Lukas 4

Dab Ntxwgnyoog Sim Yexus Siab

(Mathais 4:1-11; Malakaus 1:12-13)

1Yexus rovqab ntawm tus Dej Yauladees los, Nws puvnpo Vaj Ntsujplig tus Dawbhuv, thiab Vaj Ntsujplig coj Nws mus tom roob mojsab qhua; 2qhov chaw ntawd dab ntxwgnyoog tau sim Nws siab tau plaubcaug hnub. Nyob rau plaubcaug hnub ntawd Yexus yeej tsis tau noj ib yam dabtsi li, thaum dhau lub sijhawm ntawd lawm, Nws tshaib plab heev.

3Dab ntxwgnyoog txawm hais rau Yexus tias, “Yog Koj yog Vajtswv tus Tub tiag, Koj kuj hais kom lub pobzeb no txia ua mov.”

4Tiamsis Yexus teb tias, “Vajtswv Txojlus sau tseg hais tias, ‘Neeg tsis yog yuav ciajsia los ntawm zaub-mov xwb.’ ” #2Kev 8:3

5Ces dab ntxwgnyoog txawm coj Nws mus rau saum ib qhov chaw siab-siab, thiab tib ntsais muag xwb nws txawm ua kiag rau Yexus pom tagnrho tej tebchaws hauv qabntuj no. 6Dab ntxwgnyoog hais rau Yexus tias, “Kuv yuav muab tagnrho tej hwjchim thiab tej kev npluanuj no rau Koj, rauqhov tej ntawd kuv twb tau txais los ua kuv tug lawm, kuv yuav muab rau leejtwg los tau. 7Yog Koj pe kuv, txhua yam no yuav yog Koj tug.”

8Yexus teb tias, “Vajtswv Txojlus sau tseg hais tias, ‘Koj yuavtsum pehawm tus Tswv uas yog koj tus Vajtswv thiab tsuas ua Nws tes haujlwm nkaus xwb!’ ” #2Kev 6:13

9Tomqab ntawd, dab ntxwgnyoog txawm coj Nws mus rau hauv Yeluxalees thiab coj Nws mus rau saum lub ruv uas siab tshajplaws ntawm lub Tuamtsev, thiab hais rau Nws tias, “Yog Koj yog Vajtswv tus Tub tiag, Koj kuj ciali dhia saum no mus rau hauv av. 10Rauqhov Vajtswv Txojlus tau sau tseg hais tias, ‘Vajtswv yuav kom Nws cov timtswv ceebtsheej tsomkwm Koj.’ #Nnkauj 91:11-12 11Thiab tseem muaj ib los hais ntxiv tias, ‘Lawv ob txhais tes yuav hwj Koj, kom Koj ob txhais kotaw tsis txhob ntsawm pobzeb li.’ ”

12Yexus teb tias, “Vajtswv Txojlus hais tias, ‘Tsis txhob sim tus Tswv uas yog koj tus Vajtswv.’ ” #2Kev 6:16

13Thaum dab ntxwgnyoog ua txhua yam txhua tsav sim Yexus tas lawm, nws txawm ncaim Yexus mus tos txog thaum rov muaj sijhawm dua.

Yexus Pib Ua Nws Tes Haujlwm Hauv Kalilais

(Mathais 4:12-17; Malakaus 1:14-15)

14Yexus rovqab mus rau pem Kalilais, puvnpo Vaj Ntsujplig tus Dawbhuv lub hwjchim. Nws lub moo nrov-ncha mus thoobplaws tej cheebtsam ntawd. 15Yexus mus qhia hauv lawv tej tsev sablaj, thiab txhua tus uas hnov Nws qhia, qhuas Nws kawg li.

