Эге дөс 49

Иаковтуң бодунуң оолдарын алгап-йөрээгени

(Ы. х. к. 33:1-24)

1Иаков оолдарын кыйгырып алгаш, мынча дээн: «Чыглып келиңер, келир үеде силерни чүү манап турарын чугаалап берейн. 2Бээр четкилеп келгеш, ачаңар мени – Израильди дыңнаңар, оолдарым!

3Дун оглум Рувим!

Мээң шыдалым, мээң үре-салгалымның баштайгызы,

эң-не тергиин болгаш күчүлүг сен.

4Үер суу дег хөделип чордуң,

ынчангаш сен тергиидевес сен.

Чүге дээрге сен адаң мээң орун-дөжээмче үнүп,

чыдынымны бужартаткан сен#Э. д. 35:22; Лев. 18:7; Иез. 22:10.

5Симеон биле Левий алышкыларның хылыш-чепсээ

каржы чорукту кылган-дыр!#Э. д. 34:25-29

6Оларның сүлчээзиниң деткикчизи эвес мен,

мээң ат-алдарым оларныынга каттышпас.

Олар ажынып-хорадааш, кижилер өлүрүп каан-дыр;

туразы улгадып, мал-маган кемдеткен-дир.

7Оларның каржы-дошкун кылыы, араатанзыг килеңи каргаттырар!

Иаковтуң салгалының аразынга оларның үре-салгалын тарадып,

израиль чоннуң аразынга үлеп чорудуптар мен!#Сан. 35:2; Иис. 19:9

8Иуда! Сени ха-дуңмаң алгап-мактаар.

Дайзыннарыңны доңгайтыр базар сен,

кады төрээннериң сээң мурнуңга мөгеерлер#1 Чыл. 28:4.

9Сен олча тыпкан аныяк арзылаң дег-дир сен, оглум Иуда!#Ажыд. 5:5

Халдаарынга белеткенген араатан дег-дир сен.

А ону кым дүвүредип диттир боор!#Сан. 23:24; 24:9

10Иуда эрге-дужаал даянгыыжын холдан салбас,

чагырыкчының эргези оон кажан-даа адырылбас#Сан. 24:17;

үези кээрге, албан-үндүт төлеп#49:10 Еврей сөзүглелде «албан-үндүт төлеп» деп сөстерниң утказы эки билдинмес. Оларның болгу дег өске уткалары мындыг: «Силом хоорайга ол чедип кээп», «тайбың кижи бооп чедип кээп», «аңаа хамааржыр чүвезин ап». , чоннар аңаа чагыртыр.

11Ооң элчигеннерин чимистиг ыяшка безин баглап болур,

виноградының ханды-арагазы, идик-хеп чуп болгу дег, хөй болур#49:11 Бо шүлүктүң болгу дег утказы – «Иуданың салгалының чери кайгамчык элбекшилдиг болур». .

12Арага-хымыстың хөйүнден оларның карактары кылаң,

сүттүң хөйүнден диштери ак болур.

13Завулон корабльдар эжиндирип кээп турар далай эриинге чурттаар.

Ооң ээлээн чериниң кызыгаары Сидон хоорайга чедир#Иис. 19:10-16.

14Иссахар – чүък аразында чыдыпкан шыырак элчиген дег.

15Дыштанган чери эки, беримчелиг деп чүвени ол көрүп кааш,

чүъктү эктинге каап алгаш, албадал адаандан ажылдап эгелээн.

16Израильдиң бир аймаа болгаш, Дан бодунуң чонун шын шиидер#Э. д. 30:6.

17Дан орукка чылан болзун, шагар чылан дег, орук дозар болзун!

Аъттың будунче шаптарга, ооң мунукчузу ойта кээп дүжер болзун!#Башт. 18:27

18Сээң камгалалыңга идегеп тур мен#Ыд. ыр. 118:166, Дээрги-Чаяакчы!

19Гадче дээрбечилер халдай берзе,

оларның боттарын ызыртыр сүргеш, үптээр.

20Асирниң аъш-чеми элбек, ол хааннарны хандырар.

21Неффалим – хостуг чээрен-дир, ол чараш ажы-төл төрүүр#49:21 Бо домактың болгу дег өске утказы мындыг: «Неффалим – улуг ыяш, ооң будуктары сырый, чараш». .

22Иосиф – суг кыдыында аныяк элчиген дег,

даг эдээнде оъттап турар чаваа дег#49:22 Еврей сөзүглелде бо домактың утказы эки билдинмес. Ооң болгу дег өске утказы мындыг: «Сугнуң кырында турар хөй чимистиг ыяш-тыр. Ооң будуктары хананы бүргеп алган». .

23Ча адыгжылары олче халдап-даа, аткылажып-даа,

ооң-биле өжээннежип-даа турганнар.

24Ынчалза-даа Иосифтиң чазы кадыг,

холдарының шыңганнары дыңзыг болуп арткан.

Ооң күжү Иаковтуң күштүг Бурганының холдарындан келген.

Израильдиң Кадарчызы#Ыд. ыр. 22:1 болгаш Хаязы ону деткээн!

25Сээң адаңның Бурганы сеңээ дузалаар,

Күчүлүг Бурган сеңээ ачы-буян хайырлаар:

деңгер-дээрлерниң, чер адаанда сугларның,

ава амытанның ачы-буяны сеңээ чедер.

26Сээң адаңның хайырлаан йөрээлдери

үе-дүптүң дагларының ачы-буянындан,

эрте-бурунгу тейлерниң хайыразындан артык үнелиг#Ы. х. к. 33:15; Авв. 3:6.

Ол бүгү йөрээшкиннер Иосифтиң бажынче бадып келзин,

алышкыларның аразында онзагай кижиниң тейинче бадып келзин#Ы. х. к. 33:13-17.

27Вениамин дээрге араатан бөрү-дүр ол.

Эртен эрте ол бодунуң олчазын хемирип орар,

кежээ тывыжын үсперлеп турар#Башт. 20:21, 25».

28Израильдиң он ийи аймаа ол-дур. Оларның адазының оларга берген алгыш-йөрээли ындыг болган. Аймак бүрүзүнге – тускай алгыш-йөрээл.

Иаковтуң өлгени

29Иаков оолдарынга мынча дээн: «Удавас мен өгбелерим соондан чоруптар мен. Мени хет Эфроннуң шөлүнде турар куйда адаларымның чанынга ажаап каар силер. 30Авраамның хууда орнукшудулга чери кылдыр хет Эфрондан садып алганы, ханаан черде Мамре чоогунда Махпела шөлүнде турар куй ол-дур. 31Ында Авраам болгаш ооң кадайы Сарраны, Исаак болгаш ооң кадайы Ревекканы ажааган болгай#Э. д. 23:16-19; 35:29. Ында мен Лияны база ажаап каан мен. 32Ол шөлдү болгаш ында куйну хет чондан садып алган болгай».

33Оолдарынга шак ындыг чагыгны берип кааш, орунунга чыдып алгаш, Иаков өлүп калган, өгбелериниң соондан өске оранче чоруй барган.

Currently Selected:

Эге дөс 49: TUV

Highlight

Copy