LUK 2
2
Jisu Mika Buniiñ
(Mt 1.18-25)
1 #
Lk 3.1. Hiika biloallo ho Kesar Augustas kokii pota tahe lintii hikha Rom miyu atañmi armyañ kelii tote hiila. 2Siikasi ketu japa armyañ ketii, Quirinius ka Sairia ho govonor paka duho. 3Ho miilañru intii armyañ kelii dupa, mohluka atoh citi ho. 4#Lk 1.27. Ho Josep tiirḛ Galili hokii intii, Nazaret citi hokii, Judia lohepa, David ka citi ho, Betlehem luniiñho, niimpalukoda mo David ka halugiira hokiitii, 5Mary agiñho kelii kodupa hiila, mohka mihie, huna wiinga giitiinii. 6Ho mohluka hoka daho, Mary pa wiinga budu pa myodu lyitii. 7Ho Mary mohka butu wiinga milobo oho mi butii ho mohmi pulye ho apu tola atiitii, ho durgu ho gotola atiitii, niimpalukoda hiiko mo anye pa duko nyimatii.
Subuñsornii Atañ la Miidopopi Atañ
8Ho hiika ganda ka agoho subuñsornii tonge dutii aji ho, mohluka subuñ mi ayoh ho kahlyala. 9#Lk 1.11; Miin 5.19. Ho Attoh ka miidopopi mohluko ahtii, ho Attoh huda khada mohluka punkoho byokiñ lintii, ho mohlu biiso nyatii. 10Ho miidopopi mohlumi lutii, “Biiso nyayo; tageto, ngo nunupa hempḛr hempyo aya puyu ke balii giidunii hikha miyu atañpa; 11#Jn 4.42; Miin 5.31; Mt 16.16; Miin 2.36. nunupa siilo allo so David ka citi ho lyangur bomi bubi tiike, hii Kristo Attoh ke. 12Ho si ke nunu paka kagiñnanii; nunu wiinga mi pulye bolyo bere ho apu tola durgu ho gotola dopa kappa kendoke.” 13Ho aluñpada hiiko miidopopi agiñho hempḛr taropa yapuñ hahoho Pinii mi assañ nyatii ho lubiidola,
14 #
Lk 19.38; 3.22. “Pinii mi uro japa assañto,
ho kiiddiapiñ so Chimie hii miyu ko dokiñ doke humina mo hempyo biidunii!”
15Ho miidopopi mohluka agiñ hokii dariiganda ho chaku kiile, siibuñsornii atañ lusu nyatii ako anya mi, “Kiije ngunu Betlehem ho insa ho siika drih lyinii siimi kaka tasa, nii mina Attoh ngunumi chindopa miitiinii.” 16Ho mohlu hempḛr nyibyapa intii, ho Mary la Josep nyimi kappatii, ho wiinga mi durgu ho gotola dopa. 17Ho hiimi mohlu kappa lala mohlu chindopa miitii niihna mohlumi luko tiinii siika wiinga ka piigomi; 18ho hikha hutiina hiimi tapa nyatiinii hemur nyatii niihna miidopopi mohlumi luko tiinii. 19#Lk 2.51. Hojalo Mary hikha siika atañmi atiibiitii, mohka ahha uraho siimi hendi biidola. 20Ho subuñsornii atañ inkur tiiku, Pinii mi assañ sanjo biikula hikha mohluka tapa niimila ho kapaniimi, niihtañpa mohlumi lukotii.
Jisu mi Armyañ myantii
21 #
Lk 1.31; Mt 1.25. Ho lopinye nii allo ho, mohmika mitupipa lyiho, mohmi Jisu hiila myantii, miidopopi ka mohmika akhii ho giima rampa ka armyañ myaniiñ mi.
Jisu mi Piniiude ho Ahgiitii
22Ho darii miidu kupa myodu ahlyi kunii mohlupa Mose ka dapo hoka luniiñ chulipa, mohlu mohmi Jerusalem ho ahgiitii mohmi Attoh mi bidupa hiila 23(hiila keto lake donii Attoh ka dapo ho, “Butu milobo oho kone abimi Attoh ko darii hiila lukiñdo”) 24ho niihtañpa Attoh ka dapo ho lutii hii chulipa membi la lyikiñdo, “Pakoo kunye jalo, malo pakoo atu kunye jalo.” 25#Lk 2.38; 23.51. Siisi Jerusalem ho miyu kone dutii, hiika armyañ Simeon hiila, ho siika miyu si denki ho Pinii kii dalyi henga niitii, Isrel mika myanii mi kahlya la, ho Darii Yajiyallo mo ayoh ho dabo montii. 26Ho mohmi Darii Yajiyallo hiila kakiñ tola dotii mo shiikiñ make nii dahepa mo Attoh Kristo mi kappa tama. 27Ho Yajiyallo harolupa kotola mo piniiude ho ahtii; ho annii-aba nyi wiinga Jisu mi ura ho golii biikele, mohpa dapo ka muju lujju mi miibi dupa hiila, 28mo Jisu mi mohka lapo ho gola lala ho Pinii mi assañbiido ho lutii,
29“Attoh, siisi yadi niika miira mi Chimie pa inke nenkupe,
niika luniiñ chulipa;
30 #
Lk 3.6. niimpalukoda ngiika amee si niika sangopyako bomi kappa tiikuke
31humina no miimyo bitiinii hikha miyu atañka kadopa,
32Midomiyu atañ paka hutoh byokhe sanii, ho niika miyu Isrel paka tatukatu giisanii.”
