MIINIIÑ 12
12
Abuyapa ka Miihimiirenii
1Hiika myodu ho Herod radde hempḛr uro payagaya la miitii gyoliñkonii agiñ hoka dabo nii atañmi. 2Mo Jon ka anu Jems mi mentii ilyo la; 3ho mo siika miiniiñ Jew atañmi hempyo miipa do kala lala, mo Pitar mitrḛ latu dupa intii. Siikasi Ipomiiyo manii Yatañ dituñ allo myodu ho. 4Ho mo mohmi latu lala, mo mohmi patiihude ho tuntii, ho mohmi tompe dagur biinii sipahi nembitii mohmi dagur biiniipa, hiila hela Impobiiniiñ dituñ soku lala mohmi miyuatañ ko lingii talyi hiila. 5Hopa Pitar mi patiihude ho atiitii; hojalo uropa kuniiñ mi kubila mohpa Pinii kokii miitii gyoliñkonii atañ.
Pitar mi Pattiih ude Hokii Ago Lingii tiiku
6Hiika ayoh jaho Herod ka mohmika ago hoka lingii dupa miido jaho, Pitar dagur biinii anye ka punko imila dokele, dachañ ranyi sonye lo rako tola, ho sipahi alyeh ho patiihude mi dagur biitii; 7ho kato, Attoh ka miidopopi ahtii, ho patiihude ho hutoh byohatii; ho mo Pitar mi aruñho hinne lala ho mohmi ahutii, lubiidola, “nyibya pa gurito.” Ho dachañ ranyi hii mohka alah hokii hupa lyutii. 8Ho miidopopi mohmi lutii, “Abitarii giito ho niika nyotananii mi giito.” Ho mo hiila miitii. Ho mo mohmi lutii, “Niika pulye mi payu giila ho ngiimi imbo monto.” 9Ho mo agoho lintii ho mohmi imbomontii; mo hang chimatii niihna miidopopi miitiinii hii jije hiila, hojalo mo hentii mihu kappatii hiila. 10Mohlu kapyo la anyenii dagur bomi impo kula la, mohlu dachañ hagya ho lichi tiiku citi hoka lingii ko. Hiika hii mohlupa atoh atoh pa miiko bitii, ho mohlu hopa lintii ho lembo byahe pa impo biitii; ho ohepada miidopopi mohlumi apatela intiiku. 11Ho Pitar mo atohpa ahla. Ho lutii, “Siisi ngo hendḛr doku Attoh mohka miidopopi mi kiiniñtii ngiimi tupya dupa, Herod ka alah hokii ho hikha Jew miyu atañka hemmyo nii hokii.”
12Mo siimi hendḛr lala, mo Mary ka ude ho intii, Jon ka annii ko humina Mak hiila myantiinii, nohna abuje tongepa dakuñ dala ho kunya tiinii. 13Ho hagya daka alyeh mi padiñ kiile, nyimii miira Roda hiiniiñbo lintii lukodupa. 14Pitar ka aguñmi tala la, hempyo la mo hagya mi miiko matii hojalo hakur habiila ho lukotii Pitar hagya si da hiila. 15Mohlu mohmi lutii, “No rundu pa.” Hojalo mo luti lukañtii hiila ke du. Mohlu lutii, “Siikasi mohka miidopopi ke!” 16Hojalo Pitar padiñ pakañtii; ho mohlu miiko kiile, mohlu mohmi kapa lala ho hemur nyatii. 17Hojalo mohlumi mohka alahlo miikiñ biidola aduyo lutii, mo mohlumi lukotii niihtañpa Attoh mohmi patiihude hokii lingii tiiku. Ho mo lutii, “Siika siimi Jems mi ho anubarmii atañmi lukoto.” Ho mo intiiku ho pongelya gandaho intii.
18Siisi allo kukele, hiiko hempḛr hemur nyatii sipahi atañ niihna Pitar ko lyitiinii. 19Ho Herod mohmi mekele ho mohmi mepa matii, mo dagur biinii atañmi taka tara lala ho mohlumi shiido pa miito hiila lubiido. Ho mo Judia hokii Kaesarea ho totii, ho hiiko dutii.
Herod ka Shiiniiñ
20Siisi Herod Tayer la Sidon nyika miyu atañmi hadiitii; ho mohlu tonge pa mohko ahtii, ho Blastus mi lyarpyotii, radde kiimi ka kalya binii, mohlu chimie bipe hiila kutii, niimpalukoda mohluka ganda hii radde ka ganda mi hentiñ tii diigopa. 21Khiibi tola ka donii allo ho Herod mohka radde guju mi giitii, mohka radde duko ho dutii, ho mohlumi lutii. 22Ho miyuatañ gyutii, “Aguñ si pinii kii, ho miyu kiima!” 23Ohepada Attoh ka miidopopi mohmi hitii, niimpalukoda mo Pinii mi assañdiilañ bimatii; ho mo tiho atañlo diikotii ho shiitii.
24Hojalo Pinii ka aguñ hii sanchatii ho impyainsatii.
25Ho Barnabas la Sol nyi Jerusalem hokii ahkur tiiku mo anye ka miigomi miija tekula, mo anye ka agiñho Jon mi ahta giitii humi na Mak hiila myantii nii.
Currently Selected:
MIINIIÑ 12: APATBSI
Highlight
Share
Copy
Want to have your highlights saved across all your devices? Sign up or sign in
Apatani New Testament - NITI GONTU
Copyright © The Bible Society of India, 2014.
Used by permission. All rights reserved worldwide.
