Хосталыышкын 27

Өргүл салыр бедигээш

(Хост. 38:1-7)

1«Акация ыяжындан өргүл салыр бедигээштен кылып аар сен. Ол дөрбелчин болзун, узуну болгаш дооразы беш кыры дурту, а бедии үш кыры дурту болзун. 2Бедигээштиң дөрт азыынга дөрт мыйыстан кылып аар сен#3 Хаан. 1:50; 2:28; ол мыйыстар ооң-биле тудуш чаңгыс болзун; оон бедигээшти хүлер-биле шап ал. 3Бедигээшке ажыглаар херекселдерден: хүл урар савалар, хүл-узарлар, хан кудар аяктар, илбектер болгаш көс дажыглаар хүүрекчигештерден – шуптузун хүлерден кылып аар сен#3 Хаан. 7:40; 2 Чыл. 4:11. 4Бедигээшке хүлер шишкииштен кылгаш, ооң дөрт азыынга дөрт хүлер дээрбектен кылып каг. 5Шишкиишти өргүл салыр бедигээштиң хаажызының адаанга, шишкииш бедигээштиң ортузунга чедип турар кылдыр, быжыглап каг. 6Бедигээшке акация ыяжындан көдүрткүүш-мергелерден кылгаш, хүлер-биле шап ал. 7Көдүрткүүш-мергелерни бедигээштиң ийи кыдыында дээрбектерге, ону көдүрүп дажыглаары-биле, кедирип каг. 8Өргүл салыр бедигээшти сеңээ даг бажынга көргүскени дег, иштинде хос черлиг кылдыр, манзалардан кылып аар сен».

Өргээ-майгынны долгандыр турар херим

(Хост. 38:9-20)

9«Майгынны долгандыр херимден кылып ал – майгынның мурнуу чүкче көрүнген талазынга узуну чүс кыры дурту ээрип каан ак лён шывыглардан азып каг. 10Шывыглар азар чээрби адагаштан, оларны тургузар чээрби хүлер дөжектен кылып аар сен. Адагаштарның дээктерин болгаш оларны тудуштурар тыртпаларны мөңгүнден кылыр. 11Майгынның соңгу чүкче көрүнген талазынга, херимни дургаар узуну чүс кыры дурту шывыглардан азып каар ужурлуг. Оларны азарынга чээрби адагаш база чээрби хүлер дөжек херек. Адагаштарның дээктерин болгаш оларны тудуштурар тыртпаларны мөңгүнден кылыр. 12Майгынның барыын талазынга, херимниң калбаанга деңнештир узуну бежен кыры дурту шывыглардан, оларны азар он адагаштан база он дөжектен кылып каг. 13Херимниң чөөн талакы калбаа бежен кыры дуртунга дең болур. 14Чөөн талада улус кирер черниң бир кыдыынга он беш кыры дурту шывыглардан, оларны азар үш адагаштан база үш дөжектен кылып каг; 15улус кирер черниң өске кыдыынга он беш кыры дурту шывыглар, үш адагаш база үш дөжек турзун. 16А херимче кирер хаалга кылдыр көк, кызыл-хүрең болгаш кызыл өңнүг пөстерден база ээрип каан ак лёндан узуну чээрби кыры дурту шывыгдан угулзалар аргып, каастап кылып каг; ону азар дөрт адагаш база дөрт дөжек турзун. 17Херимни дескиндир турар адагаштарның дөгерезин мөңгүн тыртпалар-биле тудуштурар ужурлуг, оларның дээктерин мөңгүнден, а дөжектерин хүлерден кылыр ужурлуг.

18Херимниң узуну чүс кыры дурту, дооразы бежен кыры дурту, а бедии беш кыры дурту болзун; шывыгларны ээрип каан ак лёндан, адагаштарның дөжектерин хүлерден кылып кагзын. 19Майгында бүгү талалыг ажыглап турар хамык херекселдерни, ооң хамык өргеннерин база херимниң өргеннерин дөгерезин хүлерден кылыр ужурлуг».

Чырыткы үзү

(Лев. 24:1-4)

20«Оливадан сы бастырган, эң арыг үстү чырыткыга кудары-биле сеңээ эккээрин израиль чонга дужаа. Ол үстү чырыткыны үргүлчү кыпсырынга ажыгла. 21Аарон болгаш ооң оолдары Ужуражылга майгынында#Хост. 33:7 ыдыктыг аптараның мурнунда турар көжегениң даштынга чырыткыны Дээрги-Чаяакчының мурнунга кежээден эртенге чедир кывыскан турарын хайгааразыннар. Бо дээрге израиль чонга салгалдан салгал дамчып, кезээ мөңгеде доктааткан дүрүм-дүр».

Currently Selected:

Хосталыышкын 27: TUV

Highlight

Copy