Эге дөс 27

Иаковтуң ачазының алгап-йөрээшкинин алганы

1Исаак кырып калгаш, карактары көрбестей бергенде, улуг оглу Исавты: «Оглум!» – деп кыйгырган.

Оозу: «Дыңнап тур мен» – дээн.

2Исаак: «Мен ам кырып калдым, кайы хире үр чурттаарымны безин билбес-тир мен. 3Ча, согунуң алгаш, меңээ ховудан аңнап эккелем#Э. д. 25:27-28. 4Ынак чемимни амданныг кылдыр белеткеп эккелгеш, мени чемгерип каг. Ынчан өлбейн чыткаш, сени алгап-йөрээп каар мен» – дээн. 5Исав ховуже аңнап чоруй барып-тыр.

Оглу Исавка чугаалаан Исаактың сөстерин Ревекка дыңнаан чүве-дир. 6Ревекка оглу Иаковка мынча дээн: «Мен ачаңның акың Исавка чугаалаан чугаазын дыңнадым: 7„Аңнап эккелгеш, меңээ амданныг чемден кылып бер. Мен ону чип алгаш, өлүрүмнүң мурнунда Дээрги-Чаяакчының мурнунга сени алгап-йөрээп каайн“ – диди. 8Ам, оглум, мени таптыг дыңна, дужаалымны күүсет! 9Одарда малче баргаш, оон ийи семис-чаагай анайдан эккел. Мен оон ачаңның ынак чеминден белеткеп берейн. 10Сен ачаңга ону эккеп бээриңге, ол чемненип алгаш, өлүрүнүң мурнунда сени алгап-йөрээр».

11Иаков авазы Ревеккага мынча дээн: «Мээң акым Исав дүктүг кижи-дир, а мен тас кижи-дир мен. 12Бир эвес ачам мени суйбапкаш, билип каар болза? Ынчан ачам оглум мени шоодуп, куду көрүп тур деп бодай берзе канчаар? Мен алгап-йөрээшкин эвес, каргаашкын хүлээп аар апаар мен».

13Авазы аңаа: «Сенче салган каргыш меңээ четкей аан, оглум. Чүгле мени таптыг дыңна. Барып, мээң айыткан чүвелеримни эккел» – дээн.

14Иаков чоруткаш, анайларны авазынга эккеп бээрге, Ревекка Исаактың ынак чемин амданныг кылдыр белеткеп берген. 15Ооң соонда Ревекка улуг оглу Исавтың майгында бар турган эң-не эки хептерин бичии оглу Иаковка кедирип алгаш, 16Иаковтуң холдарын болгаш тас мойнун анай кештери-биле ораап кааш, 17белеткеп алганы чемин болгаш хлебти оглунга тутсуп берген.

18Иаков ачазынга чеде бергеш: «Ачай!» – деп кыйгырган.

Оозу: «Оог! Кым сен, оглум?» – дээн.

19Иаков ачазынга мынча дээн: «Мен улуг оглуңар Исав-тыр мен. Силерниң чугаалааныңар ёзугаар хамык чүвени кылдым, ачай. Ковайып олуруп алгаш, мээң эккелгеним аң эъдин чип, мени алгап-йөрээп каап көрүңерем».

20Исаак оглундан: «Канчап ындыг дүрген аң адып алдың, оглум?» – деп айтырган.

Оглу: «Чүге дээрге силерниң Бурганыңар Дээрги-Чаяакчы ону менче чорудупканы ол-дур» – дээн.

21Исаак Иаковка мынча дээн: «Менче чоокшулап чедип келем, оглум. Мен суйбап көрейн, ылап-ла мээң оглум Исав сен бе азы чок бе?» 22Иаков ачазынга чеде бээрге, ол ону суйбап көргеш: «Үнү, үнү Иаковтуу, а холдары, холдары Исавтыы» – дээн. 23Ачазы Иаковту танываан, чүге дээрге ооң холдары акызы Исавтыы-биле дөмей дүктүг болган. Ынчангаш ачазы ону алгап-йөрээп каан. 24«Сен ылап-ла мээң оглум Исав сен бе?» – деп, Исаак катап айтырган.

Иаков: «Ийе, мен-дир мен» – деп харыылаан.

25Исаак: «Чемиңни бээр эккел, оглум. Сээң аңың эъдин чип алгаш, алгап-йөрээп каайн» – дээн. Иаков чемни эккеп бээрге, Исаак ону чип алган. Арага эккеп бээрге, ону база ишкен. 26Исаак оглунга: «Бээр чедип келгеш, мени ошкап каг, оглум» – дээн. 27Ол ачазын ошкап каан. Исаак оглунуң хевиниң чыдын билип кааш, ону алгап-йөрээп мынча дээн:

«Бо-дур, мээң оглумнуң чыды –

Дээрги-Чаяакчының алгап кааны ховуларның чыды.

