Лука 18

Дулгуяк кадай болгаш шииткекчи дугайында угаадыглыг чугаа

1Өөреникчилериниң үргүлчү мөргүүр#Лк. 21:36; Рим. 12:12; Эф. 6:18; Кол. 4:2; 1 Фес. 5:17 болгаш идегелин чидирбес ужурлуун көргүзер дээш, Иисус оларга угаадыглыг чугаа чугаалап берген. 2Ол мынча дээн: «Бир-ле хоорайга Бургандан-даа кортпас, улустан-даа ыятпас шииткекчи турган. 3Ол-ла хоорайга бир дулгуяк кадай чурттап чораан. Ол шииткекчиге үргүлчү кээп: „Чөптүг шииткел үндүрүп, мени хомудаткан кижиден камгалап көрүңер“ – деп дилеп шаг болган чүве-дир. 4Ынчаарга шииткекчи элээн үр ынаваан. Ынчалза-даа адак соонда ол мынча деп боданган: „Мен Бургандан-даа кортпас, улустан-даа ыятпас болзумзажок, 5бо дулгуяк кадай меңээ амыр-дыш бербестеди. Моон соңгаар мээң кулаам коңгалап, кээп-ле турбазын дээш, ооң чаргызын үзүп берейн адырам“».

6Оон Дээрги Иисус мынча дээн: «Арын-нүүр чок шииткекчиниң чүнү чугаалаанын дыңнап тур силер бе? 7А Бурган Олче дүн-хүн дивейн кыйгы салган#Ыд. ыр. 21:3; 87:2; Ажыд. 6:10, Бодунуң шилип алган улузун#Мк. 13:20; Рим. 8:33; Кол. 3:12; Тит. 1:1 канчап камгалавас чүвел? Ол харыызын саададыр деп бе? 8Бурган оларны доп-дораан камгалаарын Мен силерге чугаалап тур мен#Евр. 10:37. Ындыг-даа болза, Кижи амытан Оглу ээп келгеш, чер кырындан ындыг бүзүрелди тывар ирги бе?»

Фарисейлер болгаш үндүрүг хавырыкчыларының дугайында угаадыглыг чугаа

9Боттары чөптүг-шынныг дээрзинге бүзүрээр#Лк. 16:15, а өскелерни куду көрүп чоруур чамдык улуска Иисус дараазында угаадыглыг чугааны чугаалап берген:

10«Бирээзи фарисей, а өскези үндүрүг хавырыкчызы болур ийи кижи мөргүүрү-биле Бурганның өргээзинче кирип келген#Аж.-ч. 3:1. 11Фарисей аңгы туруп алгаш, тейлеп эгелээн: „Бурганым, мээң өске улус дег: дээрбечилер, арын-нүүр чоктар дег, самыырааннар азы оода-ла бо үндүрүг хавырыкчызы дег болбааным дээш, Сеңээ өөрүп четтирдим#Мф. 6:5. 12Мен чеди хонук дургузунда ийи катап шээрленип, ап турар бүгү олча-ажыымның оннуң бир кезиин Сеңээ берип турар-дыр мен“#Лк. 5:33; 11:42.

13А үндүрүг хавырыкчызы ырадыр туруп алгаш, дээрже карактарын көдүрерин безин диттип чадаан, а чүгле бодунга чөгенген хевирлиг хөрээн шанчып: „Бурганым, бачыттыг меңээ өршээлиң көргүс“ – дээн#Ыд. ыр. 78:9; Дан. 9:19.

14Бо кижи бажыңынче чанарда, фарисейге көөрде, Бурганга агартырып алганын силерге чугаалап тур мен. Бодун өрү көрдүнер кижи бүрүзү дора көрдүрер, а бодун дора көрген кижи бүрүзү өрү көдүртүр»#Мф. 23:12; Лк. 14:11.

Иисус болгаш бичии уруглар

(Мф. 19:13-15; Мк. 10:13-16)

15Иисус оларга холу-биле дегзин дээш, улус Аңаа бичии уругларын эккеп турган. А өөреникчилери, ону көргеш, оларны эрттирбейн турганнар. 16Ынчалза-даа Иисус бичии уругларны Бодунче кый деп алгаш, мынча дээн: «Чаш уруглар Меңээ кээп турзун, оларга шаптыктап, эртерин хоруваңар! Чүге дээрге Бурганның Чагыргазы олар ышкаш улустуу боор. 17Алыс шынны силерге чугаалап тур мен: Бурганның Чагыргазын чаш төл дег кылдыр хүлээп албас кижи канчап-даа ынаар кирбес»#Мф. 18:3.

Иисус болгаш бай кижи

(Мф. 19:16-30; Мк. 10:17-31)

18Бир дарга кижи Иисустан: «Буянныг Башкы! Мөңге амыдыралды алыр дизимзе, мен чүнү кылыйн?» – деп айтырган#Лк. 10:25.

