LUK 18

Hiimie la Gondu Nyimi ka Lutiñnaniiñ

1 # Lk 11.5-8. Ho mo mohlumi lutiñnaniiñ lukotii, hiika lukoniilo mohlumi kiirañ kuke nendupa ho ahha mi hempya siima dopa. 2Mo lutii, “Citi koneda ayakacho kanii kone dutola Pinii mitrḛ biisoma ho miyu mitrḛ khiima; 3ho hiiko hiimie kone dutii hiika citi ho hii kiirañ mohko ahla ho lukañtii, ‘Ngiimi ngiika ahha banii kokii lupya tokupe.’ 4Mo hatuñhe ma lutii; hojalo kamikalo ho mo atoh atoh lusutii, ‘Ngo Pinii mi biiso masu jalo malo miyu mi khiima siijalo, 5hojalo niimpalukoda siika hiimie si lukañari ngiimi ludo, ngo mohmi lupya bichi, hiilamakoda mo ngiimi henga henkha miipa biichi mohka kiirañ ahniiñlo.’” 6#Lk 7.13. Ho Attoh lutii, “Takato niihna diimmah ayakacho kaniibo ludonii. 7#Mih 6.10; Mt 24.22; Rom 8.33; Kol 3.12; 2 Tim 2.10. Ho Pinii mohka kahenii miyu mi lupya bikiñmaha, huna allo ayoh mi mohmi kheko donii? Mo mohlumi diirii miikañ bikiñdopeha? 8Ngo nunumi lukoso, mo nyibya loda mohlumi lupya bikiñdo. Hiilamakoda, niida miyu ka Oho ahchi ku, mo kiiddiapiñ so henje kappa kendo ha?”

Parisi la Biijokajo Myanii Nyimika Lutiñnaniiñ

9Mo siika lutiñnaniiñ mitrḛ lukotii tangemi huna atohmi henjesiila mohlu denki ho khiibe mi khiipa danii: 10“Miyu anye piniiude ho intii kudupa, kone Parisi tii ho kone hii biijokajo myaniitii. 11#Mt 6.5; Mk 11.25. Parisi guri biila ho mo atohpa hiila kutii, ‘Pinii, ngo niimi payapacho ludu niimpa ngo khiibemiyu chitañ ma, diilelulenii, henguherenii, ipfyonii, malo siika biijokajo myanii chitañ. 12#Lk 5.33; 11.42. Ngo kanualo ho ronye nyodu, ngo hakhualyañ hikha ngiika paniiñ hokii bidu.’ 13Hojalo biijokajo myaniibo, adho ho dala, mohka amee mitrḛ yapuñ ho kadu chamapa, hojalo mohka habyañ hoya kiisu biidola, lubiido, ‘Pinii, ngiimi arohpe ingyamiigya bomi!’ 14#Mt 18.4; 23.12; Lk 14.11; 1 Pit 5.6. Ngo nunumi lukoso, siika miyusi mohka ude ho intiiku ludḛrkokula akoyami hentola; niimpalukoda hujalo atohmi kaye miisutalyi atudopa miikiñdo, hojalo huna atohmi atu miisu talyinii hiimi kaye dopa miikiñdo.”

Jisu Himme Atu Atañ mi Lyando

(Mt 19.13-15; Mk 10.13-16)

15 # Mt 19.13-15; 18.3; Mk 10.13-16. Siisi mohlu himme ajañ lohepa mohko ahgii bitii mohmi mohlumi tenka kiine dupa; ho hiimi henjeajiñ atañ kappa lala, mohlu mohlumi gatii. 16Hojalo Jisu mohlumi mohko gyoliitii, lubiidola, “Himme atañmi ngiiko ahkenento, ho mohlumi ahyo hiila lutiñyo; niimpalukoda Pinii ka raddeganda hii siika atañ kiike. 17Jijeloda, ngo nunumi lukoso, hujalopa Pinii ka raddeganda mi siika himme chuli larii tama hii ho ahla kemake.”