28Дээрден дүшкен чаъс-шалың-биле,

черниң дүжүдү-биле,

элбек тараа, арага-дары-биле

Бурган сени шаңнаар болзун!#Ы. х. к. 33:13

29Чоннар сеңээ чагыртыр болзун,

аймактар сеңээ мөгеер болзун!

Төрел ха-дуңмаңның чагырыкчызы болур сен:

аваңның салгалы сеңээ мөгейзин!

Сеңээ каргыш салган кижи – каргаттырар,

Сени йөрээген кижи – алгаттырар болзун!»

Исавтың дуңмазының мегезин билип кааны

30Ачазы Иаковту алгап-йөрээп доозуптарга, Иаков үнүп чоруптары билек, Исав аңнаашкындан ээп келген. 31Исав база амданныг чемин белеткээш, ачазынга эккелгеш: «Ковайып тургаш, оглуңар мээң эккелгеним аң эъдин чигеш, мени алгап-йөрээп каап көрүңер, ачай» – дээн.

32Ачазы Исаак оон: «Кым сен?» – деп айтырган.

Ол: «Мен-дир мен, дун оглуңар Исав» – деп харыылаан.

33Исаак элдепсинип-кайгаанындан сириңейнип чугаалаан: «А сээң кээриңниң мурнунда кым меңээ аң эъди эккеп бергени ол? Ону дөгерезин чигеш, кымны алгап-йөрээп кааным ол? Ол кижи ам алгаттырган кижи болган-дыр».

34Ачазының ол сөстерин дыңнааш, Исав ыыткыр болгаш муңгаранчыг кылдыр алгырыпкаш, ачазындан: «Мени база алгап-йөрээп каап көрүңер, ачай!» – деп дилей берген.

35«Ол сээң дуңмаң кээп чораан-дыр, кажар оп-биле сээң алыр турган йөрээшкиниңни алгаш барган-дыр» – деп, ачазы чугаалаан.

36Исав мынча дээн: «Ону Иаков деп адааны анаа эвес-тир! Мени ол ам ийи дугаар ажып тур#27:36 Иаков деп ат «ээжектен туттунар» азы «ажып эртер» деп уткалыг билдинип болур (25:26, 30 көр). . Баштай мээң улуу боор эргемни алгаш барды#Э. д. 25:33, ам – мээң алгап-йөрээттириишкинимни аппарганы ол-дур».

37Исаак Исавка: «Бо-дур, Иаковту мен сээң чагырыкчың кылып кагдым. Шупту төрел ха-дуңмаларын аңаа чагыртып чурттаар кылдыр чугаалаптым. Тарааны, арага-дарыны аңаа элбээ-биле хайырлаптым. Сен дээш чүнү кылып шыдаар мен ам, оглум?» – деп харыылаан.

38Исав ачазындан: «Таанда-ла, силерде чүгле чаңгыс алгап-йөрээшкин бар чүве бе кай, ачай? Мени база алгап-йөрээп каап көрүңер!» – деп дилээш, мөөредир ыглай берген.

39Ачазы Исаак аңаа мынча дээн:

«Сээң аал-ораның чери дүжүткүр эвес,

дээрниң чаъс-шалыңы ховар дүжер черге турар.

40Сен хылыш-селемең-биле чүнү тывар сен,

ооң-биле амыдыраар сен

база дуңмаңга чагыртып чурттаар сен#2 Хаан. 8:14.

Ынчалза-даа үези кээрге, сен удурланып үнгеш,

ооң кулданыын мойнуңдан адырып октаптар сен#4 Хаан. 8:20-22».

Ада-иезиниң Иаковту өске черже чорудупканы

41Ынчалдыр Исав ачазындан алыр турганы алгап-йөрээшкин ужун Иаковту бодап кээрге-ле, сеткили карарар апарган. «Ачам өске оранче чоруй баарга, дуңмам Иаковту өлүрүп каар мен» деп, Исав бодап алган. 42Улуг оглу Исавтың бодалдарын Ревекка билип кааш, бодунуң бичии оглу Иаковту кыйгырып, келдиртип алгаш, мынча дээн: «Акың Исав сени өлүрер мен деп кыжанып турар-дыр. 43Оглум, ам мээң чугаамны дыңна. Дораан мээң Харранда чурттап турар акым Лаван сугже дезип чорувут. 44Акыңның кылыы чазылгыже, аңаа кезек када чурттап турар сен. 45Кажан акыңның кылыы часты бээрге, ол сээң аңаа удур кылган бурууңну уттуптар. Ынчан мен сенче сөгледипкеш, сени оон ап аар мен. Оон башка силерниң ийилдириңерни деңге чидириптер чыгыы кижи-дир мен».

46Ревекка оон: «Бо ийи хет келин ужун меңээ амыдыраары дыка берге-дир#Э. д. 26:35. Бир эвес Иаков база болар дег тус черниң уруун кадайланып аар болза, мээң чурттаан-даа ажыым чок-тур» – деп Исаакка чугаалаан.

Currently Selected:

Эге дөс 27: TUV

Highlight

Copy