MIINIIÑ 8
8
1 #
Miin 11.19. Ho Sol mohka shiiniiñ mi ḛh hiila talii biido
Sol Gyoliñkonii Atañ mi Miihimiire Biido
Ho hiika allo ho hempḛr uro miihimiire miiri nyatii Jerusalem daka gyoliñkonii atañmi; ho mohlu hikha harpya harsa haja giitii Judia ho Samaria gandaho, kiiniñkonii atañmi apalala. 2Henjenii miyuatañ Stepen mi alie tiiku, ho mohpa hempḛr heru nyatii. 3Hojalo Sol gyoliñkonii atañmi pyadu lopa miitii, ho ude pinge abi ahla, mo nyimii milobomi seliñ lala ho mohlumi patiihude ho tuntii.
Ayapuyu mi Samaria ho Tonsḛrtii
4Siisi hutiina harpya harsa giitiinii ayapuyu mi tonsḛr tala intii. 5Pilip Samaria citi ho totii, ho mohlumi Kristo piigo mi gyukotii. 6Ho miyutaropa miilañru tongepa tage nyatii niihna Pilip lutiinii, mohlu mohka luniiñmi tala lala ho kagiñnanii mohka miiniiñmi kappatii. 7Niimpalukoda kacho yajiyallo abuje miyu kokii lintii ku hutiina jarpiñ kobii tiinii, hempḛr uropa gyubii dola; abuje hutiina liikuñlamu tiinii ho liicha tiinii hempyo nyatiiku. 8Hopa hiiko hempḛr hempyo nyatii citi ho.
9Hojalo hiiko miyu kone Saimon hiila datii mo kapyo ho ashu miila citi ho datii ho Samaria ganda mi hemur dopa miitii, lubiidola mo attoh tiirḛ kahe kone ke hiila. 10Mohlu hikha mohmi tage nyatii, atu hokiila khiiri biila kaheja lohepa, lubiidola, “Siika miyu ko hiika Pinii ka harchichike giidonii mina Kahe hiila ludu nii.” 11Ho mohlu mohmi tage nyatii, niimpalukoda hempḛr myodu abuje mo mohlumi hemur dopa miitii mohka ashu miiniiñlo. 12Hojalo mohlu Pilip ka tonsḛr niimi tajetii ayapuyu Pinii ka raddeganda piigo ho Jisu Kristo ka armyañ mi, mohlu baptisma latii, nyimii milobo pada. 13Saimon mo tiirḛya henjetii, ho baptisma laku lala mo Pilip ka agiñ dabo montii ku. Ho kagiñnanii ho hempḛr kahe miimalyanii miiniiñmi kala la, mo hemurtii.
14Siisi kiiniñkonii atañ Jerusalem ho Samaria Pinii ka aguñmi talii do hiila tapa lala, mohlu Pitar la Jon nyimi mohluko kiiniñtii, 15mo anye totii ho mohlupa kubitii mohlumi Darii Yajiyallo mi larii kiine dupa; 16niimpalukoda siisi lohe pa mohluko kone kotrḛ ahma tiirañ, hojalo mohlu baptisma kontii lato la dotii Attoh Jisu ka armyañ pa. 17Ho mohlu mohluka alah atañmi mohluko tencha tii ho mohlu Darii Yajiyallo mi lariitii. 18Siisi Saimon Yajiyallo biniiñ mi kapa lala kiiniñkonii atañka alah tencha niilo, mo mohlumi tiicko biso lubiido, 19lubiidola, “Ngiimi tiirḛ siika harchichike mi bipe, niimpalukoda hukohona ngo ngiika alah mi tenga talyi nii hiimi Darii Yajiyallo larii dopa.” 20Hojalo Pitar mohmi lutii, “Niikatiicko mi niika agiñho lyuke nento, niimpalukoda no hendo no Pinii ka ahmiñayiñ mi tiicko lo lala todo hiila! 21Niiko hang giita momake malo lyimake siika miigo so, niimpalukoda niika ahha hii Pinii kata ko denki make. 22Henkur to hopa siika niika diimmah hokii, ho kuto Attohmi, miila kendo milo, niika ahha daka heniiñmi niimi hello dokupa. 23Niimpalukoda ngo kapado no poteje kariñ giido ho ingyamiigyaniilo rabii kotola biido.” 24Ho Saimon lusitii, “Ngiipa kutope Attoh mi, niihna no lutiinii hiimi ngiiko hang ahma dopa.”
