JOAN 11
11
Lajarke Siname
1Depe iduem Lajar emnam amiko kito. Bí Bethani lokke kuai, de Mari kelang delokke bíkke bírme Marthake doolunge. 2Kila ketna Lajarke bírme, Mari bímin Ruutumme nampona tél pílumna delokke bíkke alem agí dumídlok molbínla inade. 3Dekepe ila bírme de Jisume sikepe agom políkto, “Ruutume nokke ayanam amide kidung.”
4Dem tayyédem Jisu bí poto, “De kinamde simo nyokmo pena kinammang. Shédíke Oolok angun ralnamem lengkan dope emla Shédíke angun ralnam legapemin dekepe idune.”
5Jisu bí Marthame delokke bíkke bírme delokke Lajarme ayadungai. 6Depe ilate Lajar bí kidung emnamem tatpala bí bíkke dungkolo loonyiko duupoto. 7Delokrongem bí bíkke luyilsuna kídíem poto, “Kaju Judialo enlangkupe.”
8Bulu poto, “Idola Poyilne, Judai ami kídíe nom elílok gepe ironge ool doomangada delokke depe ilate no delo enlat yékunía?”
9Jisu bí poyansuto, “Longe angune delo gonta íying kolang annyikope kamanía? Longem gína tanide tupsu mayé, kapeila bí sim tani amosokke angunlok kaadung. 10Bí yumelo gídung emmin tupsudune, legade bíkke angun kamang.” 11Sim porongem bí potemla bulum poto, “Ngoluke angong Lajar bí ipkai; idakkom ngo delo bím urrep kakupe gídak.”
12Bíkkelo luyilsuna kídíe poyansuto, “Ruutume bí ipdumílo aisuyéku.”
13Jisu bí Lajarke sinamem potungai, idola bíkkíng luyilsuna kídíe ipgísupe ipdung emla mííto. 14Dekepe ikolok delo bí bulum berokpe pobito, “Lajar bí sikai, 15delokke noluke legape, nolu arope míngke sudope, ngokke delo duumang namdem ngo aipe míídung. Idokom bíkkíng ngolu gílaju.”
16Delokrongem Thoma (Diduma emlate mandung) bí luyilsuna abíd kídíem poto, “Ngolute bíkkíng sibo sudope gílaju.”
Jisu Bímin Gerep Kunamelang Turname
17Jisuke píídodem, bí Lajarme agolo loopikokai metubope kaato. 18Bethanide Jirusalem lokke mail annyiem píímangai, 19delo Judai ami kídíe bojéko Martha melang delokke Marime bínyike bíro nyoknam legape ngingkape aato.
20Martha bí Jisu bí píídung emnamem tayyédem bí ríksupe gílento, idola Maridan ekumlo duuto. 21Martha bí Jisume poto, “Ruutume, no so duutua mílo, ngokke bíro si simaduape. 22Ngo kéndung supakkom Shédí bí ingkuem no koyédí dem biyé.”
23Jisu bí bím poto, “Nokke bírue gerepyéku.”
24Martha bí poyansuto, “Yéyin longelo bí gerep yéku emla ngo kéndung.”
25Jisu bí bím poto, “Ngomino gerep kunamelang turname. Séko ngom arope míngke suyédí bí sidokom turyé; 26delokke séko turla ngom arope míngke suyédí bí edílokom simayé. No sim arope míídunía?”
27Bí Jisume pokai, “E, Ruutum, nomin Kristo bí, tani amoso aapena Shédíke Ue emla ngo arope míídung.”
Jisuke Kapname
28Delokrongem bíkke depe porongem, bí gílat sulangkula bíkke bírme Marime tompek suto. Bí poto, “Saar bí si dung delokke nom matadung.” 29Mari bí dem tayyédelo, menang asak darepla bíkkíng aato. 30Jisu bí supaklope delo doolung aradelo aamang ada, bí Marthame ríksuko amodelo yédungada. 31Marime ekumlo ponyi lunyila duuna Judai amikídíe Marike menarupe darepla gínamdem kaala, Mari bí agodelo gíla ankíem kabbom rííbom kape gídak emla mííla, bulute bíkkíng gímín geto.
