Хосталыышкын 4
4
Моисейге берген бадыткал демдектери
1Моисей ынчан Бурганга харыылап: «Ынчалза-даа израильчилер меңээ бүзүревейн, мээң чугаамны тооп дыңнавайн: „Дээрги-Чаяакчы сеңээ кээп көзүлбээн“ – дээр болза, канчаар мен?» – деп айтырган.
2А Дээрги-Чаяакчы: «Холуңда ол чүңүл?» – деп оон айтырган.
Моисей: «Даянгыыжым-дыр» – деп харыылаан.
3Дээрги-Чаяакчы ынчан: «Ооңну черже октавыт!» – дээн. Моисей даянгыыжын черже октаптарга, оозу чылан бооп хуула бээрге, ол дезип ыңай болган.
4Дээрги-Чаяакчы Моисейге: «Холуң сунгаш, ооң кудуруундан тудуп ал» – дээн. Моисей холун сунгаш, чыланның кудуруундан тудуп аары билек, холунда чылан база катап даянгыыш болу берген. 5Дээрги-Чаяакчы ынчан мынча дээн: «Оларның ада-өгбелериниң Бурганы, Авраам, Исаак болгаш Иаковтуң Бурганы – Дээрги-Чаяакчы мээң сеңээ кээп көзүлгенимге улус бүзүрей берзин дээш, ынчаар кылыр сен».
6Ол: «Холуңну хойнуңче сувудам» – деп немей чугаалаан. Моисей холун хойнунче супкаш, оон ужулгаш, көөрге, ооң холу кеш аарыындан хар дег агара берген болган. 7Дээрги-Чаяакчы: «Холуңну ам база катап хойнуңче сувудам» – деп чугаалаарга, Моисей холун хойнунче супкаш, оон дедир ужулгаш, көөрге, оозу, мага-бодунуң арткан кезээ дег, кадык апарган болган.
8А Дээрги-Чаяакчы улаштыр чугаалаан: «Бир эвес израильчилер сеңээ бүзүревейн, бирги бадыткал демдээн тоовайн-даа баар болза, ийиги бадыткал демдээн тооп дыңнаар боор; 9ынчаарга бо ийи бадыткал демдээн көргеш-даа, сеңээ бүзүревес, сээң сөзүңнү тооп дыңнавас болза, хем суундан узуп алгаш, черже төвүт, ынчан ол суг хан кылдыр хуула бээр».
10Моисей Дээрги-Чаяакчыга: «О, Дээргим! Мен чевен, сөскүр эвес кижи мен#Иер. 1:6. Мооң мурнунда-даа ындыг чордум, чалчаң болур мээң-биле чугаалашканың соонда-даа, чугаа-сөзүм чевен хевээр-дир» – деп харыылаан.
11Дээрги-Чаяакчы Моисейге: «Кижиниң аксы-дылын Кым чаяап бергенил? Улусту Кым үнү чок азы дүлей; караа көрүп турар азы согур кылып каарыл? Дээрги-Чаяакчыңар болур Мен эвес ийик мен бе?#У. ч. 20:12 12Ам бар че, чугаалап эгелээриңге-ле, Мен сээң-биле кады болуп, чүнү чугаалаарын айтып бээр мен» – дээн.
13А Моисей: «О, Дээргим! Чорудуп болуруң өске кижиден айбылап көрем» – деп дилээн.
14Ынчан Дээрги-Чаяакчы Моисейже күштүү-биле килеңнеп, мынча дээн: «Сээң Аарон дээр левит акың бар эвес чүве бе? Мен ооң чеченин билир мен. Ол ам сенче уткуй кел чыдар-дыр, а сени көрүп кааш, сеткилинден өөрүүр-дүр. 15Мээң айтып берген сөстеримни акыңга дамчыдып чугаалаар сен; кайыңар-даа чугаалап эгелээрге, Мен силер-биле кады болуп, сеңээ-даа, акыңга-даа чүнү чугаалаарын айтып бээр мен база чүнү кылырын өөредир мен. 16Аарон сээң орнуңга чон-биле чугаалажыр кижи болур. Ынчангаш ол сээң аксың дег болур, а сен аңаа Бурган дег болур сен. 17Бо даянгыышты база тудуп алгаш чор: ооң-биле улуска бадыткал демдектери көргүзер сен».
