Марк 15

Иса тоьре Пилаттынъ алдында

1Эртенъ мен бас дин куллыкшылары, аксакаллар, дин аьлимлери, савлай межлис токтас алганнан сонъ, Исады байлап, Пилатка аькетип бердилер.

2Пилат Оннан: «Сен Ювыт Патшасысынъма?» – деп сорады.

Ол явапка: «Сен айткандай», – деди.

3Бас дин куллыкшылары Ога карсы коьп шуьшлевлерди тизип шыктылар. 4Пилат Оннан тагы: «Сен эш бир явап та бермейсинъме? – деп сорады. – Сага карсы айыплавлар калай коьп экенин коьресинъ».

5Ама Иса энди бир явап та бермеди, сол себепли де Пилат сейирсинди.

Бараббадынъ босатылувы, Исадынъ оьлимге берилуьви

6Пилат халктынъ тилеги мен аьр Пасха байрамда тутнакта олтырганлардынъ бирисин босататаган эди. 7Сол заманда тутнакта Барабба деген бирев эм ога косылып козгалыс шыгарып аьдем оьлтирген йолдаслары олтыра эдилер. 8Халк коьтерилип, Пилаттан аьр дайым этетаган исин этпеге тилеп баслады.

9Пилат оларга яваплап: «Ювыт Патшасын сизге босатканымды суьесинъизбе?» – деп сорады. 10Неге десе ол бас дин куллыкшылары Исады куьншилик пен ыслап бергенлерин билетаган эди. 11Ама бас дин куллыкшылары, Исадынъ орнына Бараббады босатсын деп, халкты уйткыдылар.

12Пилат оларга: «Солай болса, сиз Ювыт Патшасы деп айтатаганынъыз бан не зат эткенимди суьесинъиз?» – деп тагы да сорады.

13Олар яне: «Кашта кер Оны!» – деп кышкырдылар.

14Пилат оларга: «Не уьшин? Ол не яманлык эткен?» – деди.

Ама олар: «Кер Оны!» – деп оннан да бек кышкырыстылар.

15Сонда Пилат, халктынъ коьнъилине етеек болып, оларга Бараббады босатты, Исады болса камышылатып, кашта керилсин деп, (аскершилерге) тапшырды.

Аскершилердинъ мыскыллавлары

16Аскершилер Исады Преториум#15:16 Преториум: тоьрединъ уьйи. деген каралдыдынъ ишине аькетип, савлай аскерши боьлигин йыйдылар. 17Ога карагошкыл-кызыл аба кийдирдилер эм шоькирли коьгем бутакларыннан таж оьрип, Онынъ басына салдылар. 18«Яшасын Ювыт Патшасы!» – деп, салам берип басладылар. 19Таяк пан басына соктылар, бетине туькирдилер эм алдында тизлериннен шоьнъкип, Ога сежде бергендей болдылар. 20Оны мыскыллаганларыннан сонъ, уьстиннен карагошкыл-кызыл абады шешип, Оьзининъ кийимлерин кийгисттилер, кашта кермеге алып йоьнедилер.

Исады кашка керуьв

21Олар, даладан келип, озып бараятырган Искендер мен Руфтынъ атасы Шимон атлы бир киренешиге Исадынъ кашын коьтерип бармага буйырдылар. 22Исады маьнеси «Бас суьек ер» болган Голгота атлы ерге алып келдилер. 23Исага мир#15:23 Мир: авырув токтатувшы даьри. карыстырылган шагыр ишпеге бердилер, ама Ол унамады. 24Оны кашка кергеннен сонъ, аскершилер, кимге не тиер деп, сыбага таслап, Онынъ кийимлерин боьлистилер.

25Оны кашта кергенлеринде уьшинши саьат#15:25 Уьшинши саьат: саьат 09:00. эди. 26Басынынъ уьстинде тактада «Ювыт Патшасы» деп, шуьши язылган эди. 27Иса ман бирге эки йолбасарды да кашта кердилер: бирин – онъ ягына, экиншисин – сол ягына. 28Соьйтип, «Ол йорыксызлар ман бирге саналды», – деп язылган соьз толды. 29Озып бараятканлар басларын шайкап, Исады яманлап: «Эй Сен, Алла уьйин бузып, уьш куьнде янъыдан туьзуьвши! 30Оьзинъ-Оьзинъди куткар, каштан туьс!» – дей эдилер.

31Сондай этип бас дин куллыкшылары эм дин аьлимлери, селеке этип, бир бирисине: «Баскаларды куткаратаган эди, а Оьзи Оьзин куткаралмайды!» – дедилер. – 32«Масих – Исраил Патшасы – энди каштан туьссин, биз соны коьреек эм Ога ынанармыз». Иса ман бирге кашта керилгенлер де Оны корладылар.

Исадынъ оьлими

33Алтыншы саьатте#15:33 Алтыншы саьат: саьат 12:00. буьтин кырал уьстин каранъалык бийледи, тогызыншы саьатке#15:33 Тогызыншы саьат: саьат 15:00. дейим тартылды. 34Тогызыншы саьатте Иса уьйкен давыс пан: «Элохи, Элохи! Лема шавактани?» – деп кышкырды. Бу соьздинъ маьнеси: «Аллам, Аллам! Сен Мени неге атып койдынъ?»

35Сонда турганлар муны эситип: «Эне каранъыз, Ильясты шакырады», – дедилер.

36Олардынъ бириси, ювырып барып, губкады ашыган шагырга малды да таякка тагып, Исага ишпеге берди: «Токтанъыз, Ильяс Оны каштан туьсирмеге келееек болса коьреек» – деди.

37Иса, куьшли давысланып, ян берди.

38Сол заманда Алла уьйиндеги перде йогардан тоьменге дейим йыртылып экиге айырылды. 39Исадынъ касында турган юзбасшы Онынъ сондай давыс шыгарып ян бергенин коьрип: «Шынтылай да бу Аьдем Алладынъ Улы болган экен!» – деди.

40Сол ерде эректен карап турган хатынлар да бар эдилер. Олардынъ арасында магдалашы Марьем, кишкей Якуп пан Юсуптынъ анасы Марьем, Салиме де бар эдилер. 41Олар, Иса Галилеяда болган заманда, Онынъ артыннан иерип юрип, Ога ярдам этетаган эдилер. Иса ман бирге Ерусалимге келген баска коьп хатынлар да бар эдилер.

Исады кабырга салув

42Энди кеш болды, сол куьн аьзирлик куьн, баскаша айтканда, шабат алдындагы куьн эди. 43Межлистинъ оьрметли агзасы болган, Алла Патшалыгын саклаган араматияшы Юсуп келди эм, тартынмай Пилаттынъ янына барып, Исадынъ илесин тиледи. 44Онынъ оьлгенин эситкенде, Пилат сейирсинди эм юзбасшыды шакырып: «Коьп болама оьлгени?» – деп сорады. 45Юзбасшыдан сорап билгеннен сонъ, илесин Юсупка берди. 46Юсуп кетен кумаш сатып алды, Исады каштан туьсирип алып, кебинледи, каяда уьнъилип этилген кабырга салды, кабырдынъ авызына тас авдарып япты. 47Магдалашы Марьем эм Юсуптынъ анасы Марьем болсалар Исады кайда салганларын карап турдылар.

Currently Selected:

Марк 15: NOG

Highlight

Copy