25Siisi mohlu pyakotiiku ho Attoh ka aguñmi luku lala, mohlu Jerusalem ho chakur tiiku, ayapuyu mi abuje Samaritan atañka lemba ho tonsḛr biidola.
Pilip la Itopia Daka Sabii
26Hojalo Attoh ka miidopopi Pilip mi lutii, “Gurito ho inge ahadalyi lembo ho Jerusalem hokiila Gaza toko dalyiho.” Siikasi siikhiisuru lembo ke. 27Ho mo guritii ho intii. Ho kato, Itopia kone, eunuch, Kandace hoka miigiilugiibo, Itopia ka nyimiiradde, mohka hikha alḛrdrih mika kabibo, Jerusalem ho ahtii heriidupa 28ho ahkurkula dotii; goragari ho mo dutii, mo nyibuhenii Aijaya mi purila dotii. 29Ho Yajiyallo Pilip mi lutii, “Change ho siika goragari ho chabo monge.” 30Hopa Pilip mohmi harbo montii, ho nyibuhenii Aijaya mi purila dopa tapatii, ho takatii, “Niika puriniimi no chindu ha?” 31Ho mo lutii, “Niitañpa ngo chinchi, nii dahepa kone ngiimi luko tama?” Ho mo Pilip mi gyochatii ho mo agiñho dubotii. 32Siisi piniipota hokii nii mina mo ritiinii hiikahii sike:
“Subuñ mi mendu pa ingiitii
malo subuñatupa hiika amoo pinii rubido,
hopa mo mohka aguñmi gonko ma.
33mohmika ensupiira miipa koho mohmi ayakacho kaku matii.
Hu mohka halugiira mi luko lakiñdo?
Niimpalukoda mohka sango mi kiiddiapiñ hokii ingii tiiku.”
34Ho eunuch Pilip mi lutii, “Humi na, kutote ludonii, siika nyibuhenii si, mo atoh mipeha malo mi khiibe miya peha ludonii?” 35Ho Pilip mohka aguñmi gonkotii, ho siika piniipota ka kapyo jaho hokii mo Jisu ka aya puyu mi lukotii. 36Ho mo anye lembo ila dokele mo anye yasie aruñho ahtii, ho eunuch lutii, “Kato, si yasie! Nii ngiika baptisma lasa niimi lutiñ lakiñ kendo?”#8.36: Goñkhu 37: Ho Pilip lutii, “no matiirḛ hikha niika ahha lo henje dokoda, no lala kendoke.” Ho mo lusitii, “Ngo henjedu Jisu Kristo Pinii ka Oho” 38Ho mo goragari mi domo tote hiila lubiido, ho anyeru tola yasie ho ahtii, Pilip la eunuch nyi, ho mo mohmi baptisma bibiido. 39Ho mohlu yasie hokii chaku kiile, Attoh ka Yajiyallo Pilip mi gatubiitii ku; ho eunuch hiikahiiba ho mohmi kapa kumatii, ho mohka lembo ho intiiku hempyo biidola. 40Hojalo Pilip mi Ajotas ho kapa biido, ho impobiila dola mo tonsḛrtii ayapuyu mi hikha taun ho mohka Kaesarea hoka ahchi menda hemi.
Currently Selected:
MIINIIÑ 8: APATBSI
Highlight
Share
Copy
Want to have your highlights saved across all your devices? Sign up or sign in
Apatani New Testament - NITI GONTU
Copyright © The Bible Society of India, 2014.
Used by permission. All rights reserved worldwide.
