Yauhas Lus Tawqhia
Lus Tawqhia
Phau Yauhas no qhia hais tias Yexus yog Vajtswv txojlus uas nyob mus ibtxhis, uas tau “los yug ua neeg thiab nrog peb nyob.” Rawsli Phau Yauhas hais, phau Txoj Moo Zoo no yog sau tseg kom txhua tus uas nyeem ntseeg tias, Yexus yog Vajtswv tus Tub, tus Cawmseej hauv Vajtswv txojlus cogtseg, thiab los ntawm lawv txoj kev ntseeg Nws, lawv yuav tau txojsia (20:31).
Tomqab cov lus tawqhia uas qhia hais tias Vajtswv txojlus yog Yexus tus uas nyob mus ibtxhis, thawj ntu ntawm Txoj Moo Zoo yog hais txog ntau yam txujci tseemceeb uas qhia hais tias Yexus yog Vajtswv tus Tub, tus Cawmseej hauv Vajtswv txojlus cogtseg. Tej no yog tshwm los ntawm tej txujci tseemceeb uas Nws tau ua. Thawj ntu ntawm phau ntawv no qhia hais tias muaj ibtxhia tau los ntseeg Yexus licas thiab dhau los ua Nws cov thwjtim, tiamsis ho muaj ibtxhia tawmtsam Nws thiab tsis kam los ntseeg. Tshooj 13-17 hais ntau kawg li txog Yexus thiab Nws cov thwjtim txoj kev sib raugzoo nyob rau hmo uas luag ntes Yexus, thiab Nws tej lus uas qhia cov thwjtim kom npaj thiab txhawb lawv lub zog uantej uas Nws yuav raug ntsia rau saum ntoo khaublig. Ob-peb tshooj uas yuav kawg, yog hais txog Yexus raug ntes thiab coj mus txiavtxim, hais txog Nws tau raug ntsia rau saum ntoo khaublig thiab sawv hauv qhovtuag rovqab los, thiab Nws txoj kev uas tau los tshwm rau Nws cov thwjtim pom tomqab uas Nws sawv hauv qhovtuag rovqab los.
Zaj uas hais txog lawv ntes tau tus pojniam deev hluasnraug (8:1-11) ntawd, nyob rau hauv tus cim qhib thiab cim kaw, rauqhov ntau phau uas xuas tes sau thiab cov xub txhais lawm muab zaj no tsotseg, tiamsis lwm phau ho muab zaj no sau rau hauv ib qhovtwg cia.
Yauhas hais txog txoj koobhmoov uas yog txojsia ntev dhawv mus ibtxhis los ntawm Khetos, tamsim no txoj koobhmoov ntawd twb pib los rau txhua tus uas lees yuav Yexus ua txojkev, ua qhov tseeb, thiab ua txojsia lawm. Qhov loj thiab tseemceeb hauv phau Yauhas no yog Yauhas muab dej, ncuav, lub teeb, tus tub yug yaj thiab nws pab yaj, tsob hmab thiab cov txivhmab los ua yamntxwv qhia txog qhov tseeb uas yog lub neej ntawm sab ntsujplig.
Txheejtxheem
Zaj lus tawqhia (1:1-18)
Yauhas tus uas muab neeg ua kevcai rausdej thiab cov uas xub los ua Yexus cov thwjtim (1:19-51)
Yexus tawm mus qhuabqhia (2:1—12:50)
Lub limtiam kawg hauv Yeluxalees thiab nyob ze puagncig ntawm Yeluxalees (13:1—19:24)
Tus Tswv sawv hauv qhovtuag rovqab los thiab tshwm rau sawvdaws pom (20:1-31)
Xaus lus: rov tshwm dua hauv Kalilais (21:1-25)
Currently Selected:
Yauhas Lus Tawqhia: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.