MIINIIÑ 1
1
1 #
Lk 1.1-4. Kapyo daka kheta ho, O Tihopilus, ngo hikha Jisu ka miigo miiri biiniiñmi ho tonsḛr ribii niimi keto, 2mohmika chagii lyiku allo lohepa, mo Darii Yajiyallo loka lujubiniiñ mi kiiniñkonii atañmi bikulala humina mo kahe tiinii. 3Mohlumi mo attohmi turdopa kakiñ siitii mo shiitii hekula abuje kakiñ kengiñ naniiñlo, mohluka agiñho allo loalyañpiilye dabotii, ho Pinii ka raddeganda mi lukotii. 4#Lk 24.49. Ho mohluka agiñho dabodala mo mohlumi lutii Jerusalem hokii ingu lyayo, hojalo Aba ka hemme biniiñ mi kalya tolya, nii mina, mo lutii nii, “nunu ngiiko hokii tapa tiinii, 5Jon yasie lo baptisma bitii, hojalo allo abu loma rampa nunu Darii Yajiyallo lo baptisma biko kendoke.”
Jisu mi Dariiganda ho Chagii Tiiku
6Hopa mohlu tongepa ahkuñ biila, mohlu mohmi takatii, “Attoh, no siika myodu so Isrel ka raddeganda mi penti talyiha?” 7Mo mohlumi lutii, “Siikasi nunupa chindopa lyimake myodu myolo mi nii mina Aba mohka otority lo miimyo tiinii. 8#Lk 24.48-49. Hojalo nunu harchichike mi larii kendoke Darii Yajiyallo ka nunukoka ahlyi ho; ho nunu ngiika haki pa dukiñdo Jerusalem ho, hikha Judia ho, ho Samaria ho, ho hikha kiiddi dotḛrso.” 9#Lk 24.50-53. Ho mo siimi luku lala, mohluka kala dorañpa, mohmi chagii tiiku, ho jomii mohmi hipu biitii mohluka kadopa. 10Ho mohlu yapuñ ho kala dotiirañ mo ila dorañpa, kato, miyu anye puloo pulye giitola mohluka aruñho daritii, 11ho lutii, “Galili daka miyuatañ, niimpa nunu dala yapuñ ho kala da? Siika Jisu, humina nunukokii dariiganda ho chagii nekunii, ahkur kendo si chulipa niihtañpa nunu mohmi dariiganda ho chadopa kappatii.”
Judas Duko Hoka Dusibo
12Ho mohlu Jerusalem ho ahkur tiiku Olivet luniiñ putoo hokii, niihna Jerusalem aruñho dotiinii, dumoalo ka myodi boniiñ kane adho; 13#Mt 10.2-4; Mk 3.16-19; Lk 6.14-16. ho mohlu ahbiikula, mohlu chidii ayoho chatii, hiikoho mohlu dutii, Pitar ho Jon ho Andrew, Pilip ho Tomas, Bartolomiu ho Methu, Alpayas ka oho Jems la Zealot daka Saimon ho Jems ka oho Judas. 14Hikha siika atañ tongepa miilañru kuniiñ ho hengatii, annii akha atañ agiñho ho Jisu ka annii Mary agiñho, ho mohka anubarmii agiñho.
15Hiika myodu ho Pitar mohluka apurho guritii (hoka miyu dukuñnii hii lange la nyikhañ hepa dutii), ho lutii, 16#Mt 27.3-10. Anubarmii atañ, piniipota mi lyipe kiine kendoke, nii mina Darii Yajiyallo bilo lutiinii David ka aguñ lo, Judas ka piigo mi huna Jisu mi latu kiine dupa lembo pagii tiinii. 17Niimpalukoda mohmi ngunuka punkoho khiitola doku, ho mohpanii mi tache tola doku siika miigoso. 18(Siisi siika miyu si aji ngohe riitii mohka diimmah miijolo; ho chuku nyarila shiitii mo liipa jaho buchetii ho hikha mohka akhii erre bute lintii. 19Ho hiimi hikha Jerusalem daka dunii atañ chintiiku, hopa aji mi mohluka aguñpa Akeldama lutii, hiika hii, Ai ka Aji.) 20Hiila ketola do Assañbiisie ka kheta ho,
Mohka duko mi jirara doke nento,
ho hiikaho kone mitrḛ sanke neyo;
ho
Mohka duko mi mih kone yami dusi kiineto .
21Hopa miyu kone huna ngunu agiñho kiirañ dabo montiinii Attoh Jisu ka ahlyiho ho lilyi ho ngunu agiñho, 22lotujaho hokii Jon ka baptisma bilyi hokii khiiri biila mohmika ngunu apur hokiika chagii menda hemi, ngunu punko hokii siika miyu mi ngunu agiñho dagii kendo mohka turiturku kuniiñ mi haki binii pa. 23Ho mohlu anye mi hataho leliñtii, Josep Barsabbas luniiñ bomi, humina Justus hiila myangiñ tiinii, ho Matthias. 24Ho mohlu kutii ho lutii, “Attoh, hikha miyu ka ahha mika chiniiñ, kakiñpe siika anye sokii humina no kahe tiinii 25siika miigo siimi ka miisi niipa ho Judas ka inkur kuko kiiniñ nensi dupa, mohluka attoh gandaho inniipa.” 26Ho mohlu mo anyepa pota tuka siitii, ho Matthias pa pota tucha tii; ho mohmi alyañlenkuñhe kiiniñkonii atañ agiñho keliitii.
Currently Selected:
MIINIIÑ 1: APATBSI
Highlight
Share
Copy
Want to have your highlights saved across all your devices? Sign up or sign in
Apatani New Testament - NITI GONTU
Copyright © The Bible Society of India, 2014.
Used by permission. All rights reserved worldwide.
