Эге дөс 29

Иаковтуң Рахил болгаш Лаван-биле ужуражылгазы

1Иаков оруун уламчылап чорупкан. Ханаандан чөөн чүк талазында бир чуртка чеде бергеш, 2ол ховуда мал суггарар кудук көрүп каан, а ооң чоогунда үш кодан шээр мал чыткан. Ол кудуктуң аксында улуг даш бар болган. 3Кажан шупту кодан чыглып кээрге, кадарчылар ол дашты чайладыр идипкеш, малын суггарып аар турганнар. Малын суггарып алгаш, дажы-биле катап-ла кудукту дуй салып каар турганнар.

4Иаков олардан: «Ха-дуңма! Кайыын келдиңер?» – деп айтырган.

Олары: «Бис Харрандан бис» – деп харыылааннар.

5«Нахорнуң оглунуң оглу Лаванны билир силер бе?» – деп олардан айтырган.

«Билир бис» – деп, демгилери харыылааннар.

6«Ол эки тур бе?» – деп айтырган.

Кадарчылар: «Эки-ле. А ооң уруу Рахил мал кадарып бо кел чор» – деп чугаалааннар.

7Иаков кадарчыларга: «Кежээге чедир элек-тир, мал бөлер хире эвес. Малыңар суггарып алгаш, одарже үндүрүңер че» – дээн.

8Кадарчылар: «Шупту кодан мал бөлдүнмээн шаанда, шыдавас бис. Кудуктуң кырында дашты чайладыр идиптерге, бис малывыс суггарып аар бис» – деп харыылааннар.

9Улус чугаалажып турар аразында, Рахил ачазының кодан малын сүрүп алган чедип келген. Ол кадарчы кыс турган. 10Иаков бодунуң даайы Лаванның уруу Рахилди база ооң ачазының малын көрүп кааш, кудукка келгеш, дашты чайладыр идипкеш, малды суггаржып берген. 11Ооң соонда Иаков Рахилди ошкап кааш, ыыткыр ыглапкаш, 12аңаа: «Сээң ачаңның төрели болур мен, Ревекканың оглу-дур мен» – дээн. А Рахил маңнап чоруткаш, ол бүгүнү ачазынга барып чугаалапкан.

13Лаван бодунуң чээни Иаковтуң дугайын дыңнааш, аңаа уткуштур үне халып келгеш, ону куспактааш, ошкап-чыттап, бажыңынче киире берген. Иаков чүү болганын шуптузун чугаалап берген. 14Лаван аңаа: «Сен, шынап-ла, мээң хан төрелим кижи-дир сен» – дээн.

Иаковтуң Лаванның уругларын кадай кылдыр ап алганы

Иаков ооң бажыңынга бир ай чурттаарга, 15Лаван чээнинден мынча деп айтырган: «Мээң төрелим-дир сен, меңээ анаа-ла халас ажылдап бээр кижи сен бе? Чугаалап көрем, канчаар төлеп бээйн?»

16Лаван ийи кыстыг турган: улуун Лия дээр, а бичезиниң ады Рахил. 17Лияның караа четпес турган#29:17 Азы: «Лияның көрүжү чымчак, чараш турган». , а Рахилдиң арын-шырайы-даа, дурт-сыны-даа дыка чараш турган. 18Иаков Рахилге ынакшый бергеш, Лаванга: «Сээң бичии урууң Рахил дээш, сеңээ мен чеди чыл ажылдап бээр мен» – дээн.

19Лаван: «Кым-бир өске кижиге бээриниң орнунга, ону сеңээ бергени дээре. Бистиинге артып кал» – дээн. 20Рахил дээш, Иаков чеди чыл аңаа ажылдаан. Ол үе аңаа каш хонук эрткени-биле дөмей болган, чүге дээрге ол Рахилге ынак турган.

21Иаков Лаванга: «Айыткан үем чедип келди. Кадайым кайыл, ону мен ам алыйн» – дээн. 22Лаван чонун чыггаш, дой кылган. 23Кежээ апарганда, Лаван аңаа уруу Лияны аппарып бээрге, Иаков ооң-биле удаан. 24(Лаван Лияга чалча кылдыр бодунуң кулу Зелфаны берген.) 25Даң адып келгенде, Иаков көөрге, Лия-биле чыдар болган! Лаванга ол: «Мээң-биле чүнү канчап кааның ол? Мен Рахил дээш сеңээ ажылдап турган кижи эвес мен бе? Мени чүге мегелээриң ол?» – дээн.

26Лаван: «Бистиң черниң чаңчылы-биле уругларның улуун мурнай бичези ашакка барып болбас. 27Бо куданың чеди хонуу эртерге#Башт. 14:12, сеңээ бичезин база бээр бис. Рахил дээш, сен меңээ ам база чеди чыл ажылдаар апаар сен» – деп харыылаан.

28Иаков чөпшээрешкен. Куданың чеди хонуу эрте бээрге, Лаван аңаа кадай кылдыр бичии уруу Рахилди база берипкен. 29(А Рахилге чалча кылдыр бодунуң кулу Валланы берген.) 30Иаков Рахил-биле база удаан. Ол аңаа Лиядан артык ынак болгаш#Лев. 18:18, Лаванга ол дээш, база чеди чыл иштинде ажылдаан.

Лия биле Рахилдиң адааннажылгазы

31Дээрги-Чаяакчы Лияга ашаа ынак эвес деп чүвени көрүп каан, ынчангаш ону ажы-төлдүг болур кылып каан#1 Хаан. 1:19-20. А Рахил ажы-төлденир салым чок болган. 32Лия иштели бергеш, оол божуп алган. Оглун ол Рувим#29:32-35 «Рувим» – «муңгарал көөр» деп еврей сөстерге дөмейлешкек. «Симеон» – «дыңнаар» деп сөске дөмейлешкек. «Левий» – «каттыжар» деп сөске дөмейлешкек. «Иуда» – «алдаржыдар» деп сөске дөмейлешкек. деп адап алган. Лия: «Дээрги-Чаяакчы мээң муңгаралымны көрүп каан-дыр. Ам-на ашаам меңээ ынак апаар боор» деп бодаан. 33Ол база катап иштели бергеш, оол божуп алган. «Дээрги-Чаяакчы ашаам меңээ ынак эвес деп дыңнап кааш, бо оглумну база берди» – деп чугаалааш, Лия оглун Симеон* деп адап алган. 34Ол оон база катап иштели бергеш, оол божуп алгаш: «Ашаам ам-на мээң сеткилимге каттыжар боор, чүге дээрге мен аңаа үш оолду төрүп бердим ышкажыл» – деп чугаалаан. Ынчангаш Лия оглун Левий* деп адап алган. 35Ооң соонда Лия база катап иштели бергеш, ам база оол божуп алгаш: «Мен ам Дээрги-Чаяакчыны алдаржыдып алгаар мен!» – деп чугаалаан. Ол оглун Иуда* деп адап алган. Ооң соонда ол божуурун соксаткан.

Currently Selected:

Эге дөс 29: TUV

Highlight

Copy