Yauhas 13

Yexus Ntxuav Nws Cov Thwjtim Kotaw

1Uantej hnub ua kevcai Hla Dhau, Yexus paub tias twb txog lub sijhawm uas Nws yuav tawm hauv lub ntiajteb no rov mus cuag Leejtxiv lawm. Nws yeej ibtxwm hlub Nws cov neeg uas nyob hauv ntiajteb no, Nws yeej hlub lawv kawg nkaus li.

2Thaum Yexus thiab Nws cov thwjtim tabtom noj hmo, dab ntxwgnyoog twb los tshoov Yudas uas yog Ximoos Ixakali-aus tus tub lub siab, kom nws ntxeevsiab rau Yexus lawm.#13:2: dab ntxwgnyoog … ntxeevsiab rau Yexus lawm; lossis dab ntxwgnyoog twb txiavtxim siab tau lawm hais tias, Yudas uas yog Ximoos Ixakali-aus tus tub yuav ntxeevsiab rau Yexus. 3Yexus paub tias Leejtxiv twb muab ibpuas tsavyam tso rau Nws kav lawm; thiab paub tias Nws los ntawm Vajtswv los thiab Nws yuav rov mus cuag Vajtswv. 4Yogli ntawd, Nws thiajli sawv tawm ntawm lub rooj mov, hle Nws lub tsho ntev thiab muab ib txoj phuam los sia ntawm duav. 5Ces Nws txawm muab dej hliv rau hauv lub tais phiab thiab pib ntxuav cov thwjtim kotaw thiab muab txoj phuam uas Nws sia ntawm duav los so. 6Thaum Yexus ntxuav los txog ntawm Ximoos Petus, Ximoos Petus txawm hais rau Yexus hais tias, “Tus Tswv, Koj yuav ntxuav kuv li kotaw thiab lov?”

7Yexus teb tias, “Tamsim no koj tseem tsis tau totaub qhov uas Kuv tabtom ua no, tiamsis lwmhnub koj yuav totaub.”

8Petus hais tias, “Koj yuav ntxuav kuv kotaw tsis tau hlo li!”

Yexus teb tias, “Yog Kuv tsis ntxuav koj kotaw, koj yuav tsis muaj feem koom nrog Kuv.”

9Ximoos Petus teb tias, “Tus Tswv, yogli no tsis txhob yog ntxuav kuv kotaw xwb! Thov ntxuav kuv tes thiab taubhau huv tibsi!”

10Yexus hais tias, “Tus uas twb da dej lawm, nws lub cev yeej huv lawm, tsis tas yuav rov ntxuav dua; tsuas yog ntxuav kotaw xwb tau lawm.#13:10: Tej phau ntawv qub uas xuas tes sau, tsis muaj tsuas yog ntxuav kotaw xwb tau lawm. Nej txhua tus puavleej huv lawm, tsuas yog tshuav ib tug xwb.” ( 11Yexus twb paub lawm hais tias tus twg yog tus uas yuav ntxeevsiab rau Nws; vimli ntawd Nws thiaj hais tias, “Nej txhua tus puavleej huv lawm, tsuas yog tshuav ib tug xwb.”)

12Tomqab Yexus ntxuav lawv kotaw tas lawm, Nws rov muab Nws lub tsho ntev los hnav thiab rov los zaum Nws lub chaw ntawm rooj mov. Yexus nug cov thwjtim hais tias, “Nej puas totaub txog qhov uas Kuv nyuamqhuav ua rau nej no? 13Nej hu Kuv ua Xibhwb thiab tus Tswv, nej hu li ntawd raug lawm, rauqhov Kuv yeej yogli ntawd. 14Kuv yog nej tus Tswv thiab yog nej tus Xibhwb, Kuv twb ntxuav nej li kotaw. Yogli ntawd, nej ib leeg yuavtsum ntxuav ib leeg kotaw thiab. 15Kuv twb ua qauv rau nej lawm, kom nej xyaum ua rawsli Kuv tau ua rau nej ntawd. 16Kuv qhia tseeb rau nej hais tias, tus tubqhe yeej tsis loj dua nws tus tswv, thiab tus tubtxib yeej tsis loj dua tus uas txib nws mus. 17Nimno nej twb paub tej no lawm, yog nej coj ua rawsli ntawd, nej yuav tau kev kajsiab lug!

18“Kuv tsis yog hais txog nej txhua tus; Kuv yeej paub cov uas Kuv xaiv cia lawm. Tiamsis yuavtsum muaj rawsli Vajtswv Txojlus uas hais tias, ‘Tus uas koom nrog Kuv noj ib taig mov yuav ntxeevsiab rau Kuv.’ 19Kuv xub qhia rau nej uantej uas yuav muaj tej no, kom thaum muaj tej no tshwm tuaj, nej thiaj yuav ntseeg tias, ‘Kuv Yog tus uas Kuv hais ntawd.’ 20Kuv qhia tseeb rau nej hais tias, leejtwg uas txais yuav tus uas Kuv txib mus, tus ntawd yeej txais yuav Kuv; thiab leejtwg uas txais yuav Kuv, tus ntawd yeej txais yuav tus uas txib Kuv los.”

