JOAN 10
10
Mér Ruutumlo Luyiisuname
1“Ngo nolum aruem pobidung, mér dungko lamgélo aamape, idola angukon kéényung lok reesaala aana amide, doppyone delokke rulane. 2Lamgélok aana ami demin mér kídí lokke ruutume. 3Kaabom nade bím eyabem siyya bidung, delokke mér kídíde bíkke agomem taddung. Bí agí mérkídíem amínlok gokdung, delokke bulum gílen bodung. 4Edílo bí agíke mér takamem melendudí, delo bí buluke keralo gígedung delokke bíkke mér kídíe bíkkíng gímín gedung kapeila bulu bíkke agomem tatkéndung. 5Idakkom bulu kangkí manam ami agomdem tatkén mang, depeila bulu bíkkíng gímín mape bím dukge latdung.” 6Jisu bí bím luyiisunam agomlok pobituai, idakkom bulu bíkke ponamem tatkén tomang.
Jisumin Aina Mér Ruutume
7Delok legape Jisu bí lekoda poto, “Ngo nolum aruem pobidung, Ngomino mér sobén kídíke eyabe. 8Ngokke kerape aana takamde doppyona delokke rulana kídare, idakkom mérkídie buluke agomem tatmang. 9Ngomin lamgésue; séko ngokkelok aayédí bí turyé.#10:9: Demangkom bím “turdope meyé.” Bí aala goolen bola delokke dota pekuem paabodung. 10Doppyona kídíde pyoola, mola delokke petpe emlamin aadune; ngokke anggade bulu turnamem paadope delokke dem apíípe paadope emlamin aadune.
11“Ngomin aina mér ruutumde. Mér ruutumde agíke mér legape agí turnamem bisudung. 12Mér kaabom dope relíknam amide mér atomang. Dekepe ila, bí sipyang kaayédem, mér kídíem mepak geyéla duknyok gedungku. Delo sipyange mér bénbamdem míílo aabomla monpan sudung. 13Amide duknyok gedung kapeila bí hajirang amie iname mér kídíem ankímang. 14Ngomino aina mér ruutume; Ngo ngokke mér sobénem kénsudung delokke ngokke mér sobéne ngom kénsudung. 15Abue ngom kénsunam akampe ngo ngok Abuem kénsudung delokke ngo mér sobén legape agí turnamem bisudung. 16So mér opééso kamana abíd mér sobén ekom ngokke kadung. Ngo bulumte langaarupe aiyé. Bulukom ngokke agomem tatyé, delokke delo bénbam atelpe iyé delokke mér ruutum atelko iyé.
17“Ngok Yayike ngom ayanam legade, ngo turnamem paadokupe emla ngo agíke turnamem bisudung. 18Sim sékote ngokkelok laabín lamang, idola ngo agírunge agí míísalok sim bisudung. Ngo sim bisulado delokke sim laasu ladoku. Sim ngiitom sim ngo ngokke Yayi kelok paato.”
19Sok agom kídarsok Judai ami kídíde angu arang ikakukéng. 20Bulu bojéko pokai, “Bí uyu genako delokke tumnako. Kapeila bíkke agomem taddune?”
21Idakkom abíde poto, “Si agom kídar si uyu duubomnam tani agom mange kemino. Uyue mingmanem migdar nola dungkunía?”
Jisume Mepak Suname
22Delokrongem Jirusalemlo kumnam Aran longe píngkai. Dígíne iduem, 23delo Solomonke Baatum emnam kumkeng ekum goora delo Jisu bí gígoo dungai. 24Judai amikídíe bím gargoo dola poto, “Edítko no ngolum laltíla duutí moyéne? No Kristomílo ngolum berokpe pobitola.”
25Jisu bí pobito, “Ngo nolum pobito, idokom nolu arope míímang. Ngokke Abu amínlok irisinyo inamde ngok legangem posudung 26idakkom nolu arope míímang kapeila nolu ngokke mér sobén mangeke. 27Ngokke mér sobéne ngokke agomem tatbidung; ngo bulum kéndung, delokke bulu ngokkíng gímín gedung. 28Ngo bulum turyarnam yénamem bidung, delokke bulu edílokom nyokyi mayé; sékote bulum ngokke alaglok rotbín lamayé. 29Bulum ngokkíng bina, ngokke Yayi bí takam lokke#10:29: Kerangke agom ayokone “Ngokke Yayi bí ngom ingkuem bitudí de botte yalumne.” botteyane; sékote bulum ngokke Yayike alaglok rotlen lamang. 30Ngolang ngokke Yayi bí atele.”
31Lekoda Judai kídíe elíng gakla bím gepe emla ibomto, 32idokom Jisu bí bulum poto, “Ngo nolum Abukelo deddína irisinyuem lengkanto. Sok legapía nolu ngom elínglok gepetpe emla idune?”
33Judai kídíde poyansuto, “Ngolu sikesok legape nom elíng gepe imang. Idakkom no emmumna tanie, Shédí emsula Shédíme lungilnam legape idung.”
34Jisu bí bulum poyan suto, “Ayonlo nolum shédí kídíe#Miri 82:6 emla atmanía? 35Shédí bí séko bulukelo agomem políktodí bulum shédí kídíe emdung, delokke ngiitom agomdem edílokom mepak lamang. 36Abue agíke kísarupe ullen sunam delokke tani amoso melíknam amidem kape emyén? Demílo ngokke ‘Shédíke Ue ngo’ emsukolok ngom nolu kapeila Shédíme lupu luyééne emkane? 37Ngokke Abuke agérem ngo imamílo ngom arope míímapeka. 38Idakkom ngo dem idumílo nolu ngom arope mííma dokom, irisinyo inam kídarem arope míítoka, demílomin, Abude ngokkíng dung, delokke ngo Abulo dung emla nolu kényéne delokke kangkén suyéne.”
39Lekoda bulu bím umpe emla ito, idokom bí bulum gakko sumape runyok geto. 40Delokrongem Jisu bí Joanke kerape baptis iko Jordan rotkonlo gígetoku. So bí duuto, 41delokke amie bojéko bíkkíng aato. Bulu pokai, “Joan bí irisinyo iyodem ibi madokom, Joanke sok amisok legangem ponam takamde aropage.” 42Delokke delo amodelo bojéko Jisume arope míngkesuto.
Currently Selected:
JOAN 10: adiBSI
Highlight
Share
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