Cov Neeg Hauv Naxalev Tsis Txais Yuav Yexus

(Mathais 13:53-58; Malakaus 6:1-6)

16Dhau ntawd, Yexus mus rau hauv lub nroog Naxalev uas Nws lojhlob. Hnub Xanpataus Nws mus rau hauv tsev sablaj rawsli Nws txeev mus. Nws sawvntsug nyeem Vajtswv Txojlus rau sawvdaws mloog, 17lawv txawm muab Yaxayas, uas yog tus xibhwb cev Vajtswv lus, thooj ntawv kauv uas tau sau cia lawm los cev rau Yexus. Yexus nthuav thooj ntawv ntawd thiab nrhiav tau zaj uas hais tias:

18“Tus Tswv tus Ntsujplig tau los rau saum Kuv,

rauqhov Nws tsa Kuv ua tus qhia Txoj Moo Zoo rau cov neeg pluag.

Nws txib Kuv mus qhia txoj kev ywjpheej rau cov neeg uas raug kaw,

thiab kho cov neeg digmuag kom rov pomkev,

tso cov uas raug kev caijtsuj kom dim #Yaxaya 61:1-2 (LXX)

19thiab qhia hais tias lub sijhawm

uas tus Tswv yuav los cawm Nws haivneeg twb los txog lawm.”

20Thaum Yexus nyeem tas lawm, Nws txawm muab thooj ntawv kauv ntawd dov thiab rov muab cev rau tus uas saib tej ntawv ntawd, ces Nws txawm zaum lawm. Txhua tus uas nyob hauv lub tsev sablaj yeej ntsiantsoov Yexus li, 21ces Nws thiaj pib qhia lawv hais tias, “Vajtswv Txojlus nqe no tau tiav hnubno rawsli qhov uas nej hnov Kuv nyeem ntawd.”

22Cov neeg ntawd qhuas thiab xav tsis thoob rau tej lus zoo uas Nws hais ntawd. Lawv hais tias, “Tus no tsis yog Yauxej tus tub lov?”

23Yexus hais rau lawv tias, “Kuv paub tias nej yeej yuav siv lo pajlug no hais rau Kuv hais tias, ‘Kws-hhomob, xub kho koj kom zoo tso.’ Thiab nej yuav hais rau Kuv tias, ‘Koj sim ua tej txujci uas peb hnov Koj ua pem lub nroog Kapena-us, rau hauv Koj lub nroog no rau peb seb.’ ”

24Yexus hais ntxiv rau lawv tias, “Kuv qhia tseeb rau nej hais tias, yeej tsis muaj ib tug xibhwb cev Vajtswv lus uas cov neeg nyob hauv nws lub zos yuav hwm nws. #Yauh 4:44 25Nej mloog Kuv hais: Kuv qhia tseeb rau nej hais tias, thaum lub sijhawm uas Eliyas nyob, muaj tej pojntsuam coob-coob nyob hauv tebchaws Yixalayees, thaum ntawd nag tsis los tau peb xyoos thiab rau hli, thiab muaj kev tshaib plab thoobplaws lub tebchaws. #1Vaj 17:1 26Txawm li ntawd los Vajtswv yeej tsis txib kom Eliyas mus pab cov pojntsuam uas nyob hauv tebchaws Yixalayees ib tug li, tiamsis tsuas yog txib nws mus pab tus pojntsuam uas nyob hauv lub nroog Xalefas hauv cheebtsam Xidoos nkaus xwb. #1Vaj 17:8-16 27Thiab thaum lub sijhawm uas tus cev Vajtswv lus Elisas nyob ntawd, muaj cov neeg mob ruas#4:27: mob ruas: lus Kilis siv lolus no rau ntau yam kab mob uas yog mob phem-phem rau ntawm daim tawv nqaij, kuj yuav tsis yog kiag mob ruas thiab. coob-coob nyob hauv tebchaws Yixalayees, tiamsis tsis muaj ib tug zoo mob ruas li, tsuas yog Na-amas uas yog neeg Xilias tibleeg thiaj zoo xwb.” #2Vaj 5:1-14

28Thaum cov neeg uas nyob hauv lub tsev sablaj hnov Yexus hais li ntawd, lawv txhua tus chim heev. 29Lawv txawm sawvtsees, muab Yexus cab tawm hauv lub nroog mus, thiab coj Nws mus rau saum lub hauv tsua uas lawv rhawv lub nroog ntawd. Lawv npajsiab yuav muab Yexus thawb rau hauv qabtsuas, 30tiamsis Yexus ciali phua plhawv hauv cov neeg coob-coob ntawd mus thiab khiav lawm.