Моисейниң Египетче ээп келгени
18Моисей оон каты Иофорга келгеш: «Мен ам чоруптайн аа, Египетте чурттап турар чоок улузумче дедир чанып, оларның бар-чогун көрүп көрейн» – деп чугаалаан.
Иофор Моисейге: «Амыр-тайбың ээп чанывыт» – деп харыылаан.
19Моисей Мадианга турда-ла, Дээрги-Чаяакчы аңаа: «Ам Египетче чана бер: сени өлүрер деп турган улус шуптузу өлүп калган-дыр#Хост. 2:15» – деп чугаалаан чүве-дир. 20Моисей-даа кадайын, ажы-төлүн элчигенге олурткаш, египет черже ээп чана берген. Ол Бурганның берген даянгыыжын база ап алган. 21Дээрги-Чаяакчы ынчан Моисейге мынча дээн: «Моон чорупкаш, Египетке чеде бергеш, Мээң сени кылзын дээш хүлээткеним кайгамчык чүүлдерниң шуптузун фараоннуң мурнунга кылыр сен. А Мен фараонну чөрүү-дедир кылып каарымга#Иис. 11:20, ол чонну салбайн баар. 22Ынчан фараонга мынча дээр сен: „Дээрги-Чаяакчы сеңээ чугаалап тур: ‘Израиль дээрге Мээң дун оглум-дур#Иер. 31:9; Ос. 11:1. 23Ынчангаш оглум Меңээ бараан болуп, мөгейзин дээш, ону салып чорудуптарыңны дужаап тур мен. А бир эвес Израильди салырындан ойталаар болзуңза, көөр сен – Мен сээң дун оглуңну өлүрүп каар мен’“».
24Моисей орук ара хонуп чыдырда, Дээрги-Чаяакчы чедип келгеш, ону өлүрер деп барган. 25Моисейниң кадайы Сепфора ынчан чидиг бижек ап алгаш, оглунуң дотааның кыдыкы кежин кыртыжап демдектеп алган. Оон ол кешти ашааның ийи бут аразынга дегзип: «Бо хан ачызында мээң-биле дүгдешкен сен» – дээн. 26Дээрги-Чаяакчы ынчан Моисейни амылыг арттырып каан. (Сепфора кыртыжап демдектээшкинге хамаарыштыр: «Хан ачызында дүгдээшкин» – деп чугаалаан.)
Бурганның Ааронну Моисейже чорутканы
27Дээрги-Чаяакчы Ааронга: «Моисейни уткуп, ээн кургаг ховуже чорувут» – дээрге, демгизи ынаар чорупкаш, Бурганның дааның#4:27 Бурганның даа – Хорив (азы Синай) дагны ынча дээн. чанынга дуңмазы Моисейни уткуп алгаш, ошкап каан. 28Дээрги-Чаяакчыга айбылаткан Моисей Ооң бүгү сөстерин база кылзын деп айытканы бүгү бадыткал демдектерин Ааронга дамчыдып чугаалаан. 29Моисей биле Аарон кады чорупкаш, израиль чоннуң шупту баштыңнарын чыып алганнар. 30Аарон чонга Дээрги-Чаяакчының Моисейге чугаалаан бүгү сөстерин дамчыдып чугаалааш, чон мурнунга бадыткал демдектерин кылып көргүскен. 31Чон оларга бүзүрей берген. Дээрги-Чаяакчы израиль чонга чедип келген база ооң хилинчээн көрүп каан дээрзин дыңнааш, улус Бурганның мурнунга сөгүрүп, мөгейген.
Currently Selected:
Хосталыышкын 4: TUV
Highlight
Share
Copy
Want to have your highlights saved across all your devices? Sign up or sign in
© Институт перевода Библии, Москва, 2011