19Иисус аңаа мынча дээн: «Мени чүге буянныг деп адап тур сен? Чүгле чаңгыс Бургандан өске, кым-даа буянныг эвес#Ыд. ыр. 105:1; 118:68. 20Ооң айтыышкыннарын билир болгай сен: кады чурттаан эжиңге өскерилбе, кижи өлүрбе, оорлава, мегелеп херечилеве, ада-иеңни хүндүлеп чор»#Хост. 20:12-16.

21Демгизи: «Мен ол бүгүнү бичиимден-не сагып келдим» – дээн#Флп. 3:6.

22Ону дыңнааш, Иисус аңаа мынча дээн: «Сенде ам-даа бир чүүл четпейн турар-дыр: бодуңда бар бүгү чүвени садыпкаш, акшазын ядыыларга үлеп беривит, ынчан дээрлерге эртине-байлактыг боор сен#Лк. 12:33. Оон чедип келгеш, Мени эдерип чорувут».

23Дарга ону дыңнааш, аажок муңгарай берген, чүге дээрге ол кедергей бай кижи чүве-дир. 24Иисус ооң муңгарай бергенин көргеш, мынча дээн: «Бай-шыдалдыг улустуң Бурганның Чагыргазынче кирери дыка-ла берге!#Ыд. ыр. 48:7-8 25Бай кижиниң Бурганның Чагыргазынче киреринден тевениң ине үдүн өттүр эрте бээри белен».

26Ону дыңнаан улус: «Ынчаарга камгалалды кым ап шыдаарыл?!» – деп айтырган.

27Иисус: «Улуска болдунмас чүвени Бурган кылып шыдаар» – деп харыылаан#Э. д. 18:14; Иов 42:2; Иер. 32:17; Мк. 14:36.

28Пётр ынчан: «Көрүңер даан, бис хамык бар чүвевисти каапкаш, Силерни эдерип чоруптувус» – дээн#Лк. 5:11.

29-30Иисус оларга: «Алыс шынны силерге чугаалап тур мен: Бурганның Чагыргазы дээш, бодунуң өг-бүлезин: ада-иезин, акы-дуңмазын, алган кадайын азы ажы-төлүн каапкаш барган кижи#Лк. 14:26 бо үедеги амыдыралында оон оранчок хөйнү, а келир үеде – мөңге амыдыралды алыр» – деп харыылаан.

Иисустуң Бодунуң өлүмүнүң дугайында үшкү удаа чугаалааны

(Мф. 20:17-19; Мк. 10:32-34)

31Бодунуң он ийи элчинин кый деп алгаш, Иисус оларга мынча дээн: «Дыңнаңар, Иерусалимче чоокшулап бар чыдыр бис, Кижи амытан Оглунуң дугайында Бурганның медээчилери дамчыштыр бижээн бүгү чүве аңаа боттаныр-дыр. 32Ону өске чоннар улузунга тудуп бериптер, олар Ону дорамчылап-бастыр, бак сөглээр база Олче дүкпүрүп-каккырар. 33Ону эттеп-согар база өлүрүп каар. Ынчалза-даа үшкү хүнде Ол катап дирлип кээр»#Лк. 9:22; 24:7; Ин. 2:19. 34Ындыг-даа болза, өөреникчилери бо бүгүден чүнү-даа билбээннер, чүге дээрге Иисустуң чугаазының утказын олардан чажырып каан болган#Лк. 2:50; 9:45.

Согур ядыы кижини экирткени

(Мф. 20:29-34; Мк. 10:46-52)

35Иисус Иерихон хоорайже#Иис. 6:1; 3 Хаан. 16:34 чоокшулап кээрге, орук кыдыынга бир согур кижи хайырлал диленип олурган чүве-дир. 36Ооң чаны-биле мөөң чон шуужуп эртип турарын дыңнап кааш, ол чүү болуп турарын айтырган. 37Олар аңаа: «Назарет чурттуг Иисус эртип бар чор» – деп харыылааннар. 38Согур кижи ынчан: «Давидтиң Оглу#2 Хаан. 7:12-16; Мф. 22:42; Лк. 1:32, Иисус! Мени кээргеп көрүңер!» – деп алгырып үнген.

39Мурнунга чоруп олурган улус аңаа: «Ыыттава!» – дижип турган, ынчалза-даа согур кижи улам ыыткыр кышкырган: «Давидтиң Оглу! Мени кээргеңерем!»

40Иисус тура дүшкеш, ол кижини эккээрин дужааган. Демгизи чедип кээрге, Ол оон: 41«Менден чүнү күзеп тур сен? Чүнү кылып берейн?» – деп айтырган.

Ол кижи: «Дээрги, карактарым көре берген болза!» – деп харыылаан.

42Иисус аңаа мынча дээн: «Карактарың көре берзин! Бүзүрелиң сени экиртип-камгалап кагды!»#Лк. 7:50; Эф. 2:8 43Согур кижиниң карактары ол-ла дораан көре берген. Ол Бурганны алдаржытпышаан, Иисусту эдерип чорупкан. А бүгү чон, ону көргеш, Бурганны алгап-мактап турган.

Currently Selected:

Лука 18: TUV

Highlight

Copy