32Edílo Mari bí Jisuke yékodelo pííla delokke bím kaatodí, bí bíkke aledelo lebíng konídola pokai, “Ruutume, no so duutuamílo ngokke bírue simayai.”
33Jisu bí Mari melang delokke bíkkíng gíbosuna Judai ami kídíete kapdope kaayédelo, bíkke aapílo ankíem jémge layimape ito. 34“Ingkolo nolu bím yutone?” emla bí íngkíto.
“Ruutume aala kaato langka,” emla bulu poyansuto.
35Jisu bí kapto. 36Delo Judai ami kídíe pokai, “Kaatola bí edítko bím ayatuane!”
37Idokom bulu ayokone pokai, “Mingmana amiem migdar mokuna ami si sina ami sim asoope meyé langa?”
Lajarme Iturkuname
38Jisu bí lekoda ankíe idola, agodelo aato. De goyabem líínelok longkapnam líípík kuai. 39“Elídem longgéla metoka” emla bí poto.
Sina ami delokke bírme Martha bí pokai, “Idakkom ruutume, supak namsinge ikabong, kapeila delo bí loopi napekai doodubong.”
40Delokrongem Jisu bí poto, “Nolu arope míngke sumílo, nolu Shédíke angun ralnamem kaapayé emla ngo nolum pomanía?”
41Dekepe iname bulu elídem longgébito. Delokrongem Jisu bí kaadu sudola pokai, “Yayie, ngo nom koyiddung, no ngokke agomem tatto. 42No agínpe agomem tatbidung emla ngo kénto, idola so dakna ami kídí sok ainam legape, bulu no ngom melíkne emla kéndope sim ngo podung.” 43Sim Jisu bí porongem, bí bottepe “Lajare lento langku!” emla gokto. 44Sina amide ale alagem, atuk mingmuem egelok yéllum namem deperung gelangala agolokke lentoku. Jisubí bulum poto, “Simang ege galugem laabín pala bím gímotoku.”
Jisume Petpe Emla Belename
(Mt 26:1-5; Mk 14:1-2; Lk 22:1-2)
45Delok legape Marime kangaana Judai amikídíe bojéko Jisuke inamem kaala, bím míngkesuto. 46Idakkom buluke ayokone Pharisi kídílo gíla Jisuke inamem pokan bito. 47Delokrongem ríne kídíelang Pharisi kídíe Baane kebangem gokdumsuto. “Ngolu ingkuemda idune? Si ami si deddína irisinyuem lengkandung. 48Ngolu bím sikepe metímílo, mipil miyonge bíkkíng arope míngkesuyé, delokke delo Rom ami kídíe aabomla ngoluke among emlang ngoluke opínem laanyokyé” emla bulu pobosukai.
49Delo buluke akon, delo dítag delo ríne ruutumpe ina Kaiapha emnamde pokai, “Nolu atí kénmang! 50Tabung opíne nyok pemílo ami akone sige namde aiyadung emnamdem nolu kénsumang.” 51Bí agí míísa sulok sim pomang, idakla ríne ruutum isappe delo dítag delo Jisu bí Judai opín legape sipe aido emla bí polu poorto, 52delokke delok opín petom delokke lega pemang idakkom rego regolo dunggoona Shédíke ome-oo kídí legape, bulum laadum sulangkula atel mokunam legape sigepe aido. 53Dekepe ila delok longe delokke ilangala bulu bím mokape emla ruubomkai.
54Delok legape Jisu bí Judai kídí kangkolo gíyimato. Bulum megeyéla bí mooruk among ayirlo, Ephraim emnam doolung kolo gínyok geto. Delo bí bíkkelo luyilsuna kídíem duubosuto.
55Judai kídíke Gíbong adeng ape pííyédem, amie bojéko doolung lokke Jirusalemlo Gíbong gíídílo pídéésupe emla Jirusalemlo gíto. 56Bulu Jisume matíbomto, delo kumkeng ekumlo dakdola bulu mipile pobosukai, “Nolu kape míídon? Bí Doman aranlo aama berok naya?” 57Idokom ríne kídíe lang Pharisi kídíe séko Jisuke dungkuem paayédí, Jisume bulu umdope bí pokan bikupe aido emla agomem luyinto.
Currently Selected:
JOAN 11: adiBSI
Highlight
Share
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
