LUK 16
16
Loorímana Ménéjare
1Jisu bí bíkkelo luyilsuna kídíem poto, “Mirem amiko katuai, delo bíkke sérangem kaabomna bíkke béérangko katuai. Mirem amidem, ménéjar amide nokke sérangem inyok bomdung emla pobinako kato. 2Dekepe iname mirem amide bím tomla íngkíto, ‘Ngokke nok legangem tatnamsi kapei? Nokke pitnam isabem ngom bitola, kapeila no menejarpe ilayimayé.’ 3Ménéjarde agíe míísukai, ‘Ngo supak kape imíloi aiyéne? Ngokke ruutum si ngokke agérem laabínyéku. Ngo arung koopete ralmang, delokke kogoo pete annyinge 4Ngo kape imíloi dem ngo kénkai, sok agér sok ngo lenyékuem, ami kídíe buluke ekumlo ngom torík suyépe.’
5“Depe iname bí mirem ami delokke ajéng gena mipil miyongem tomdumsuto. Bí kerang kedem tatkíto, ‘Edítko no ngokke ruutumke ajéngem gedun?’ 6‘Olib tél tin língko píínyiko’ embito. Ménéjarde bím poto, ‘Nokke narnana kakodem laala dem língko appiko emla attola.’ 7Delokrongem bí annyi nape nadem tatkíto; ‘Edítko nokke ajénge?’ ‘Éjar muunko gehue’ emla bí poyansuto. Ménéjarde bím poto, ‘Nokke narnana kakodem laala língko píínyikope itola.’
8“Ruutume míísi míírumna ménéjardem koyitto kapeila bí budiiko ito. Legape tani amosokke ami kídíde angunlo yéna ami kídíem pemílo agí legalo budii kayadung. 9Ngo nolum podung, tani amosokke ekurangem agí angong ngoonape inalangka, delomin, dem iyinrongem duuyarpeko ekumlo nolum torík suyéne. 10Séko bulum anyoona atolo míílík dudí bulum bojélote míídíílíkdung. Séko bulu anyongona atílo tete madudí bí bottena atílokom tetemang. 11Dekepe iname nolu tani among eku sérang yébomkolo nolum míídeng líkmamílo, aro mirem pekolo séko nolum mííde líkyéne? 12Delokke nolum akon sérang teyolo mííde líkmamílo, noluk ekurangem séko nolum biyéne?
13“Ingkona béérangete ruutum annyiem agér ibolamang. Akonem bí akyé delokke akonem bí ayayé, demangkom akonlo mínggapyé delokke akonem mepakyé. No Shédí melang murkongem atelkope kumlamang.”
Jisuke Ngiitom Ayokone
(Mt 11:12-13; 5:31-32; Mk 10:11-12)
14Murkong míítana Pharisi kídíe, sim takam sim tatto delokke lungil lusola Jisume luto. 15Bí bulum poto, “Nolumin amikidí keralo agísuem aro aro mansuna kídíe, idakkom Shédí bí noluke aang kídíem kéndung. Tani kídí keralo bottepe míínam kídíde Shédíke keralo mepakname.
16“Joanke píímang adape, Ayon Kitab elang kaaluna miri kídíe pobito. Delokke ilangala, Shédíke yéta legang tatpona ngiitomem poyardung, delokke mipile delo ngiitom delo aayindung. 17Ayon Kitab agome kolomlok siyaying doodí kísa nakokom nyokpemílo among elang talenge nyoknamde nyokpo yaname.
18“Séko agí méngem mepak sutola delokke angukon mimeko laayé kudi bí abír ine; delokke amike mepakkunam mime konem méngpe bomkuna dekom abír ine.
Mirem Kolang Lajarbí
19“Ege galuk arekanarung delokke kampona gela kanam remnampe loodíke yéna mirem amiko kato. 20Bíkke etor eyab delo Lajar emnam tarí mílí gela magoona amiko keddungai, 21delokke bí mirem ami delokke pimpilem doyape mííto. Ekii kídíete aala bíkke tarí kídar dem yakla ito.
22“Magoona amide sikai delo teyong kotoki kídíe bím Abrahamke ampelo joolíkto. Mirem amidete sila bím yuto. 23Doorum líísam amolo bím itung sirééla ibom dungem, bí mootengoope kaadung sutoname, Abraham bí Lajarme duubosula duudope kaato.” 24Dekepe iname bí Abrahamme poto, “Yayi Abraham, ngom ayatoyika delokke Lajarme bíkke lakkéngem asilo ningnyom pala ngokke ayuem reyiidope doodíem dílík motoka, kapeila ngo so mepomso mola ruimang.”
25Idakkom Abraham bí poyansukai, “Ue míngíí suto langku nokke turla yédungem no aina atí kídíem paato, idola Lajar bí aimana atí kídarem paato, idokom bí supak so dupoope duudungku delokke nodan adír kolo dung. 26Delokke sok takam kékonlo, nokkelang ngoluke pénsamlo eeríruna kobungko duusékdung. Si sokke nokkíng gípena kídíem, demangkom ngolukelo aapena kídíem duusékdung.” 27Mirem amide poyansuto, “Demílo, Yayie, ngo nom rogudung, Lajarme ngokke abu ekumlo melíktoika, 28kapeila ngokke bíro pilngoko kadung. Bulute so adírko amoso aamadope lusii motoka.”
29Abraham bí poyansuto, “Bulukepe Mosilang delokke kaaluna miri kídíe kadung: bíro kídídem buluke agomem tatgap motoka.” 30“Demang, Yayi Abraham”, emla bí pokai, “Sina kídí lokke akone bulukíng gíku mílomin bulu míílat suyékune.” 31Abraham bí bím pokai, “Bulu Mosi kelang kaaluna miri kídíke agomem tatmamílo, akone sikolokke gerep dokukom bulum luyil lamayé.”
Currently Selected:
LUK 16: adiBSI
Highlight
Share
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
