METHU 5
5
Putoo Hoka Tonsḛr khenyoniiñ
1 #
Lk 6.17,20-23; Mk 3.13; Jn 6.3. Miyu abujemi kala lala, mo putoo ayoh ho chatii, ho mo duha kiile mohka henjeajiñ atañ mohko ahtii. 2Ho mo aguñ luritii, ho mohlumi tonsḛrtii, lubiidola:
Jije Hempyo
(Lk 6.20-23)
3 #
Mk 10.14; Lk 22.29. Lyanko kendo Yajiyallo arro atañ, niimpalukoda dariiganda ka raddeganda hii mohlukii.
4 #
Jn 16.20; Mih 7.17. Lyanko kendo haru hennii atañ, niimpalukoda mohlumi aroh-aya robyuñ kendo.
5Lyanko kendo yanu atañ, niimpalukoda mohlu kiiddiapiñ mi penko kendo.
6 #
Jn 4.14; 6.48-51. Lyanko kendo hiika atañ huna denki drihpa haya la hangḛr nyadonii, niimpalukoda mohlumi pote dopa bikiñdo.
7Lyanko kendo aroh-aya nii atañ, niimpalukoda mohlu aroh-aya mi pakiñ do.
8 #
Hib 12.14; 1 Jn 3.2; Mih 22.4. Lyanko kendo ahha darii atañ, niimpalukoda mohlu Pinii mi kappa kendo.
9Lyanko kendo chimie dopa lulyañ nii atañ, niimpalukoda mohlumi Pinii ka oho hiila lukiñ do.
10 #
1 Pit 3.14. Lyanko kendo hiika atañ humina miihimiire biidonii Pinii henko dadula hiila, niimpalukoda mohluko dariiganda ka raddeganda hii do.
11Lyanko kendo nunu niida miyu atañlo ahiare ho miihimiire ho kapane ayamanii ngiika piigopa khiilii kochi. 12#Mt 23.37; Miin 7.52; 1 Tes 2.15; Jem 5.10. Soto ho hempyo to, niimpalukoda niika ahmiñayiñ hii kayeke dariiganda ho, niimpalukoda si chulipa miyuatañ nunumika kapyo yapaka nyibuhenii atañ mitrḛ miihimiiretii.
Alho la Hutoh
(Mk 9.50; Lk 14.34,35)
13 #
Mk 9.50; Lk 14.34,35. Nunu kiiddi ka alho ke; hojalopa alho matiirḛ tihi mi alyu siido koda, niihtañpa hiimi hiira alho tihi dopa miichi? Hiika hii hang piigo ahkiñ kuma agoho ripa lala ho miyu lo alih nyota nanii pasu lyikiñ siidonii.
14 #
Ipi 5.8; Pil 2.15; Jn 8.12. Nunu supuñ ka hutoh ke. Putoo ayoh hoka citi donii hiitḛr achu giila kemma. 15#Lk 11.33; Mk 4.21; 1 Pit 2.12. Malo miyuatañ muru tige lala yagii ura ho atii ma, hojalo ahii kosu ahii siidunii, ho hiikahii hikha ude mi hutoh byohudu. 16Si chulipa niika hutoh mitrḛ miyu atañka hataho byohu kiineto, niimpalukoda niika aya miigo miiniiñmi mohlumi kala lala ho niika Aba dariiganda hoka duniimi assañ kiine dupa.
Dapo Piigo Mika Tonsḛrniiñ
17Hiila heyo ngo dapo mi malo nyibuhenii atañmi lapadupa ahdo hiila; Ngo lapa dupa make hiimi miipe dupake ahdunii. 18#Lk 16.17; Mk 13.31.Niimpalukoda jijeloda, ngo nunumi lukoso, nii dahepa dariiganda la kiiddiapiñ nyi lyute ma, petu pere tiirḛ, pechi pere tiirḛ pagenii dapo hokii, lyukiñ ma nii dahepa hikha lyipe tama. 19#Jem 2.10.Hu jalopa siika lujju biniiñ hokii petu pere jalo lapa talyi ho miyu atañmi tonsḛr tonkha talyi, dariiganda ka raddeganda ho khiimanii japa lyikiñ do; hojalopa huna hiimi miidonii ho mohlumi tonsḛr talyi nii dariiganda ka raddeganda ho khiiniiñ japa lyikiñ do. 20Niimpalukoda Ngo lukoso nunumi, nii dahepa niika denki hii siika pagenii atañ la Parisi atañmi uro yate ma, nunu iche tiirḛ dariiganda ka raddeganda ho ahla kemma.
Hadii Piigo Mika Tonsḛrniiñ
21Nunu hiila tapa tiido bilo ayu hoka luto laka doniimi, No mellya yo; ho huna menchinii hii ayakacho kalyi kuho pahañ halii kokiñdo. 22Hojalopa Ngo nunumi luduke koneabi huna atoh anuabañ mi hadii talyinii pahañ halii kodopa lyido; hu jalopa nyapakoya talyi mohka anuabañ mi pahañ halii kokiñdo bulyañ lo, ho hujalo luchi, No piicha! yamuganda ho jolo kokiñdo. 23Hopa nunu matiirḛ yugyañ ho ahmiñayiñ bido koda, ho hiikoho ngiika anuabañ hadiine ngiimi hiila hempa lyimilo, 24niika ahmiñayiñ mi yugyañ ho apatela ho inge; kapyopa niika anuabañ mi lyarnge kurañ, ho ahkur kula niika ahmiñayiñ mi bito. 25#Lk 12.57-59. Nyibyaloda pa yardiñ siito kulya nunumika yalu luliñ bomi, mo agiñho gondu lusuko impa ilyila, hiila mapa yalu luliñ koniilo nunu ayakacho kaniiko tiilii kodiike, ho ayakacho kanii atañlo sipahi ko, ho nunumi pattiih ude ho alii lyidiike; 26Jijeloda, Ngo nunumi lukoso, nunu lila kengku ma lodake nii dahepa nunu bime bijalye dapo tusa niimi bitema.