Yexus Qhia Txog Qhov Uas Yuav Muaj Tus Ntxeevsiab Rau Nws

(Mathais 26:20-25; Malakaus 14:17-21; Lukas 22:21-23)

21Tomqab uas Yexus hais li ntawd tas, Nws nyuajsiab heev, Nws thiaj tabmeeg muab nthuav hlo qhia hais tias, “Kuv qhia tseeb rau nej hais tias, nej cov ko muaj ib tug yuav ntxeevsiab rau Kuv.”

22Cov thwjtim ib leeg txawm saib ib leeg, lawv tsis paub tias tus uas Yexus hais ntawd yog leejtwg. 23Yexus ib tug thwjtim uas Yexus hlub heev, nws zaum npuab Yexus. 24Ximoos Petus txawm ua laj muam rau tus thwjtim ntawd thiab hais tias, “Koj nug Yexus seb tus uas Nws hais ntawd yog leejtwg?”

25Ces tus thwjtim ntawd txav zog mus rau ntawm Yexus thiab nug tias, “Tus Tswv, tus ntawd yog leejtwg?”

26Yexus teb tias, “Kuv muab ncuav ntsw thiab cev rau leejtwg, ces yog tus ntawd ntag.” Yogli ntawd, Yexus txawm muab ncuav ntsw thiab cev rau Yudas uas yog Ximoos Ixakali-aus tus tub. 27Thaum Yudas noj qhov ncuav ntawd, ces Xatas txawm nkag kiag los rau hauv nws. Yexus hais rau Yudas tias, “Koj yuav ua dabtsi los ciali ua tsuag-tsuag!” 28Cov thwjtim uas nyob ntawm rooj mov, tsis muaj ib tug totaub hais tias vim licas Yexus thiaj hais li ntawd rau Yudas. 29Vim Yudas yog tus ceev lub hnab nyiaj, ces cov thwjtim qeeleej thiaj xav tias yog Yexus txib kom Yudas mus yuav tej yam uas cheemtsum los rau lawv siv ua kevcai lossis kom Yudas muab qeeyam mus pub rau cov neeg txomnyem.

30Yudas txais nkaus qhov ncuav ntawd thiab txawm ciali tawm plaws mus. Thaum ntawd twb tsausntuj lawm.

Txoj Kevcai Tshiab

31Tomqab uas Yudas tawm mus lawm, Yexus hais tias, “Nimno twb txog lub sijhawm uas Neeg Leejtub tau koobmeej lawm; nimno Nws yuav ua rau Vajtswv tau koobmeej. 32Yog Neeg Leejtub ua rau Vajtswv tau koobmeej lawm, Vajtswv yuav ua rau Neeg Leejtub tau koobmeej ib yam nkaus thiab, Vajtswv yuav ua tamsim no ntag. 33Kuv cov menyuam 'e, Kuv yuav nrog nej nyob tsis ntev lawm. Nej yuav nrhiav Kuv, tiamsis nimno Kuv qhia rau nej ib yam li Kuv twb qhia rau cov Yudais tej nomtswv lawm hais tias, ‘Qhov chaw uas Kuv yuav mus ntawd, nej mus tsis tau.’ 34Nimno Kuv muab ib txoj kevcai tshiab rau nej: nej ib leeg yuavtsum hlub ib leeg. Kuv hlub nej licas, nej ib leeg yuavtsum hlub ib leeg ib yam li ntawd. 35Yog nej ib leeg hlub ib leeg, sawvdaws thiaj yuav paub tias nej yog Kuv cov thwjtim.”

Yexus Qhia Uantej Txog Qhov Uas Petus Yuav Tsis Lees Paub Nws

(Mathais 26:31-35; Malakaus 14:27-31; Lukas 22:31-34)

36Ximoos Petus nug Yexus hais tias, “Tus Tswv, Koj yuav mus qhovtwg?”

Yexus teb tias, “Qhov chaw uas Kuv yuav mus ntawd, nimno koj yuav nrog Kuv mus tsis tau, tiamsis lwmhnub koj yuav lawv Kuv qab los.”

37Petus nug hais tias, “Tus Tswv, uacas nimno kuv ho nrog Koj mus tsis tau? Kuv yeej txaussiab tuag rau Koj!”

38Yexus teb tias, “Koj yeej txaussiab tuag rau Kuv tiag lov? Kuv qhia tseeb rau koj hais tias, uantej qaib qua, koj yuav tsis lees paub Kuv txog peb zaug.”

Currently Selected:

Yauhas 13: MWW2022

Highlight

Copy