LUK 15
15
Nyokna Mér sobéne
(Mt 18:12-14)
1Supak kajanang ulna kídí elang paabgena kídíe bíkke agomem tatpe emla dumsuto. 2Idola Pharisi kídí elang ukil kídíe kangkipe kaadola pokai, “Si ami si paab gena kídíem toríksula bulum dorík sudung.”
3Delo Jisu bí bulum sim luyiisunam agom sim poto: 4“Míngkítoka, noluke akone mér sobén língkoko bomdung idola akonem nyokmoto. Bí íying konang kolang konang mér sobéndem doolulo megeyéla pangkuma tetengem nyoknadem mata kumayénía? 5Delokrongem dem paayé kudem, bí ashérupe bíkke gordulo joolík sula ekumlo enyéku. 6Delo bí bíkke angong kídíem delokke kumrí donggong kídíem tomdumsula poyé, ‘Ngom írgape ashéng bosutola; ngo nyokna mérbénuem paatungku.’ 7Ngo nolum podung dekepe deenampe míísuna míílat sulíng kumana íying konang kolang konang amikídí dempemílo teyong amonge míílat sukuna paab gena ami atel legape ashéng bomyadung.
Nyokna Poisare
8“Demangkom nokdi íying bomna mimekone akonem menyok suto. Bí dem pangkumang tetengem, meru nyotla, ekumem pekbínla ankípe mata kumayénía? 9Delo bí dem paayédem, bíkke angong kídíem delokke kumrí lamgéem gokdum sula, ‘Ngom írgape ashéng bosu langka; ngo ngokke nyokna poisarem paatungku’, emyé. 10Dekepe ngo nolum pobidung, míílat sukuna paab gena amidem Shédíke teyong kotoki kídíe ashéng shébomdung.”
Nyokna Ue
11Jisu bí poyansula pokai, “Amiko oo annyi kanako katuai. 12Aníyade agí abuem pokai, ‘Yayie, ngokke ekurang tarongem ngom ortoka.’ Delo abude bíkke ekurangem annyidelo orpansuto. 13Ool doomang adape, aníyade bíkke ekurangem kogeyéla, mootengko amolo enla delo bíkke poisarem mínggípe yédola pitpakto. 14Bíkke pinngum surongem, delo amo tabudelo dírí kenue sengéépe ila bí pííram séémue ilento. 15Dekepe iname bí gíla delo duuna amikolo agíe hajirang yéresuto. Delo amide bím aríklo éék kídarem kaabomdope melíkto. 16Bí éék dotké bire sukolok donamem paasupe míítuai idokom sékote bím atíyang bimang. 17Bí dem kénsu yékudem posukai, ‘Edítko ngokke abulokke hajirang ami kídíe dolum yimadope paatuane, idola ngodan so kenuem pínka kosudakbong! 18Ngo gílangkula ngokke abuem poyé, Yayie, ngo nomlang Shédíme ibuuto. 19Ngo nokke ue emsu bayimang ngom nokke hajirang amikídí lokke akonpe itokui.’ 20Delo bí gerepla agí abudelo gítoku.
“Bí píngku pename mootengko dungadape, bíkke abude bím kaala, ayang míípa sutoku; bí agí oodelo dukríksula, bím gomrík sudola mumpupto. 21Oode bím poto, ‘Yayie, ngo nomlang Shédíme buulínge imoto. Ngo nokke oope tosu baimang.’#15:21: Kerangke ayokon agome, “Ngom nokke hajirang ami akonpe torík sutokui” emdo. 22Idakkom abude agí béérang kídíem poto, ‘Menape! Aiyalumna ege galugem bím píllíkto. Bíkke lakkéng delo lakkabko bíllíkto delokke aledelo leyukko yuklíkto! 23Ruo jiinako laala patoka. Ngolu írgape doman aranko ilape. 24Kapeila si ngokke oosi situai idokom turdungku; bí nyoktuai idokom paatungku!’ Delo bulu depe ibomkai.
25“Depe iduem, abíyana oode aríklo dungai. Bí ekum aníndelo pííyé kudem, miri paksong adudeke tatto. 26Dekepe ila béérang kídí ayokondem bí tomla kape idunai emla íngkíto, 27‘Nokke bírue píídungku’ emla bí pobito, ‘Delo nokke abue ruo jiinako patung kapeila bí uem turdope paatungku.’
28“Abíyana bírode marla aralo angku pemang emla ito. Delo abude gílenla bím ngiito. 29Idakkom bí agí abudem poyansuto, ‘Míngkítoka! Sim dítag kídí sim ngo nokke pakbope idung delokke nokke agomem ngo tatmape imang. Depe ilate no edílokom ngokke angong kídíem dobosudope emla bénbíl kokom bikímang. 30Idola nokke ekurangem abír ajon ikolo pinnyokna nokke oosi pííyé kuname, bíkke legape no ruo jiinako pabitung!’ 31Abude poto, ‘Ngokke ue, no agínpe ngokkíng duudung, delokke ngokke atí takamsi nokke. 32Idakkom ngolu írgape ashébosupe aido, kapeila nokke bíro si situai idokom turdungku; bí nyoktuai idakkom paatungku.’ ”
Currently Selected:
LUK 15: adiBSI
Highlight
Share
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
