LUK 22
22
Jisume Míírí Míínyoname
(Mt 26:1-5; Mk 14:1-2; Jn 11:45-53)
1Supak siiyé líkmanam ettíng dodíe gíbong gíídíe píído, 2delokke rínekídí elang ukil kídíe Jisume umdomílo emla míídung idola, bulu amikídíem pesoto.
Judaske Jisume Mirulo Yadlíkpe Emla Tolíksuname
(Mt 26:14-16; Mk 14:10-11)
3Delo Soitane midum íying kolang annyi lokke akon Judas Iskariot kíng angkai. 4Delokrongem Judas bí ríne ruutum kídílo gíla kape kísa Jisume bulukíng yadlík ladodí dem luposuto. 5Bulu airupe mííla bím murkong bidope tolíkbosuto. 6Judas bí dem tolíksula, delokke ami kamangem Jisume bulukíng melíkpe emla pongkok matíto.
Gíbong Domanem Dodope Jisuke Iruuname
(Mt 26:17-25; Mk 14:12-21; Jn 13:21-30)
7Delo siiyé líkmanam roti dodíe mér bénuem palíkpeko gíídíe píídak. 8Jisu bí Pitor melang Joanme melíkdola pokai, “Gíkala ngoluke Gíbong gíídí dopekuem iruu tolangka.”
9“No ingkolo ngolum iruu saaru dope míídon?” emla bulu íngkíto.
10Jisu bí poto, “Nolu taonkolo enayém amiko asi kiiling bomnako nolum ríksuyé. Bíkkíng ekumlo gímín gela, 11delokke ekum atodem potoka, ‘Poyilna bí íngkído; ingkolodí mibo doopeko ruume, ingkoloi ngo ngokkelo luyilsuna kídíem lekope Gíbong gíídí domanem dobo supekue?’ 12Bí nolum teyong danlo ruum bottenako atí takame kayin sunako lengkanyé. Delo irung sarung tolangka.”
13Bulu gíla atí kídíem Jisuke bulum ponam kísa pakpe ito. Dekepe iname bulu Gíbong gíídíem leemoto.
Probubuj
(Mt 26:26-30; Mk 14:22-26; 1 Kor 11:23-25)
14Moodíe piiyédem, Jisulang bíkke tomlíknam kídíe dopéé atelkope dobosuto, 15Delo bí bulum poto, “Ngokke adír gemang adape nolum sim Gíbong gíídí doman sim dobo sudope míídung. 16Kapeila ngo nolum podung, Shédíke amongem apíídope kaasumang tetengem, ngo lekoda sim dopang kumayé.”
17Batidem laala, yidge pala, “sim laalangka delokke noluke aralo orsulangka. 18Kapeila ngo nolum podung Shédíke amonge píímang tetengem sim onggur alang sim tíípang kumayé.”
19Delokrongem bí rotiem laala yidge pala pento, delokke dem bulum bidola pokai, “Simin noluke legape binam ngokke amíle; sim ngom míípang sunape igelangka.” 20Dekepe, dotkéyem dogeyéla bí batidem laadola pokai, “Si bati si nolukíng pílíknam ngokke iyyiloke aní daaponge.
21“Idakkom ngom míírí míínyona ami alagde ngokke dopéélo duubo sudung. 22Tanike Ue atla menam kísape iyé, idakkom bím míírí míínyona amide ankí kenoyé.” 23Buluke aralo agí agísue dekepe ipenade sékodí emla pobosuto.
Bottenam Legangem Pobosuname
24Buluke gooralo sékoi botte yalumnade emnam agom legalo akmín sukai. 25Jisu bí bulum poto, “Mipak kídílokke roja kídíe bulum yébodung; delokke buluke teyolo ruutumbona kídí emin paanedone. 26Idakkom noludan dekepe ipemane. Dem megeyéla noluke gooralo botte yalumnade amé yalumnape ipe aido, yébonade yébonam kísape ipe aido, 27kapeila sékoi botte yalumnade tébullo duunadía ma, igulna bééradía? Idola ngodan noluke gooralo agér géryana béérang kísanako. 28Nolu ngom darkaado delo dakmín gena kídíe. 29Delokke ngom ngokke Abue binam kísape, ngo nolum amongko bidung, 30delo nolu ngokke amolo ngokke dokolo dola tííla palenglo duula, midum íying kolang annyi Israel opínem bisaryé.
Pitorke Possu Penamem Jisuke Pokan Biname
(Mt 26:31-35; Mk 14:27-31; Jn 13:36-38)
31“Simon, Simon, Soitane nolum ainem atímalok langusupe emla, arík ina amie agíem amyalok langu sunam kísape nolum takam ikaa darkaape emla tolík namem paatung. 32Idakla Simon, ngomin nok míngkenge pííram madope nokke legape kumtone. Delokke edílo no míílat suyékudí, nokke bíro kídíem edíí molangka.” 33Idola bí poyansuto, “Ruutume ngo umko sudokom delokke petdokom nokkíng gímín gepe míídung.”
34Jisu bí poyansukai, “Pitore, ngo nom aruem pobidung, siiyoh peroge kokmang adape, no ngom lengumko kéndola kénmang emla possuyé.”
