JOAN 12

Bethanilo Jisume Tél Nyooname

(Mt 26:6-13; Mk 14:3-9)

1Gíbong gíídí longké kerape Jisu bí Bethanilo pííla, delo Jisuke sikolokke iturkunam ami Lajar bí duuto. 2So Jisume mínggela dotké iruuboto. Martha bí ibo saabola, Lajar bí dobosula duuna kídí lokke akonpe ito. 3Delo Mari bí namporuna tél kootírlok anyongko laala, Jisuke alem píkat pala agí dumídlok alem nyoobín toku. Delokrongem ekumde nampona arí mílípe ikai. 4Idakkom bíkkelo luyilsuna akon, Judas Iskariot, Jisume méélamlo míírí míínyo penade, dem agdola pokai, 5“Sim arí nampona atísim kogeyéla murkongem opan kídíem kapeila bimane? Si dítag lokke hajirang adumko isudung.” 6Bíkke sikepe ponamde opan kídíem ayang kolokmang idakla bí doppyo nakuai. Bí murkong gadum bomyanape iname delo menam abal lok agíem igulsuna dungai.

7“Bím melíkto,” emla Jisu bí poyansukai. “Bíkke sikepe inamde sim nampona tél sim ngom yudí longetelo iruu napemin idune. 8Nolu agínpe opanem yébo suyaryé, idokom ngom yéyar bosumayé.”

Lajarme Petpe Emla Ruuname

9Depe iduem Judai amieke milungko Jisu bí Bethanilo dung emnamem tatla, delo bulu Jisu petomme kaape emla aamang, idola bíkke sikolokke iturkunam Lajar mete kaape emla delo gíto. 10Dekepe iname ríne kídíe Lajar meteng petpe emla ruuto, 11kapeila bíkke legalok Judai ami kídíe bojé rungko Jisume míngkesula bíkkíng gímín gedungai.

Jisuke Mirampe Jirusalemlo Aaname

(Mt 21:1-11; Mk 11:1-11; Lk 19:28-40)

12Longe kondem Doman aranlo aana deddína miti milinge Jisu bí Jirusalemlo píídak emnamem tatto. 13Bulu pam esing annem bomla bím yamrík kape gílento, bulu sikepe gokto,

“Ríak daklangka!”#12:13a: Hibru agompe “Mopít daklangka”, de erkínam agome.

“Ruutumke amínlok aanade gérne!”#Miri 118:25-26

“Israelke Rojade gérne!”

14Jisu bí gado ooko paala delo teyodelo duuto, dem sikepe attung:

15“E, Jayonlokke omía, pesomapeka;

kaatola nokke roje gado oo teyolo duula aadune.”#Jek 9:9

16Kerape bíkkelo luyilsuna kídíe sim takam tatkén mangai. Jisuke angun ralnamem paarong emmin bulu sim atí takam sim bíkke legangem attung delokke bulu sim takam sim bím ibomto emla kénsu dungkune.

17Depe idudelo mibamde Jisuke Lajarme agolok gakrep langkula, bím sikolokke gerep molangkula inam agomem potí gongkai.#12:17: Demangkom depe iduem Jisuke Lajarme agolokke gakrepla sikolokke gerep dokuem yémín gena mibame mipilem pokan dungai. 18Jisu bí sim irisinyo iyod sim ito emnamem tatla, deddína amie bím kaape emla gíto. 19Dekepe ila Pharisi kídíe mipile pobosuto, “Kaatola si ngolum nyok modak. Kaalangka tani amosokke deddína amie bíkke méélamlo gíkane!”

Grik Ami Ayokone Jisume Mataname

20Depe iduem Grik amieke ayoko Jirusalemlo kumsukape gíne Doman aran longelo píído. 21Bulu Galillo duuna Bethsaida doolung lokke Philipme aala íngkíto, “Saare, ngolu Jisume kaalínge idung.”

22Philip bí Andriame poto, delo Andria lang Philip bí Jisume pokan bito. 23Jisu bí poyansuto, “Tanike Uem angun ralnamlo melík díkue píídakbong. 24Ngo nolum arope pobidung, ampilde kédelo olíkla yaalík mamílo, de ampil atelpe iyar abusula duuyaryé. Idakla de simílo, amíem bojéko parlen boyéku. 25Séko agíke turnamem aya sududí bí dem menyok suyé, idola tani amoso turnamem mepaksuna amide dem turyar pekolo bomsiiyé. 26Séko ngom kumdudí bí ngokke méélamlo gíperung aido; delokke ngo ingkolo duududí, ngokke béérang ekom delo duumínyé. Ngom kumnadem ngokke Abue mííyum sudung.