Ipfyo Piigo Mika Tonsḛrniiñ
27Nunu hiila tapa tiido luto laka doniimi, nunu ipfyo yayo. 28Hojalopa Ngo nunumi ludu hujalopa nyimii mi kalyikabyo la kadi talyi hii ipfyo tiiku mohka ahha ho hiika nyimii ka agiñho. 29#Mt 18.8-9; Mk 9.43-48. Nunuka mihbi amee matiirḛ ingyamiigya giido milo, hiimi harpa lila la ho ripato; hiika hii amee puhe giima niiya aya yadoke hikha apo mi yamuganda hoka togii saniiñmi hentola. 30Ho nunuka lahbi alah matiirḛ nunumi ingyamiigya giido milo, hiimi papa lala ho ripato; hiika hii alah buhe giima niiya aya yadoke hikha apo mi yamuganda hoka togii saniiñmi hentola.
Byasunii Piigo Mika Tonsḛrniiñ
(Mt 19.9; Mk 10.11,12; Lk 16.18)
31 #
Lk 16.18; Mk 10.11-12; Mt 19.9; 1 Kor 7.10-11. Hiila tiirḛ lutola do, hu jalopa atoh mihie mi byasu talyi, mohmi kadḛrpa paniiñpota bike nento mohmi byasu tiiku hiila. 32Hojalo Ngo nunumi ludu hujalopa atohka mihie mi byasu talyi, ipfyo niimi apa lala, hii mohmi ipfyo dopa miipa biido, ho huna mihie millo byasu niimi mihie pa lachinii hii ipfyo doku.
Hemme nii Piigo Mika Tonsḛrniiñ
33 #
Mt 23.16-22; Jem 5.12. Hiira nunu tapa tiido bilo ayu hoka luto laka doniimi, nunu iche tiirḛ amuhpa hemme yayo, hojalopa Attoh pa miibi toku niihna nunu hemme tiinii. 34#Mt 23.22; Jem 5.12.Hojalopa Ngo nunumi ludu, Iche tiirḛ hemme yayo, dariiganda mi lumu nambii dola, niimpalukoda siikasi Pinii ka akho byopa ke, 35#Miin 7.49. malo kiiddi apiñ mitrḛ, niimpalukoda si mohka alih dagiñ nangkoke, malo Jerusalem mi, niimpalukoda siikasi hempḛr Raddekaye ka citi ke. 36Ho nunuka dinta mitrḛ hemme nayo, niimpalukoda nunu dimmu sohe mitrḛ puloo malo jih dopa miila kemmake. 37Nunuka luliñnii ḛh milo ḛh malo ma milo ma; siika siimi uro yapa luliñ dokoda hii diimmah#5.37: Malo diimmah kone kokii ke.
Miili nii Piigo Mika Tonsḛrniiñ
(Lk 6.29,30)
38Nunu tapa tiido hiila lutola do, Amee koda amee ho aih koda aih. 39#Lk 6.29-30; 1 Kor 6.7; Rom 12.17; 1 Pit 2.19; 3.9.Hojalopa Ngo nunumi ludu, iche hetrḛ miitḛr siilyayo huna miichi miiho donii. Hojalo nunumi matiirḛ lahbi dalyi moru ho mi pita lyimilo, mohmi pache dalyi miilañmi mohii bitolya; 40ho mi matiirḛ niikiimi chechepa nunuka tariimi biilyi milo, nunuka abi mitrḛ bitolya; 41ho mi matiirḛ nunumi chechepa nyatu pohe inge lulyi milo nyatu ponye imbi tolya. 42Bitolya huna nunumi bipe hiila kudo nii, ho ma hiila lulyayo mohmi huna niiko hokii nalya donii.
Ahha-banii Atañ Mika Heniiñ
(Lk 6.27,28,32-36)
43 #
Lk 6.27-28,32-36. Nunu tapa tiido hiila lutola do, Nunu atoh ka ariapii mi hentolya ho ahha banii atañmi helyayo. 44Hojalo Ngo nunumi ludu, Nunuka ahha banii atañmi hento ho kubitolya nunumika miihimiire miinii atañpa, 45niimpalukoda nunu nunuka dariiganda daka Aba ka oho pa lyidupa; niimpalukoda mo mohka danyi mi ingyamiigya mitrḛ ho denki mitrḛ byohu kiinedu, ho miido hukhe kiinedu denki mitrḛ ho ingyamiigya mitrḛ. 46Niimpalukoda nunu matiirḛ nunumika hennii mi kontii hensi dokoda, nii ajunii nunuko do? Si chulipa tiicko myanii atañ tiirḛ miinya siimasa ehna? 47Ho nunu matiirḛ nunuka anuabañ mi kontii ayahelyi la ludo koda, nunu mihmi uro yapa nii miitii? Si chulipa Midomiyu atañ tiirḛ miinya siimasa? 48Nunu, hopa, digoabiayato, niihtañpa niika dariiganda daka Aba tiirḛ digoabiaya ke.
Currently Selected:
METHU 5: APATBSI
Highlight
Share
Copy
Want to have your highlights saved across all your devices? Sign up or sign in
Apatani New Testament - NITI GONTU
Copyright © The Bible Society of India, 2014.
Used by permission. All rights reserved worldwide.
