Эге дөс 18
18
Үш онзагай аалчының Авраамга келгени
1Изиг-ышкам дүъш үези турда, Мамре деп дуб ыяштыг чер чанынга, Авраам майгынче кирер эжик аксынга олурда, Дээрги-Чаяакчы аңаа көстүп келген: 2Авраам көрүптерге, мурнунда үш эр кижи турган. Оларны көрүп кааш, уткуштур маңнап чеде бергеш, черге чедир мөгейген. 3Ол мынча дээн: «Дээргим! Кулуңар мени эскерип, ээ көрүнген болганыңарда, мени ойбайн көрүңер. 4Силерге мээң улузум бут чуур суг эккеп бээр. Бо ыяш хөлегезинге дыштанып аар силер. 5А мен силерге, орукче үнериниң мурнунда күш кирип аар кылдыр, чем эккеп берейн. Орук аайы-биле болганда, кулуңар мээң аалымга доктаап көрүңер».
«Ындыг-дыр, шак-ла ынчаар кыл» – деп, олар харыылаан#Башт. 6:18-19.
6Авраам майгынынче далаш-биле кирип келгеш, Саррага: «Дүрген үш са#18:6 Үш са дээрге 22 литр хире болур. эң-не ак далгандан ажыдып хөөткеш, боовадан быжырывыт» – дээн. 7Ооң соонда Авраам одарда малынга халып чеде бергеш, оон эң-не семис бугажыкты сүрүп алгаш, дүрген чем белеткептер кылдыр, чалчазынга аппарып берген. 8Авраам аалчыларга өреме, сүт болгаш бугажыктың эъдин аппарып, хүндүлээн. Олар ыяш хөлегезинге чемненип олурда, Авраам оларның чанынга турган.
9Олар: «Кадайың Сарра кайыл?» – деп айтырганнар.
«Мында, майгында» – деп, Авраам харыылаан.
10Аалчыларның бирээзи: «Мен келир чылын бо-ла үеде сеңээ катап чедип кээр мен. Сээң кадайың Сарра ынчан оолдуг болур» – дээн#Рим. 9:19. А Сарра ооң артында майгын эжииниң аксынга дыңнап турган. 11Авраам биле Сарраның назы-хары улуг турган чүве-дир. Херээженнерниң көөр ай демдээ Саррада болбайн турган. 12Сарра иштинде каттырып: «Кыраан меңээ күзенчиг өөрүшкү болур деп бе? Дээрги ашаам база кырган болгай» деп боданган#1 Пет. 3:6.
13Ынчан Дээрги-Чаяакчы Авраамга: «„Кырып калган мен, уруг божуп кайын шыдаар мен“ деп Сарраның чоп каттырып турары ол? 14Дээрги-Чаяакчының шыдавас чүвези бар деп бе?#Иов 42:2; Иер. 32:17; Мф. 19:26; Лк. 1:37 Келир чылын бо-ла үеде Мен сеңээ чедип кээр мен, ынчан Сарра оолдуг болур» – дээн#4 Хаан. 4:16.
15Сарра корга бергеш: «Чок, мен каттырбадым» – деп мегелепкен.
«Чок, сен каттырдың» – деп, Ол чугаалаан.
Содом биле Гоморра хоорайларны буруудатканы
16Аалчылар Содомче углай чоруур дээш туруп келгеннер. Авраам оларны үдеп каар дээш кады чорупкан. 17Дээрги-Чаяакчы мынча деп-тир: «Авраамдан бодалдарымны чажырайн бе?#Ам. 3:7 18Улуг болгаш күштүг чон оон укталып үнер болгай. Ынчангаш чер кырында бүгү чоннар Авраамны дамчыштыр ачы-буянны алыр#Э. д. 12:3. 19Бодунуң бүгү үре-салгалынга Мээң өөредиимни суртаалдазын дээш, олар чөптүг-шынныг чорук кылзын дээш, Мен Авраамны шилип алган мен. Ынчан Мен, Дээрги-Чаяакчы, чүнү аңаа аазаан мен, шуптузун күүседир мен».
20Ооң соонда Дээрги-Чаяакчы мынча дээн: «Содом биле Гоморраның бужар үүлгедиглеринден ыы-сыы дыңналып тур. Оларның бачыды кончуг улуг-дур#Э. д. 13:13. 21Баргаш, көрүп көрейн. Меңээ билдинип турары дег, ында шупту чүве шынап-ла багай бе? Азы ындыг эвес бе? Барып хынаптайн». 22Орук кижилери Содомче чорупканнар, а Авраам ам-даа Дээрги-Чаяакчының мурнунда турбушаан#18:22 Өске бурунгу сөзүглелде «Дээрги-Чаяакчы ам-даа Авраамның мурнунда турбушаан» деп бижээн. . 23Авраам чоокшулап чеде бергеш, Дээрги-Чаяакчыдан айтырган: «Таанда-ла буруулуглар-биле кады буруу чок улусту база узуткап каар сен бе? 24Бо хоорайда, канчап билир, бежен хире актыг кижи бар чадавас. Таанда ол бежен кижиге чурттаар чер арттырбайн, хоорайны өршээвейн, узуткап каар сен бе? 25Ындыг болбас ужурлуг! Сен ынчаар аажылап шыдавас сен. Буруулуг кижи биле актыг кижини Сен деңге шаажылап шыдавас сен. Бүгү черниң Шииткекчизи шын эвес шииткел кылып болур бе?#Э. д. 16:5; Иов 34:10; Ыд. ыр. 91:16»
26Дээрги-Чаяакчы: «Бир эвес Мен Содом хоорайдан бежен актыг кижи тып алзымза, чүгле олар дээш бүдүн хоорайны өршээп арттырып каар мен» – деп харыылаан#Иса. 65:8.
27Авраам тургаш: «Мен дээрге, довурак-доозун дег, чүү-даа эвес-тир мен. Ынчалза-даа мен Дээргимден мынча деп диттигип айтырып тур мен: 28бир эвес актыг улустуң санынга беш кижи четпес болза, таанда беш сан четпес дээш, бүдүн хоорайны узуткап каар сен бе?» – дээн.
Дээрги-Чаяакчы: «Чок, дөртен беш актыг кижи тыпты берзе, хоорайны база өршээп арттырып каар мен» – дээн.
29Авраам уламчылаан: «Бир эвес актыг улустуң саны дөртен болур болза?»
Дээрги-Чаяакчы: «Дөртен кижи дээш база өршээр мен» – дээн.
30Авраам: «Мээң сөстерим дээш Дээргим ажынмазын. А бир эвес ында үжен актыг кижи бар болза?» – деп айтырган.
«Үжен-даа актыг кижи бар болза, өршээр мен» – деп, Ол харыылаан.
31Авраам мынча дээн: «Дээргимден айтырып диттигиптейн: а бир эвес олар ында чүгле чээрби болза?»
Дээрги-Чаяакчы: «Чээрби-даа кижи дээш болза, өршээр мен» – дээн.
32Авраам: «Дээргим меңээ ажынмайн көрзүн. Бо мээң сөөлгү айтырыым-дыр: а бир эвес олар чүгле он кижи болза?» – дээн.
Дээрги-Чаяакчы: «Он-даа кижи болза, өршээр мен» – деп харыылаан.
33Чугаазын дооскаш, Дээрги-Чаяакчы чоруй барган, а Авраам чанып келген.
Currently Selected:
Эге дөс 18: TUV
Highlight
Share
Copy
Want to have your highlights saved across all your devices? Sign up or sign in
© Институт перевода Библии, Москва, 2011