33Ho mohka aba la mohka annii nyi hemurtii mohmika luniiñmi tala la; 34ho Simeon mohlumi lyalala ho mohka annii Mary mi lutii,
“Kato, siika wiinga si Isrel ho abuje miyu mi togii chagii niipake kahe biilyinii,
ho kagiñnanii pa dolyi ke chekho niipa
35(ho ilyo hii niika atoh ka yallo mitrḛ niiche siikiñ doke),
hiika abuje miyu ka ahha hoka heniiñmi kakiñ nekudo.”
36Ho nyimii nyibuhenii kone dutii, Anna, Phanuel ka oho, Asher ka halu hokii; mo hempḛr akha tiiku, mohka millo agiñho nyañkanuhe sii mohka millo imma raho hokii dubo siitiinii, 37ho hiimie pa mo pinyikhange la nyampe tiiku. Mo piniiude hokii inku matii, nyobiidola allo ayoh dadumi heriila dutii. 38Ho hiika myodu jaho limbiila mo Pinii mi payapacho lubiido, ho mohka piigo mi lubiidola miilañ rumi lukotii hutiina Jerusalem mika tupyabiniiñ mi kala dotiinii.
Nazaret hoka Ahkur kuniiñ
39Ho mohlu kapane hemi Attoh ka henko jaho miitii hekula, mohlu Galili ho ahkur tiiku, mohluka atoh citi ho, 40Ho wiinga hii sanchatii ho hempḛr alḛrtii, hempḛr chilatii; ho Pinii ka hembo nii mohka agiñho dabotii.
Himme Jisu Piniiude Ho
41Siisi mohka annii-aba anya dadumi Jerusalem ho intii impobiiniiñ dituñ sodu ho. 42Ho mo anya nyalyañ lenye kukele, mohlu intii dumiñ muju chulipa; 43ho dituñ soja kukele, mohlu ahkurla dokukiile, wiinga Jisu Jerusalem ho datii. Mohka annii-aba hiimi chimatii, 44hojalo mo mohluka agiñho imbo siido hiila hela mohlu allo loteje intiiku, ho mohlu metii mohluka henii myanii la ajiñ apiika punkoho; 45ho mohlu mepa malyinii mohmi, mohlu Jerusalem ho chakurtii, mohmi mechala. 46Allo lohiñhe daku lala mohlu mohmi piniiude ho kappa biido ku, tonsḛrbo atañka agiñho dupa, mohluka luniiñmi tala ho mohlumi taka tarala dopa; 47ho hikha hoka tapa laka dunii atañ hemur nyatii mohka chila ho mohka lukonii atañmi. 48#Mk 3.31-35. Ho mohlu mohmi kappa lala mohlu hemur nyatii; ho mohka annii mohmi lutii, “Wiinga, niimpa no ngunumi sitañ pa miidu? Kato, niika naba ngiinyi hiimkane hena la meto.” 49Ho mo mohlumi lutii, “Niimpa nunu ngiimi medu? Nunu chima topo ngo ngiika Aba ka ude ho dukiñdo hiila?” 50Ho mohlu tadḛr lamatii mohlumika mohka luniiñmi. 51#Lk 2.19. Ho mo mohluka agiñho tobo montiiku ho Nazaret ho ahtiiku, ho mohluka luniiñmi tatiiku; ho mohka annii hikha siika drih mi ahha ho hengiitii.
52 #
Lk 1.80; 2.40. Ho Jisu saritii chiniiñ hotiirḛ ho apo tiirḛ, ho Pinii lotrḛ ho miyu lotrḛ khiikotii.
Currently Selected:
LUK 2: APATBSI
Highlight
Share
Copy
Want to have your highlights saved across all your devices? Sign up or sign in
Apatani New Testament - NITI GONTU
Copyright © The Bible Society of India, 2014.
Used by permission. All rights reserved worldwide.
