Эге дөс 37

Иосифтиң дүштери

1Иаков ачазының турумчуп алган чери – ханаан черге чурттай берген. 2Иаков биле ооң үре-салгалының дугайында чугаа бо-дур.

Он чеди харлыг элээди оол Иосиф ачазының кадайлары Валла биле Зелфаның оолдарынга дузалажып, олар-биле кады мал кадарып турган. Иосиф акыларының четпес талаларының дугайында ачазынга чугаалап турган. 3Израиль кырый бергенде, Иосиф төрүттүнген боорга, ачазы аңаа өске оолдарындан артык ынак турган. Ынчангаш аңаа онзагай чараш хепти белекке берген чүве-дир. 4Акылары Иосифке ачазы олардан артык ынак деп чүвени көрүп кааш, ону көрбестей бергеннер. Ынчангаш ооң-биле чымчак чугаалажып шыдавас апарганнар.

5Бир катап Иосиф дүш дүжээш, акыларынга чугаалаарга, олары ону оон-даа артык көрбестей бергеннер. 6Ол акыларынга мынча дээн: «Мээң дүжүмнү дыңнап көрүңер даан. 7Бир-ле шөлге бис моожалар баглап турар бис. Хенертен мээң баглаан моожам туруп келгеш, дорт туруп аарга, силерниң моожаларыңар долгандыр тургулапкаш, мээң моожамга мөгейип турар чорду».

8Акылары аңаа: «Сен бисти хааннап, бисти чагырар деп бодап турар кижи сен бе?» – деп харыылааннар. Ынчангаш Иосифти ол дүжү дээш база ооң сөстери дээш оон-даа артык көөр хөңнү чок апарганнар. 9Иосиф база бир дүш дүжээш, ону акыларынга чугаалаан: «Мен ам база дүш дүжедим. Ында хүн, ай база он бир сылдыс меңээ мөгейип турдулар». 10Ол дүжүн ачазынга база акыларынга чугаалап бээрге, ачазы ону: «Ол чүү ындыг дүштер дүжеп турар кижи сен? Бис шупту: мен, аваң база сээң акы-дуңмаларың сеңээ барып, черге чедир мөгеер улус бис бе?» – деп кончаан. 11Акылары аңаа ажынып-хорадаан, а ачазы ол бүгүнү сактып алган.

Иосифтен акыларының өжээн негээни

12Акылары ачазының малын кадарып, Сихемче чорупкан соонда, 13Иаков оглу Иосифке: «Сээң акыларың Сихемде мал кадарып турар болгай#Э. д. 33:18. Сени база оларже чорудуптайн, ынаар бар» – деп чугаалаан.

Ол: «Чаа» – дээн.

14Ачазы: «Акыларың кадык-чаагай-дыр бе, мал-маган онча-менди-дир бе – барып көргеш, харыызын меңээ дыңнадыр сен» – деп чагааш#1 Хаан. 17:18, Хеврон шынаазындан чорудупкан. Иосиф Сихемге чедип келгеш, 15ховуга азып чорда, аңаа бир-ле кижи таваржы бергеш: «Чүнү дилеп чор сен?» – деп айтырган.

16«Акыларымны дилеп чор мен. Олар кайда мал кадарып турар ирги? Айтып берип көрүңерем» – деп, ол дилээн.

17«Олар моон чоруй барганнар. „Дотанче чоруур бис“ дижип турганын дыңнаан мен» – деп, ол кижи харыылаан. Иосиф акыларын дилеп чорааш, Дотандан тып алган#4 Хаан. 6:13.

18Акылары Иосифти ырактан-на эскерип кааш, ол чоокшулап олурда, ону өлүрерин дугуржуп эгелээннер. 19-20«Дүш көөр киживис бо кел чор. Ону өлүрүп кааш, оңгарже киир октапкаш, „Араатан аңнар үзе-чаза соп каан“ дээр бис. Ооң дүштери канчаар бүдерин ынчан таптыг көөр бис» – деп дугурушканнар. 21Ол бүгүнү Рувим дыңнап кааш: «Ону өлүрбээлиңер» – дээн сөстери-биле Иосифти камгалап каан. 22Рувим оларга: «Аңаа хол чедип, ооң ханын төкпеңер. Ооң орнунга ону ээн кургаг ховуда бо оңгарже киир октаптыңар» – дээн. (Шынында Рувим ону камгалап кааш, ачазынга эгидип бээр деп бодаан.) 23Иосиф акыларынга чедип кээрге, олар ооң кедип чорааны онзагай чараш хевин уштуп алгаш, 24ону туткаш, суг шыгжаар оңгарже киир октапканнар. Ол үеде оңгар кургаг, ында суг-даа чок чүве-дир#Иер. 38:6; Зах. 9:11.

25Алышкылар чемненир дээш олуруп алгаш, измаил сөөктүг садыгжыларның Галаадтан чиң сөөрткен тевелерин көрүп каан. Тевелерде чаагай чыттыг янзы-бүрү чуктар чүдүрүп каан, оларны Египетче чедирери-биле аппар чыткан болган. 26Иуда акы-дуңмаларынга: «Дуңмавысты өлүрүп алгаш, ооң өлүмүн чажырарывыска-даа, ооң биске ажыы чүү деп? 27Ону өлүрбээлиңер, ол бистиң хан төрээн дуңмавыс болгай. Ооң орнунга ону измаилчилерге#Э. д. 25:12-16 садыптаалыңар» – дээн. Олар Иуда-биле чөпшээрешкеннер. 28Кажан Мадиан чурттуг садыгжылар оларның чаны-биле эртип чыдырда, алышкылар Иосифти оңгардан ужулгаш, чээрби шекел мөңгүнге садыпканнар. Оон садыгжылар Иосифти Египетче аппарганнар.

29Рувим катап оңгарга чедип кээрге, ында Иосиф чок болган. Качыгдалдан ол идик-хевин ора соп каапкан. 30Ол дуңмаларынга чедип келгеш: «Иосиф чок-тур! А мен, мен ам канчаар мен?» – деп айтырган. 31Серге өзээш, ооң ханын дуңмазы Иосифтиң чараш хевинге борап алгаш, 32ол хепти ачазынга эккеп бергеш: «Бис бо хепти тып алдывыс. Танып көрүңерем, силерниң оглуңарның хеви-дир бе азы өске-дир бе?» – деп айтырганнар. 33Ачазы оглунуң хевин танып кааш: «Мээң оглумнуң хеви-дир! Араатан аң ону тудуп чипкени ол-дур! Оглумну үзе-чаза соп чипкени ол-дур!» – деп ыглаан. 34Иаков бодунуң идик-хевин ора соп каапкаш#Иов 1:20, качыгдал хевин белинге ораап алгаш, оглу дээш хөй-ле хүннер иштинде ыглап-сыктап келген. 35Уруглары болгаш оолдары ону аргалаар дээш чыглып келгеннер. Ынчалза-даа ол аргаланыр хөңнү чок болуп: «Муңгаралым-биле кады оглумнуң соондан алдыы оранче чоруй баар мен» – дээр болган. Оглу дээш ачазы ынчаар кажыыдап ыглаан. 36Ол үеде Мадиан чурттуг садыгжылар Иосифти Египетке эккелгеш, Потифар деп кижиге садыпкан. А Потифар дээрге фараоннуң камгалакчыларының даргазы чүве-дир.

Currently Selected:

Эге дөс 37: TUV

Highlight

Copy