LUK 15
15
Subuñ Lyuniiñ
(Mt 18.12-14)
1 #
Lk 5.29-30; 19.7. Siisi biijokajo myaniiñ atañ la ingyamiigyanii atañ hikha aruñ yaya ahtii mohka luniiñmi tadupa. 2Ho Parisi atañ la pagenii atañ budubudu adu-nyatii, lubiidola, “Siika miyu si ingyamiigyanii atañmi lariido ho mohluka agiñho diibodo.”
3Hopa mo mohlumi lukotii siika lutiñnaniiñmi: 4#Mt 18.10-14. “Nunu niihtañ miyupe, subuñ lange biidokoda, mo matiirḛ hiikohokii dore mi alyu siido koda, kowakhangela dorkowahemi zabyo ho apatela, ho dore lyunii boka kiiliñ ho inkiñ masupeha, nii dahepa mo hiimi mepa tama? 5Ho mo hiimi mepa kulala, mo hiimi mohka gorbañ ho gocha giikiñdo, hempyola. 6Ho mo udeho ahchi bukula, mo mohka ajiñatañ mi ho mohka ariapii atañmi gyokiñdo, mohlumi lubiidola, ‘Ngiika agiñho hempyo mompe, niimpalukoda ngo ngiika subuñ lyuniiñ bomi pabii tiikuke.’ 7#Jem 5.20; Lk 19.10; 15.10. Hiichuli pa, ngo lukosa nunumi, dariiganda ho siimitiirḛ uro yapa hempyo kendo ingyamiigyanii koneka henkur lyiho hikha denki kowakhange la midiñkowa hemi apayatiila hutiina henkur dupa lyimanii.
Posa Lyuniiñ
8“Malo niihtañ annii akha pe, posa pelyañhe dotii, mo matiirḛ posa pere alyu siido koda, muru tige lala ho ude mi iipiila ho hempḛr ayapa mekiñ masu peha nii dahepa mo hiimi mepa tama? 9Ho mo hiimi mepa kula lala, mo mohka ajiñ atañ ho ariapii mi gyola lala, lukiñdo, ‘Ngiika agiñho hempyo mompe, niimpalukoda ngo ngiika posa alyu siiniiñ mi mepa tiiku.’ 10Hiichulipa, ngo nunumi lukoso, Pinii ka miidopopi atañ hempyo du ingyamiigyanii koneka henkur lyikuho,”
Oho Lyuniiñ
11 #
Mt 21.28. Ho mo lutii, “Miyu kone dutii hukiina oho anye dutiinii; 12ho anuya bo mohka aba mi lutii, ‘Aba, ngiimi ngiipa niimika gandanencha mi tachetokupe.’ Ho mo tache bibiido mo anye mi mo anyeka sana nansa niimi. 13Allo abuje loma rampa, anuya ohobo hikha mo kii hemi lakuñ biila ho adho gandaho myodi intii, ho hiiko mo sopa siibiido mohka gandanencha atañmi piigogiimapa. 14Ho mo kapanehemi miipa miija kulala, hempḛr diime kaye hiika gandaho doritii, ho mo anaritii. 15Hopa mo intii ho mo atoh atoh hiika ganda ka miyu koneka agiñho dabo montii, hiika hii mohmi mohka aji ho kiiniñtii alyee atañmi diigo honiiñpa. 16Ho mo lyido hokii jalo alyee ka diinii hokii erre khedopa diinatii; ho kone hetḛr mohmi hang bimatii. 17Hojalo mo atoh mi hempa ribii siila mo lutii, ‘Niimkane ngiika aba ka ajhonii miira atañ patrḛ diigo khepa done ho palle neta, hojalo ngo so lyuhilyi hayala! 18Ngo guri kula ho ngiika aba ko inchi, ho ngo mohmi luchi, Aba, ngo ingyamiigya tokuke dariiganda la niika hataho; 19Ngo niika oho hiila khiiko dopa tiirḛ lyikuma; ngiimi niika ajhonii miira kone hiila khiibii kupe.’” 20Ho mo guritii ho mohka aba ko ahtii. Hojalo mo adhoho dasu tiirañ, mohka aba mohmi kappa lala ho arohtii, ho harliñla ho poba lala ho mohmi mochutii. 21Ho oho mohmi lutii, Aba, ngo ingyamiigya tokuke dariiganda la niika hataho; ngo niika oho hiila tiirḛ khiiko dupa lyikuma. 22Hojalo aba lutii mohka miira atañmi, Nyibyaloda ayaja tarii mi biiliñ, ho mohmi agiito; ho mohka alah ho lachañ kheliito, ho mohka alih ho luku agiito; 23ho babuja siih atu mi boliibii ho hiimi mento, ho miilañru kiije diisa ho hempyo pa sosa; 24#1 Tim 5.6; Ipi 2.1; Lk 9.60. niimpalukoda siika ngiika oho si shiineku, ho hiira turi doku; mo lyune, ho patiiku. Ho mohlu hempyopa soritii.
25“Siisi mohka oho abañ hii aji ho datii; ho mo ahku kiile ho ude aruñ ahchi biikele, mo diilañ aduniimi ho nasu soniiñ mi tapatii. 26Ho mo miira kone mi gyola lala ho takatii siikasi niihna miidonii. 27Ho mo mohmi lutii, ‘Niika anu ahdoku, ho niika aba babuja siih atu mi mentii, niimpalukoda mo mohmi aya chanchañ kappa tiiku.’ 28Hojalo mo hadiila ho ura amatii. Mohka aba ago lintii ho mohmi lyartii, 29hojalo mo lusitii mohka aba mi, ‘Kato, hiimkane anyañ abuje ngo niimi miihola da, ho ngo niika luniiñmi takho taka ma; hojalo no ngiimi atu kone tiirḛ bikama, ngiimi ngiika ajiñatañ agiñho sodopa. 30Hojalo siika niika oho ahku kiile, huna niika gandanencha mi pfyoaridiisunii agiñho sopatiinii, no mohpa babuja siih atu mi pabitii!’ 31Ho mo mohmi lutii, Oho, no kiirañ ngiika agiñho du, ho hikha ngiikii nii do hii niikii. 32Si sola diilatala ho hempyo dopa lyidoke, niimpalukoda siika niika anu si shiine kuke, ho turidokuke; mo lyune, ho patii kuke.”
Currently Selected:
LUK 15: APATBSI
Highlight
Share
Copy
Want to have your highlights saved across all your devices? Sign up or sign in
Apatani New Testament - NITI GONTU
Copyright © The Bible Society of India, 2014.
Used by permission. All rights reserved worldwide.
