр#12:27 12:11-де немелде тайылбырны көр. . Дээрги-Чаяакчы египетчилерни узуткап тургаш, израильчилерниң чурттап турган бажыңнарын оюп эрткеш, бистиң өг-бүлелеривисти камгалап каан болгай“ – деп харыылаар силер». Израиль чон ынчан Дээрги-Чаяакчыга сөгүрүп, мөгейген. 28Олар чанып келгеш, Дээрги-Чаяакчы Моисей биле Ааронга канчаар дужааганыл, шак ынчаар кылганнар.

29Дүн ортузунда Дээрги-Чаяакчы фараоннуң дүжүлге салгаар дун оглундан эгелээш, хоругдаттырган кижиниң дун оглунга чедир – египет черде бүгү дун оолдарны база мал-маганның бүгү дун төлдерин – чок кылып каапкан. 30Дүне када фараон боду, ооң хамык дүжүметтери база бүгү египет чон туруп келген, Египетке кыпсынчыг ыы-сыы эгелээн, чүге дээрге кижи өлбээн бажың чок болган.

Израиль чоннуң Египеттен үнүп чорупканы

31Фараон ол-ла дүне Моисей биле Ааронну кыйгырткаш: «Че, силер-даа, израиль чон-даа мээң чонум аразындан үнүп чоруңар! Барып, меңээ чугаалап турганыңар дег, Дээрги-Чаяакчыга бараан болуңар! 32Чугаалап турганыңар дег, шээр-даа, бода-даа малыңарны сүрүп алыңар. Баргылаңар! Ол ышкаш мени йөрээп калыңар» – дээн. 33Египетчилер база израиль чонну дүрген-не чуртундан чорударын кызып: «Оон башка бис шуптувус өлүр бис!» – деп турганнар.

34Израиль чон ажыткы-биле хөөдүп четтикпээни далганын ап алган. Олар далган суп каан саваларын хептеринге ораагаш, эгиннеринге салгаш, чорупканнар. 35Израильчилер Моисейниң сөстерин ёзугаар#Хост. 11:2, египетчилерден мөңгүн болгаш алдын каасталгаларны база хептерни дилеп алганнар. 36А Дээрги-Чаяакчы Бодунуң чонунче египетчилерни ээ көрүндүрүптерге, олар израильчилерниң дилээн чүүлдерин берип турганнар. Израильчилер Египеттен олча-тывыштыг чоруй барганнар#Э. д. 15:14.

37Израиль чон, херээженнер биле ажы-төлдү санавас болза, 600 000 хире эр кижи#Сан. 11:21, Раамсес хоорайдан Сокхот дээр черже чорупкан#Сан. 33:5. 38Олар-биле кады янзы-бүрү аймак-сөөктүг хөй улус үнүп чорупкан. Шээр болгаш бода мал аажок улуг кодан-сүрүг бооп турган. 39Олар Египеттен көдүрүп эккелгени ажытпаан далганын хаарып алганнар, чүге дээрге Египеттен үндүр сывыртадып тура, далаш кадында далганын ажыткы-биле хөөдүп четтикпээннер база орукка чиир аъш-чем безин белеткээр чай чок болганнар чүве-дир.

40Израиль чоннуң Египетке#12:40 Египетке – өске бурунгу сөзүглелде «Египетке» эвес, а «Ханаанга болгаш Египетке» деп бижээн. чурттаан үези 430 чыл болган#Э. д. 15:13; Аж.-ч. 7:6; Гал. 3:17. 41430 чыл эрткенде, шак ол хүнде, Дээрги-Чаяакчының чурум-чыскаалдыг бөлүк чону египет черден көжүп үне берген. 42Ол дүн дээрге Дээрги-Чаяакчының израиль чонну египет черден үндүр көжүрүп, сагыш салып хонган дүнү болур. Ол дүн дээрге израиль чоннуң бүгү салгалдарының Дээрги-Чаяакчыны бодап, удувас дүнү болур.

Хосталыышкын байырлалының дугайында тодаргайлаан дүрүм-хоойлу

43Дээрги-Чаяакчы Моисей биле Ааронга мынча дээн: «Хосталыышкын байырлалын демдеглээриниң дүрүмнери бо-дур. Өске аймак-сөөктүг кым-даа ооң доюнга киржип болбас. 44Бир кижи садып алган кулун кыртыжап демдектеп алыр болза, ол кул кижи дойга киржип болур. 45Араңарда чурттап турар өскээртен келген кижи база хөлезилеттинген ажылчыныңар дойга киришпес ужурлуг. 46Аъш-чемни чаңгыс бажыңга чиир ужурлуг силер, ону бажыңдан дашкаар үндүрбеңер база малдың сөөктерин сыкпаңар#Сан. 9:12; Ин. 19:36. 47Бүгү израиль ниитилел ол чаңчылды сагыыр ужурлуг. 48Силерниң араңарда чурттай берген даштыкы кижи Дээрги-Чаяакчының Хосталыышкын байырлалының анай-хураганын дөгерип чииринге киржир күзелдиг болза, ооң өг-бүлезинде эр кижи бүрүзү кыртыжап демдектээр ёзулалды эртип алзын. Ынчан ол кижи байырлал доюнуң эъдин чип болур база израиль черниң үндезин чурттакчызы дег апаар. А кыртыжап демдектеттирбээн кижи Хосталыышкын байырлалының анай-хураганын чип болбас. 49Израильдиң үндезин чурттакчызынга-даа, араңарда чурттап турар даштыкы кижиге-даа бо дүрүмнер бир дөмей болур ужурлуг#Лев. 19:34; 24:22; Сан. 9:14; 15:15-16; Ы. х. к. 10:19».

50Бүгү израиль чон, Дээрги-Чаяакчы Моисей биле Ааронга канчаар дужааганыл, шак ынчаар кылган. 51Ол-ла хүнде Дээрги-Чаяакчы израиль чонну египет черден чурум-чыскаалдыг бөлүктерге үскеш, үндүре берген.

Currently Selected:

Хосталыышкын 12: TUV

Highlight

Copy