LUK 17
17
Paabe
(Mt 18:6-7; 21:22; Mk 9:42)
1Jisu bí bíkkelo luyilsuna kídídem pokai, “Tani kídíem paab imona atí kídare píídak rubong, idakkom séko bulukelok de lenyédí bulu ankí kenopene. 2Sok aména akonem paab ilík pemílo, de amide anyat lííbyang em alíílo paklík sudola siyéng asilo yoplík sunamde bíkkepe aiyado. 3Dekepe ila agíem ansu kída langka.
“Noluke bírue paab iyémílo, bím noolangka. 4Bí nolum longelo lemkínítko paab iyémílo delokke lemkínítko nolukíng aalat sulang kula, ‘Ngo bursudungku’ emyémílo, bím maab bilangka.”
Míngkesuname
5Tomlíknam kídíe ruutumme poto, “Ngoluke míngkengem edíímotoika.”
6Jisu bí poyansukai, “Noluke míngkenge petu amí kísa ansoo dokom ‘eyum yumnem puula siyénglo duutola’ emmílo delo de nolum depe ibiyé.”
Béérangke Agére
7“Míngkítoka, noluke akone aal gína demangkom mér kaabomnape yédung. Bíkke aríklok pííyékuem bí agí béérangem, ‘Supak aala dotola’ emyélanga? 8Dempenem bí, ‘Ngokke dotkéyem iruutoi, ngokke dodung tíídungem no agíe duuya poolangka, delokke méélamlo no dodo tíídope’ emmayénía? 9Bíkke ponampe béérang delokke ibinamem mííyum sumayénía? 10Dekepe nolukom, nolum idope políknamem iyinrongem nolu emyé, ‘Ngolu are kamana béérang kídíe, ngoluke agér ipenam petomem ngolu ito.’ ”
Midum Íyingko Jisuke Ipíkuname
11Supak Jisu Jirusalempe endakkuem, Samari kelang Galil rísulok gíto. 12Bí doolung kolo pííname, tíídgena midum iyingko kaaríksuto. Bulu donggen dola 13bottepe goktoola Jisume poto, “Ruutum Jisue, ngolum ayatoyika!”
14Bí bulum kaayédem pokai, “Gílangkula nolu agíe miri kídílo lengkan sutolangku.” Delo bulu gíkuname dengkaku. 15Buluke akonde agíem ipí kunamem ansuyédem, Shédíme bottepe yidge dolangkula aalat sutoku. 16Bí Jisuke alelo lebíng konídola bím koyitto delokke bí Samari amikuai. 17Jisu bí ingkíto, “Midum íying takamde dengku manía? Midum konade ingkoloda? 18Sok mipak ami sok kékonlo sékote Shédíme yidge kupe angkumanía?” 19Delokrongem Jisu bí bím poto, “Gerepla gíkalangku; nokke míngkenge nom aimotoku.”
Angkupena Amonge
(Mt 24:23-28,37-41)
20Leko Pharisi kídíe Shédíke amonge aadíku longe edílodí pííyékune emla íngkí namem Jisu bí poyansuto, “Shédíke amode kaabe sudope aamayé, 21demangkom amie, ‘Sona duune’ emdo pekom imayé, delokke ‘Eena duune’ emdopekom imayé, kapeila Shédíke amode ‘Nolukíng duusudung.’ ”#17:21: Demangkom aralo.
22Delokrongem Jisu bí bíkkelo luyilsuna kídíem poto, “Tanike oolokke yédo longem kaalí dungai idakkom kaapang kumadí longeko píídak. 23Amikídíe nolum, ‘Eena bí duune!’ demangkom ‘Sona bí duune!’ emyé. Buluke méélamlo dukmín gemapeka. 24Legade yaarie taleng telo rego konlokke layyém rego konlo píísémnam kísape, Tanike Ue bíkke longe#17:24: Ayokon agome “bíkke longelo” emnamsi kamang. lokom depe iyé. 25Idakkom bí deddína arééyém rénggela delokke siyum siroke amiem géngko suporuyé. 26Noahke yédudelo inam kísape, Tanike Oolokke longe lokom depe iyé. 27Tani kídíe dola, tííla, mime laala, omum nyameng ibosula Noahke etkulo rengado deloope ito. Delokrongem puumue aato delokke bulum takam puyinto. 28Lotke longe delokom sikepe ito. Tani kídíe dola tííla, paala remla, díírep morepla ito. 29Idokom Lotke Sodomem gínyo rongkuem, líídor eme taleng telok pedope obomla bulum petyinto. 30Tanike Ue lendí pakkuem, dekepe iyé.
31“Delo longedelo ekum míílonglo duune ekum aralokke ekurangem oi langkula langkupe imapeka. Dekepe aríklo yénekom atíem langkupe emla imapeka. 32Lotke méngem míípasulangka! 33Sékodí agí turnamem mesiisupe míídudí bí dem menyok suyé, delokke séko agí turnamem menyok suyédí bí dem bomgapyé. 34Ngo nolum podung, delo yoh delo midum annyiko bisonang atello ketbosuyé, akonem laayé akonem meyé. 35Mime annyiko delot íbosuyé akonem laayé akonem meyé.”#17:35: Ayokon agome 36 “ami annyiko aríklo yéyé, akonem laayé delokke akonem meyé” emdo.
37“Ruutume, ingkolodí?” emla bulu íngkíto.
Bí poyansuto, “Ingkolo simang kadudí delo pemí píage bííbomyé.”
Currently Selected:
LUK 17: adiBSI
Highlight
Share
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