Jisuke Agí Sipenamem Pokan Subiname

27“Supak ngokke aapí ainasi míídírsue idung ngo kape pomíloi aiyén? ‘Yayie, sok moodí sokke ngom mosing toyika’ emmílua aiyén? Idokom sikena ankí keno lega pemin ngo aatone. 28Yayie, nokke amínem angun molangka!”

Delokrongem teyong telok agomko lento, “Ngo angun ralnamem bito, delokke lekoda dem angun ralnamlo langaayéku.”

29Delo yéna milude dem tatla doomírko mírto emla pokai, abíde teyong kotoki komino bím luposutone emto.

30Jisu bí poto, “Si agomsi noluke ainam legang pemino, ngokke ainam lega pemang. 31Supakmin tani amongem bisardíku longe; supak tani amosokke ruutumem monpakyéku. 32Idokom ngom amosokke teyope laasa yékuem, ami takamem ngokkíng laanín suyéku.” 33Bí kape kísa siyédí demmin lengkan nape pobi sudune.

34Mibamde polenkai, “Kristo bí duuyaryé, emla Ayon kitablok ngolu taddung, demílo no kapeda ‘Tanike Uem berokpe laasayéku’ emkane? ‘Sékoda Tanike Oode?’ ”

35Delo Jisu bí bulum poyansukai, “Nolu angunem ool duubom mayé. Kaamue nolum aabom mangadape, angun dungadape nolu angunlo yélangka. 36Angunem nolu, duubom dungadape nolu angunlo míída sulangka, demílomin nolu angunke oope iyéne.”

Amikídíke Míngkeng Píírame

Dekepe Jisu bí poyinrongem, gíla bulu kelokke ruusigeto. 37Sim irisinyo iyod takam sim buluke kangkolo Jisu bí ibilate, bulu bím arope míngke sumato, 38Si Kaaluna miri Isaiahke sikepe ponam agomem apíídope emlamino ikane:

“Ruutume, séko ngoluke ngiitomem arope míngke sutone delokke sékome Ruutumke ralnamem lengkanton?”#Isa 6:10

39Sok legape bulu arope míngke sumato, kapeila sim Isaiah bí regokonlo podungku:

40“Bí buluke amigem mingma moto delokke buluke aapíem mide moto,

dekepe ila buluke amiglok kaapete kaalamang,

demangkom buluke aapílok kénpete kénlamang,

delokke ngo bulum ipí dokupe míílat pete sukumang.”#Isa 6:10

41Isaiah bí sim sikepe poto kapeila bí Jisuke angun ralnamem kaala delokke bíkke legangem poto.

42Depe ilate Judialokke ruutum kídíe bojéko bím míngkesuto. Idola Pharisi kídí legalok bulum kumkeng ekumlokke monpak kupelo emla pesola bulu buluke míngkengem pokan sumang; 43kapeila bulu Shédíke koyid empemílo tani lokke koyidem mííbayato.

Jisuke Agomsulok Bisarname

44Delokrongem Jisu bí bottepe pokai, “Séko tanie ngom arope míngke sududí, bí ngom petommang, ngom melík nemkom míngke sudung. 45Séko ngom kaadudí, bí ngom melík nemkom kaadung. 46Ngo tani amoso ngom míngke sune kaamolo duumadope emla angun kísape aato. 47Ngokke agom kídarem taddola dekedem bomgap mana tanidem ngo bisarmang. Legade ngo tani amongem bisarkape emla aamang, idakkom mopít kakupe emlamin aatone. 48Ngom tomana delokke agom kídarem torík sumana amidem bisar penako kadung; ngokke ponam agom pak simin yéyin longelo bím ajéng luyékune. 49Kapeila ngo agí míísa sulok pomang, idakkom ngom melíkna Abuemino sim kape kísa delokke ingko kísa pope aidodí dem ngiitom tune. 50Bíkke ngiitomde turyar pekolo gílíkdung emla ngo kénsudung. Depe ila Abue ngom pogedope polík namem ngo ingkuem podudí de arone.”

Currently Selected:

JOAN 12: adiBSI

Highlight

Copy