Tus Txivneej Uas Raug Ib Tug Ntsujplig Phem

(Malakaus 1:21-28)

31Tomqab ntawd, Yexus txawm nqis mus txog rau ntawm lub nroog Kapena-us uas nyob hauv lub xeev Kalilais, thiab hnub Xanpataus Nws qhia cov neeg sawvdaws. 32Cov neeg ntawd xav tsis thoob txog tej lus uas Yexus qhia, rauqhov Nws qhia li ib tug uas muaj hwjchim heev. #Math 7:28-29 33Nyob rau hauv lub tsev sablaj ntawd, muaj ib tug txivneej raug dab phem li ib tug ntsujplig, nws txawm qw nrov-nrov hais tias, 34“Ab! Yexus uas yog neeg Naxalev, Koj tuaj tabkaum peb ua dabtsi? Koj yuav tuaj rhuav kom peb puastsuaj puas yog? Kuv paub tias Koj yog leejtwg, Koj yog tus Dawbhuv uas los ntawm Vajtswv los!”

35Yexus hais tawv-tawv rau tus ntsujplig phem ntawd hais tias, “Koj tsis yeem haislus, koj ciali tawm kiag hauv tus txivneej no mus!” Tus dab txawm ua rau tus txivneej ntawd ntog kiag rau hauv av tabmeeg sawvdaws, ces dab txawm tawm plaws mus thiab tsis ua rau tus txivneej ntawd raug mob li.

36Cov neeg coob-coob ntawd xav tsis thoob thiab sibtham zomzaws hais tias, “Tej lus ntawd yog lus dabtsi? Nws muaj cai thiab muaj hwjchim ntiab tau cov ntsujplig phem ntawd ua rau lawv ciali tawm plaws mus lawm!” 37Yexus lub moo txawm nrov-ncha mus thoobplaws cheebtsam ntawd.

Yexus Kho Ntau Leej

(Mathais 8:14-17; Malakaus 1:29-34)

38Yexus txawm tawm hauv lub tsev sablaj thiab mus rau hauv Ximoos tsev. Ximoos niamtais uanpaws ua rau nws kub cev heev. Lawv thov kom Yexus pab nws. 39Yexus txawm mus sawv ib sab ntawm Ximoos niamtais lub txaj pw, thiab hais kom tus npaws ciali tu. Ces tus npaws txawm tu thiab nws sawvtsees tamsim ntawd los tiam lawv.

40Thaum hnub yuav poobqho, txhua tus uas muaj tej phoojywg uas muaj mob, lawv txawm nyias taus nyias coj cov muaj mob ntawd tuaj cuag Yexus; Yexus tsa tes rau saum lawv txhua tus, ces lawv txawm zoo mob huv tibsi lawm. 41Muaj ntau tus dab tau tawm hauv ntau tus neeg mus, thiab qw nrov-nrov tias, “Koj yog Vajtswv tus Tub!”

Tiamsis Yexus txwv tsis pub cov dab ntawd haislus, rauqhov lawv paub tias Yexus yog tus Mexiyas.

Yexus Qhuabqhia Hauv Tej Tsev Sablaj

(Malakaus 1:35-39)

42Thaum kajntug, Yexus tawm hauv lub nroog mus rau ib qhov chaw uas nyob ntsiagto. Tej neeg nrhiav Yexus kawg li; thaum lawv nrhiav tau Nws lawm, lawv cheem tsis pub Nws mus. 43Tiamsis Nws hais rau lawv tias, “Kuv yuavtsum mus qhia Txoj Moo Zoo uas hais txog Vajtswv lub Tebchaws rau lwm lub nroog thiab, rauqhov Vajtswv yeej txib kom Kuv los ua tes haujlwm ntawd.”

44Yogli ntawd Yexus thiaj mus qhuabqhia hauv tej tsev sablaj uas nyob txhuanrho lub xeev Yudas.

Currently Selected:

Lukas 4: MWW2022

Highlight

Copy