Yauhas 2

Rooj Tshoob Hauv Lub Zos Kanas

1Hnub thib peb, muaj ib rooj tshoob nyob hauv lub zos Kanas uas yog xeev Kalilais. Yexus niam kuj nyob rau ntawd, 2Yexus thiab Nws cov thwjtim kuj raug caw mus koom rooj tshoob ntawd thiab. 3Thaum cawv txivhmab tas lawm, Yexus niam hais rau Yexus hais tias, “Lawv cov cawv txivhmab tas lawm.”

4Yexus teb tias, “Tsis tas koj yuav hais kom Kuv ua dabtsi li, tseem tsis tau txog Kuv lub sijhawm.”

5Ces Yexus niam hais rau cov tubqhe hais tias, “Nws kom nej ua dabtsi ces nej ciali ua rawsli Nws hais.”

6Muaj rau lub hub txawb rau ntawd rawsli cov neeg Yudais siv rau txoj kevcai ntxuav cov hub ntawd ib lub twg ntim tau li ntawm 100 liv dej. 7Yexus hais rau cov tubqhe hais tias, “Nej mus nqa dej los hliv kom puv cov hub no.” Ces lawv txawm mus nqa dej los hliv puvnkaus rau cov hub ntawd, 8thiab Yexus hais rau lawv tias, “Nej hais mentsis dej nqa mus rau tus uas saib lub rooj nojhaus no.” Lawv txawm hais mentsis dej nqa mus rau nws.

9Thaum tus uas saib lub rooj nojhaus ntawd saj cov dej ntawd, cov dej twb txia mus ua cawv txivhmab lawm. Nws tsis paub tias cov cawv txivhmab ntawd yog muab qhovtwg los (tiamsis cov tubqhe uas daus cov dej ntawd paub); yogli ntawd, nws thiaj hu tus nraugvauv los 10thiab hais tias, “Leejtwg los yeej xub muab cov thawj caw los rau sawvdaws haus uantej tso, thaum sawvdaws twb haus ntau lawm, nws mamli muab cov tw los rau sawvdaws haus. Tiamsis koj ho muab cov thawj caw txivhmab uas qab tshajplaws ceev cia txog lub sijhawm no!”

11Yexus ua thawjzaug txujci tseemceeb no nyob hauv lub zos Kanas uas yog hauv xeev Kalilais; Nws tau nthuav txog Nws tus tshwjchim, thiab Nws cov thwjtim ntseeg Nws.

12Dhau ntawd, Yexus thiab Nws niam, Nws cov kwv, thiab Nws cov thwjtim txawm mus rau hauv lub zos Kapena-us thiab lawv nyob hauv tau ob-peb hnub.

Yexus Mus Rau Ntawm Lub Tuamtsev

(Mathais 21:12-13; Malakaus 11:15-17; Lukas 19:45-46)

13Twb yuav txog lub caij uas ua kevcai Hla Dhau, yogli Yexus txawm mus rau saum lub nroog Yeluxalees. 14Yexus pom tej neeg tuaj muag nyuj, yaj, nquab, thiab cov neeg pauv nyiaj nyob nplawg ntia ntawm lawv tej rooj hauv lub Tuamtsev. 15Ces Yexus txawm muab ib co hlua los ntswj kiag ua ib rab nplawm raws tagnrho lawv tej tsiaj, tsis hais tej nyuj thiab tej yaj tawm ntawm lub Tuamtsev mus; Nws muab cov neeg pauv nyiaj tej rooj ntxeev pes hlo ua rau lawv tej nyiaj npib poob dawb vog; 16thiab Nws hais rau cov neeg muag nquab hais tias, “Nej ciali nqa nej tej nquab tawm ntawm no mus! Tseg kiag tsis txhob tuaj muab kuv Txiv lub tsev ua qhov chaw ua lagluam!” 17Yexus cov thwjtim txawm ncodheev txog Vajtswv Txojlus uas hais tias, “Vajtswv, kuv mobsiab Koj lub tsev heev, npaum nkaus li hluavtaws kub hauv kuv lub siab.”

18Cov Yudais tej nomtswv los nug Yexus hais tias, “Koj puas ua tau ib yam txujci tseemceeb dabtsi qhia rau peb hais tias Koj muaj cai ua tej no?”

19Yexus teb tias, “Muab lub Tuamtsev no rhuav povtseg, thiab peb hnub xwb Kuv yuav rov ua tau dua ib lub tshiab.”

20Lawv hais rau Yexus tias, “Lub Tuamtsev no peb siv plaubcaug-rau xyoo los ua thiajli tiav, peb hnub xwb Koj yuav rov ua kom tau ib lub tshiab no lov?”

21Tiamsis lub Tuamtsev uas Yexus hais ntawd yog hais txog Nws lub cev. 22Yogli no, thaum Yexus sawv hauv qhovtuag rovqab los lawm, Nws cov thwjtim thiaj ncodheev txog tej lus uas Nws hais ntawd, lawv thiaj ntseeg Vajtswv Txojlus thiab tej lus uas Yexus hais.

Yexus Paub Txog Neeg Txhua Tus

23Thaum Yexus tseem nyob hauv lub nroog Yeluxalees uas yog lub sijhawm sawvdaws ua kevcai Hla Dhau ntawd, muaj neeg coob-coob los ntseeg Nws, rauqhov lawv pom tej txujci tseemceeb uas Nws ua. 24Tiamsis Yexus tsis ntseeg lawv siab, rauqhov Nws paub lawv txhua tus lawm. 25Tsis tas leejtwg yuav qhia rau Nws txog lawv li, rauqhov Yexus tuskheej yeej paub tias muaj dabtsi nyob rau hauv lawv lub siab lawm.

Currently Selected:

Yauhas 2: MWW2022

Highlight

Copy