Хосталыышкын 2

Моисей деп чаш төл

1Левийниң аймаандан бир кижи ол-ла аймактан бир кысты кадай кылдыр ап алган#Хост. 6:20; Сан. 26:59. 2Кадайы иштелгеш, оол уруг божуп алгаш, көөрге, чаш төлүнүң чаражы аажок боорга, ону үш ай дургузунда чажырып келген. 3Оон ыңай чажырар аргазы чок апаргаш, кулузундан хааржак аргып алгаш, сугга дүшпес кылдыр чук-биле чаап-чаап, чаш төлүн ынаар суккаш, хем эриинде кулузун аразынга арттырып каан. 4Чаш төлдүң угбазы аңаа артып калгаш, дуңмазы-биле чүү болурун ырактан хайгаарап эгелээн. 5Ол өйде фараоннуң уруу хемче чунуп чедип келген, ооң чалча кыстары эрикке кылаштажып турганнар. Фараоннуң уруу кулузун аразында аргаан хааржакты көрүп кааш, ону чалча кыска эккелдирип алган. 6Даңгына аргаан хааржакты ажыдыпкаш, көөрге, чаш төл ыглап чыдар боорга, ону кээргей бергеш: «Бо-даа еврейлерниң ажы-төлүнүң бирээзи-дир» – деп чугаалаан.

7Чаш төлдүң угбазы даңгынадан: «Барып, силерге чаш төлдү эмзирип өстүрүп бээр херээженден еврейлер аразындан тып эккээйн бе?» – деп айтырган. 8Даңгына аңаа: «Ынчал че» – деп харыылаан. Демги уруг чоруткаш, чаш төлдүң авазын эккелген. 9Даңгына ие херээженге: «Бо чаш төлдү ап алгаш, меңээ эмзирип өстүрүп бер, сеңээ төлеп бээр мен» – деп чугаалаан. Демги херээжен чаш төлүн ап алгаш, эмзирип өстүрүп эгелээн. 10Чаш төл өзүп кээрге, авазы ону фараоннуң уруунга эккелген. Даңгына ону төрээн оглу дег хүлээп алгаш: «Мен ону сугдан ушта тыртып алган болгай мен» – дээш, Моисей#2:10 Моисей (Мошэ) – бо ат «Уштур» азы «Ушта тыртар» (маша) дээн уткалыг еврей сөске дөмей дыңналыр. деп ат тывыскан.

Моисейниң Мадианче дескени

11Моисей өзүп-доругуп, улуг эр апарган үезинде бодунуң чону – еврейлерже барып, оларның аар-берге ажылдар кылып турарын көрүп каан. Ол көөрге, ха-дуңмаларының бирээзи болур еврей кижини египет кижи эттеп турар болган. 12Моисей ыңай-бээр көрдүнгеш, кым-даа олче кичээнгей салбайн турар боорга, египет кижини өлүргеш, элезинге хөөп каан.

13А даартазында хүндүс чедип кээрге, ийи еврей чокшуп-кыржып турган. Моисей эжин хомудадып турар кижиден: «Эжиңни чүге эттеп тур сен?» – деп айтырган. 14А демгизи: «Кым сени бистиң даргавыс болгаш шииткекчивис кылып каан чүвел? Египет кижини өлүрүп кааның дег, мени база өлүрер бодап тур сен бе?» – деп харыылаан.

«Үүлгеткен херээмниң билдингир апарганы ылап-тыр» – дээш, Моисей корга берген.

15Фараон Моисейниң үүлгеткен херээниң дугайында дыңнап кааш, ону өлүрер деп барган. А Моисей фараондан дезип чоруткаш, Мадиан деп черге чедип, аңаа доктаагаш, кудук чанынга оруп алган. 16А Мадианга Бурганның бир бараалгакчызы чурттап турган. Ол чеди кыстыг чүве-дир. Ооң уруглары ачазының шээр малын суггарары-биле чедип келгеш, сугну узуп, коошпа саваларын долдуруп алганнар. 17Ол өйде кадарчылар келгеш, оларны сывырыпканнар. Ынчан Моисей туруп келгеш, уругларны камгалап, оларның малын суггарып берген. 18Кажан олар Рагуил деп аттыг ачазынга чеде бээрге#Сан. 10:29, ол: «Бөгүн чүү кончуг эрте чанып келдиңер?» – деп айтырган.

19Уруглары: «Бир египет кижи бисти кадарчылардан камгалап кагды, харын-даа суг узуп берип, малывысты суггарып берди» – деп харыылаан.

20Ачазы уругларынга: «Ол кижиңер кайыл? Чүге каапкаш келдиңер? Кый деп эккелиңер, бистиң аъш-чемивисти үлежип чизин» – дээн. 21Моисей ол кижиниң аалынга чурттаар бооп чөпшээрешкен. Аалдың ээзи Моисейге Сепфора деп уруун кадай кылдыр берген. 22Сепфора иштелгеш, оол уруг божуп аарга, Моисей аңаа Гирсам деп ат тывыскаш: «Мен хары черге өскээртен келген кижи-ле болгай мен» – деп турган#2:22 Гирсам (Гершом) – бо ат «Өскээртен келген кижи» (гер) дээн уткалыг еврей сөске дөмей дыңналыр (18:3 көр). .

Бурганның израильчилерге дузалажырын шиитпирлээни

23Хөй-ле үе эрткен; Египеттиң хааны өлген, а израиль чон аар-берге ажылдан човууртап турган. Оларның дуза дилээн кыйгызы Бурганның кулаанга чеде берген. 24Бурган оларның уё-човуурун дыңнап кааш, Авраам, Исаак болгаш Иаков-биле чарган чагыг-керээзин бодап келген#Э. д. 15:14; 46:4. 25Бурган израиль чоннуң хилинчээн көргеш, оларже сагыш салып турган#Башт. 2:18; 1 Хаан. 9:16.

Currently Selected:

Хосталыышкын 2: TUV

Highlight

Copy