Эге дөс 35

Иаковтуң Вефилче ээп келгени

1Бурган Иаковка: «Ам Вефилче чорупкаш, аңаа барып чуртта. Акың Исавтан дезипкен үеңде, ол черге сеңээ көстүп келген мен#Э. д. 28:10-22. Ынчангаш орта баргаш, Меңээ өргүл салыр бедигээштен тудуп каг» – дээн. 2Ынчан Иаков өг-бүлезинге болгаш бодунга хамааржыр улузунуң шуптузунга мынча деп чагаан: «Бодуңарда бар хары бурганнарны октапкаш, арыгланып чунуп алыңар. Идик-хевиңерни база солуп алыңар. 3Вефилче чоруур бис. Берге үемде мени деткип, мээң-биле каяа-даа кады чораан Бурганга өргүл салыр бедигээшти ол черге тудуп каар мен». 4Ынчан Иаковтуң улузу боттарында бар турган хары бурганнарын база кулактарында сагыызын-сыргаларын шуптузун аңаа уштуп бергеннер. Иаков оларны Сихемде турар дуб ыяштың адаанга хөөп каапкан#Иис. 24:26; Башт. 9:6.

5Оон олар орукче үнүпкеннер. Бургандан коргуушкун ол кавының хоорайларын бүргеп келген болгаш, Иаковтуң оолдарын кым-даа сүрбейн барган. 6Иаков бодунуң кады чораан улузу-биле ханаан черде Луз (азы Вефил) деп хоорайга чедип келгеш, 7аңаа өргүл салыр бедигээш тудуп кааш, ол черни Эл-Вефил#35:7 «Эл-Вефил» деп ат «Вефилдиң Бурганы» дээн уткалыг. деп адап каан, чүге дээрге акызындан дезип турар үезинде, орта Бурган аңаа ажыдыышкын кылган чүве-дир#Э. д. 28:19.

8Ол үеде Ревекканың азыракчызы Девора өлүп калган#Э. д. 24:59. Ону Вефилдиң чоогунда дуб ыяш чанынга ажаап кааннар. Ынчангаш ол дубту «Ыы-сыының ыяжы» деп адап каан чүве-дир.

9Иаков Паддан-Арамдан ээп чанып келген соонда, аңаа Бурган катап көстүп келгеш, ону алгап-йөрээп: 10«Сээң адың Иаков болгай. Ынчалза-даа моон соңгаар сээң адың Иаков эвес, а Израиль болур» – дээн. Ынчалдыр ону Израиль деп адап каан#Э. д. 32:28. 11Бурган аңаа мынча дээн: «Мен Күчүлүг Бурган-дыр мен. Өзүп-төрүп, салгалыңны көвүдет-ле, сенден чон тыптыр, хөй чоннар тыптыр, сээң үре-салгалыңдан хааннар база үнер#Э. д. 17:6. 12Авраам биле Исаакка берген черимни сеңээ бээр мен, сээң үре-салгалыңга база бо черни бээр мен». 13Ынча дээш, Бурган Иаковка чүве чугаалап турган черинден чорупкан. 14Иаков Бурганның турган черинге даш тураскаал тургузуп кааш, аңаа өргүл кылдыр арага төп, олива үзү кудуп, ону ыдыктаан#Э. д. 28:18; 31:45. 15Бурганның аңаа чүве чугаалап турган черин Иаков Вефил деп адап каан#Э. д. 28:19.

Вениаминниң төрүттүнгени болгаш Рахилдиң өлгени

16Ооң соонда олар Вефилден чорупканнар. Эфратага бичии-ле четпээнде, Рахилдиң эъди аарый бергеш, бергедеп божаан. 17Рахил бергедеп божуп турда, тудугжу кадай аңаа: «Кортпа, ам база оолдуг болган-дыр сен» – дээн#1 Хаан. 4:20. 18Рахил сөөлгү күжү төнүп, өлүп чыда, оглун Бен-они деп адап каан. Ынчалза-даа ачазы ону Вениамин деп адап алган#35:18 «Бен-они» деп ат «хилинчектенип божаан оглум» дээн уткалыг. «Вениамин» деп ат «оң таламга орар оглум» азы «мурнуу чүкке төрүттүнген оглум» дээн уткалыг. . 19Рахил өлүп калган, ону Эфрата (азы Вифлеем)#Руф 1:2; Мих. 5:2 баар орук ара ажаап кааннар. 20Иаков ооң хөөрүнге тураскаал тургузуп каан. Ол тураскаал ам-даа ында турар. 21Оон чоруткаш, Израиль бодунуң майгынын Гадер суургазының чанынга тип алган.

22Израильдиң бир доктаап турупкан черинге Рувим ачазының кул-кадайы Валла-биле хонупкан#Э. д. 49:4; Лев. 20:11. Израиль ол дугайын дыңнап каан.

Иаков он ийи оолдуг турган.

23Лияның божаан оолдары: Рувим (Иаковтуң дун оглу), ооң адаа Симеон, Левий, Иуда, Иссахар база Завулон.

24Рахилдиң божаан оолдары: Иосиф биле Вениамин.

25Рахилдиң чалчазы Валланың божаан оолдары: Дан биле Неффалим.

26Лияның чалчазы Зелфаның божаан оолдары: Гад биле Асир.

Иаковтуң Паддан-Арамга төрүттүнген оолдары бо-дур.

Исаактың өлгени

27Ынчалдыр Иаков Мамреде (азы Кириат-Арбада, азы Хевронда)#Иис. 14:15; Башт. 1:10 бодунуң адазы Исаакка чедип келген. Авраам биле Исаактың турумчуп алганы хоорай ол чүве-дир#Э. д. 13:18; 23:2. 28Исаак 180 чыл чурттаан. 29Исаак мага хандыр чурттааш, кыраан назынында өлүп калган, өгбелериниң соондан өске оранче чоруй барган#Э. д. 25:8. Ону оолдары Исав биле Иаков ажаап кааннар.

Currently Selected:

Эге дөс 35: TUV

Highlight

Copy