METHU 28

Turiturku Kuniiñ

(Mk 16.1-10; Lk 24.1-12; Jn 20.1-10)

1 # Mk 16.1-8; Lk 24.1-9; Jn 20.1-2. #Lk 8.2; Mt 27.56. Dumoalo ahku lala, allo lotuka aro konchiho, Mary Magdalen la akoya Mary nyi byuh ho katepa intii. 2#Mt 27.51,60. Ho kato, hiiko hempḛr uro myobu hutii; niimpalukoda dariiganda hokii Pinii ka miidopopi totii ho ahtii ho yalañ mi giipa biido, ho hiiko dutii. 3Mohka ahniiñhii dolya kiibyo niitañtii, ho mohka pulye hii pembe chikañ puloo tii. 4#Mt 27.62-66. Ho dagur biiniibo mohmi biisola alyetii ho miyu shiinii hiilyañ tiiku. 5Miidopopi lutii annii akha anyemi, “Biisoyo; niimpalukoda ngo chindo niinyi Jisu mi melada humina leda lala mentiinii. 6Mo so nyikumake; niimpalukoda mo turi neku, mo luniiñ chulipa. Ahla, kakatocho nohna mohmi atii biinenii. 7#Mt 26.32; 28.16; Jn 21.1-23. Nyibya ingela ho mohka henjeajiñ atañmi lukohe mo shiinii hokii turi neku hiila, ho kato, mo nunumi impyo yapa Galili ho inkiñdo; hiiko nunu mohmi kappa kendoke. Tageto, ngo nunumi luko biilyi ke.” 8Hopa mo anye nyibyaloda byuh hokii intiiku biiso biidola ho hempḛr hempyo biidola, ho hartii mohka henjeajiñ atañmi luko dupa. 9#Jn 20.14-18. Ho kato, Jisu mohlumi kappa lala ho lutii, “Hiika atañ!” Ho mohlu haratii ho mohka alih mi gabii tola mohmi heriitii. 10Ho Jisu mohlumi lutii, “Biisoyo; inge ho lukohe ngiika anubarmii atañmi Galili ho inge hiila, ho hiikoho mohlu ngiimi kappa kendoke.”

Dagur Biinii Boka Luko Kuniiñ

11 # Mt 27.62-66. Mohluka ila ka doho, kato, dagur biinii tonge citi ho intii ho nyibu burii atañmi lukotii hikha lyiniiñ atañmi. 12Ho mohlu amiabañ atañmi dakuñ kiine lala ho taka siila la, mohlu sipahi mi tiicko bitii. 13ho lutii, “Miyu atañmi lukoto, Mohka henjeajiñ atañ ayoh ho ahla ho mohmi jopyo biine ngunuka imi laka doho. 14Ho si matiirḛ govonor ka yaroo ho ahchi lyimilo, ngunu luko lubyañ talyike ho nunuko hang ahiare ahke nente make.” 15Hopa mohlu tiicko mi labiitii ho mohluka luniiñ chulipa miitii; ho siika lukonii hii siilo jalopa Jew atañka punkoho tapa takañla do.

Jisu Mohka Henjeajiñ Atañ ko Ahdo

(Mk 16.14-18; Lk 24.36-49; Jn 20.19-23; Miin 1.6-8)

16 # Mt 26.32; Mk 14.28. Siisi alyañhela kone henjeajiñ atañ Galili ho intii, Jisu ka mohlumi ka putoo kakiñ koho. 17Ho mohmi kappa lala mohlu mohmi heriitii; hojalo tonge hemmotii. 18#Mt 11.27; Lk 10.22; Pil 2.9; Ipi 1.20-22. Ho Jisu ahtii ho mohlumi lutii, “Hikha yapuñ la kiiddiapiñ nyika otority mi ngiimi bitola do. 19#Miin 1.8. Hopa inge ho hikha ganda atañ ho henjeajiñ lyidopa miinge, baptisma bingelya Aba ho Oho ho Darii Yajiyallo ka armyañ pa, 20#Mt 13.39,49; 24.3; 18.20; Miin 18.10. tonsḛr tolya hikha ngiika nunumika lujubiniiñmi tatolya hiila; ho kato, Ngo nunuka agiñho kiirañ dabo talyike, kiiddimiidoh ka dodo hemi.”

Currently Selected:

METHU 28: APATBSI

Highlight

Copy