Mingo Miyu

(Mt 19.16-30; Mk 10.17-31)

18 # Mt 19.16-22; Mk 10.17-22. #Lk 10.25. Ho sangiibo mohmi takatii, “Denki Tonsḛrbo, niihpe ngo miido koda santḛrlamanii sango kappa kendo nii?” 19Ho Jisu mohlumi lutii, “Niimpa no ngiimi denki hiila gyodu? Kone tiirḛ denkima hojalo Pinii kontiisii. 20#Rom 13.9; Jem 2.11. No chindo lujubiniiñmi: ‘Ipfyo lyayo, Melyayo, Diipyo lyayo, Amuhpa haki lyibi lyayo, niika annii-aba mi khiitolya.’” 21Ho mo lutii, “Hikha siika atañmi ngo ngiika yapa hokii miicha biidu.” 22#Lk 12.33; Miin 2.45; 4.32. Ho Jisu siimi tapa lala, mo mohmi lutii, “Drih kone no giima ranke. Pyunge hikha niiko hoka doniimi ho arro atañmi tache tahe binge, ho niikii dariiganda ho alḛrdrih dokiñ doke; ho ahto, ngiimi imbomonto.” 23Hojalo mo siika siimi tapa lala mo heru ritii, niimpalukoda mo ano mingotii. 24#Mt 19.23-26; Mk 10.23-27. Jisu mohmi kadi biidola lutii, “Niimkane ahru do mingo atañpa Pinii ka raddeganda ho ahdupa! 25Niimpalukoda siikasi uth paya pasu ubu ho pabbo papyo yakiñdo mingo miyu ka Pinii ka raddeganda hoka ahniiñmi hentola.” 26Hutiina siimi tapa nyatiinii lutii, “Hokoda hu lyangur kola kendo?” 27Hojalo mo lutii, “Niihmina miyuatañ miila manii hiimi Pinii miila doke.” 28#Mt 19.27-30; Mk 10.28-31; Lk 5.1-11. Ho Pitar lutii, “Kato, ngunu ngunuka ude atañmi apateku ho niimi imbomondu.” 29Ho mo mohlumi lutii, Jijeloda, ngo nunumi lukoso, miyu kone hetḛr nyima huna udemi malo mihie mi malo anubarmii malo annii-aba mi malo himmeoho mi apatiinii, Pinii ka raddeganda ka piigopa, 30hii siika santuso abu yapa pakiñ do, ho ahsa niika santuñ ho santḛrlamanii sangomi.

Jisu Rohiñniipa Mohka Shiisanii Piigomi Ludo

(Mt 20.17-19; Mk 10.32-34)

31 # Mt 20.17-19; Mk 10.32-34; Lk 9.22,44-45; 17.25. Ho alyañlenye mi ingiila, mo mohlumi lutii, “Kato, ngunu Jerusalem lohe chakiñ doke, ho kapane drih miyu ka Oho mika nyibuheniiñ atañka keniiñhii lyipe kendoke. 32Niimpalukoda mohmi Midomiyu atañ ko tiilii bikiñdo, ho nyapa kokiñdo ho hiinyañ miipyu kokiñdo ho chukḛr chupu kokiñdo; 33mohlu mohmi hikiñdo ho mohmi mengkiñdo, ho allo lohiñ niiho mo turiturku kendoku.” 34Hojalo mohlu gonge hetḛr tachiñ matii siika drih atañ siimi; siika kolobiisie si mohluko hokii achuñ tola dotii, ho mohlu tachiñ matii nii hiila lutii.

Jisu Micha Myado Bomi Miipya Biido

(Mt 20.29-34; Mk 10.46-52)

35 # Mt 20.29-34; Mk 10.46-52; Mt 9.27-31; Mk 8.22; Jn 9.1-7. Mo Jeriko aruñho ahchi kiile, michanii kone lembo aruñho dula myatii; 36ho miyuabuje innii mi tapa lala, mo takatii siikasi niihna. 37Mohlu mohmi lukotii, “Nazaret daka Jisu impobiila doke.” 38Ho mo gyutii, “Jisu, David ka Oho, ngiimi arohpe!” 39Ho hutiina mohka hataho datiinii mohmi gatii, mohmi aduyo lubiido; hojalo mo uro yapaya gyutii, “David ka Oho, ngiimi arohpe!” 40Ho Jisu damotii, ho mohmi ngiiko ahgii hiila lutii; ho mo aruñ ahkele, mo mohmi takatii, 41“Nii miibi kencho hiila hendu ngiimi niipa?” Mo lutii, “Atoh, ngiimi kappa kiine kupe.” 42#Mt 9.22; Mk 5.34; 10.52; Lk 7.50; 8.48; 17.19. Ho Jisu mohmi lutii, “No kappa toku; niika henje ke niimi miipya biinenii.” 43Ho ohepada mo kappa tiiku ho mohmi imbo montii, Pinii mi assañbiido kula; ho hikha miyuatañ, hiimi kappa lala, Pinii mi assañbiido.

Currently Selected:

LUK 18: APATBSI

Highlight

Copy