Murkong, Nyogon Delokke Yokse
35Delo Jisu bí bulum íngkíto, “Ngokke nolum paipoisar, nyogon, demangkom leyuk bitak sumape melík dagem nolu pííram neke katonía?”
“Atí pííram kamang” emla bulu poyansuto.
36Bí bulum pokai, “Idakkom supak noluke murkonge kadumílo dem bomtola, delokke noluke yoksa kamílote agí egem kogeyéla ako retola. 37Sim sikepe atbitung: ‘Bíme imemna kídílo#Isa 53:12 santak suto; delokke ngo nolum podung de ngokkíng berokpe arolíkyé; E, ngokke legangem atbomnam atíe arope ipí dakbong.’ ”
38Luyilsuna kídíde pokai, “Ruutum, sina yoksa annyiko.” “De alummang”, emla bí poyansuto.
Olib Díítelo Jisuke Kumname
(Mt 26:36-46; Mk 14:32-42)
39Jisu bí iyang iyape Olib Díítelo gílento, delo bíkkelo luyilsuna kídíete mamín geto. 40Amodelo pííla bí bulum poto, “Nolu darkaalo omadope kumlangka.”
41Bí dabu kékonlo gubdola lebíng koníla kumto, 42“Yayie, no míísa dumílo sim bati sim ngokke lokke laabín toika; depe idokom ngokke míínammang, nokke míínampe idak langka.” 43Teyong kotokiko teyotelok aala bím ralnamem bito. 44Delo duuk adíre idola, bí aabanpe kumto kukéng, delo bíkke ílnam doodíe amolo oletne iyyi doodí kísa ibomsukai.#22:44: Ayokon kerangke agome 43 delokke 44 si kamang.
45Bí kumko lokke gerep langkula luyilsuna kídílo aala kaaname, bulum ipla, bengale idope kaapato. 46“Nolu kapeila ipdune?” emla bí bulum luto. “Gereplangkula nolu ikaa darkaalo olík madope kumto langku” emto.
Jisume Umname
(Mt 26:47-56; Mk 14:43-50; Jn 18:3-11)
47Bí agomem podung adape, miti milinge pííla, delokke Judas emnam, Midum íying kolang annyi lokke akonde bulum gíbodo. Bí Jisume mumpuppe emla aanínto, 48idokom Jisu bí bím tatkíto, “Judas, no Tanike Uem mumpup dolangía mirulo yadlíkdune?”
49Jisukíng gímín gena kídíe depe inamem kaala, pokai, “Ruutume, ngolu ngoluke yoksalok patopeya?” 50Delo buluke akone ríne ruutum béérang konem nyorungem papakto.
51Idakkom Jisu bí pobikai, “Sikepe iyimapeka!” Delo bí ami delokke nyorungem ukkídola bím ipítoku.
52Delokrongem Jisu bí rínekídí emlang kumkeng ekum kaabomna migom kídí emlang delokke miro aana kídíem poto, “Ngo ebín bona ruutum kolanga, nolu gíníng yoksa bomla aabomdune? 53Lolope ngo nolukíng kumkeng ekumlo yébosuto, delo nolu ngom ummang. Idakkom edílo kaamue idudí delomin noluke umdíe.”
Pitorke Jisume Possuname
(Mt 26:57-58,69-75; Mk 14:53-54,66-72; Jn 18:12-18,25-27)
54Delokrongem bím umla, bulu gíbola ríne ruutum ekumdelo aabosutoku. Pitor bí méélamope gímín geto. 55Idola bulu guradelo eme parla duudum suduem, Pitorte bulukíng duumín geto. 56Mime béérangko bím eme angun delo duudope kaato. Bí Pitorme kangí seríla kangge yéla pokai, “Si amisi Jisukíng yémín gene.”
57Idakkom bí dem togemang, “Mime, ngo bím kénmang” emto.
58Anyongko doorongem amikonko bím kaala pokai, “Nokom buluke akonpe idung.”
“Ngomang” emla Pitor bí poyansuto.
59Gontako doorongem amikonko bím sutgap bomkai, “Berokrupe si ami sikom bíkkíng yétuai, kapeila bí Galil lokkeko.”
60Pitor bí poyansuto, “No amino kape mandunai, no ingkuem podudí ngo tatkénmang!” Bíkke pongo dungadape peroge kokkai. 61Ruutum bí ngéélat sulangkula Pitorme jonnampe kaasuto. Delopak Ruutumke bím potonam agomem míípang sutoku: “Peroge kokmang adape siiyoh, no ngom lengum kokai possuyé.” 62Delokrongem bí luyulo gílenlangkula agí kapgísutoku.
Jisume Ipusilééname
(Mt 26:67-68; Mk 14:65)
63Jisume kaabomna amikídíe dííla mola iyéé silééla bím ibomkai. 64Bulu amigem yéngkap geyéla “Sékoi nom kíttone” pokíto emla luto. 65Delokrongem kom bulu deddí kokai luyéé luléénam agom kídíemte luto.
Jisume Kebalo Bomaname
(Mt 26:59-66; Mk 14:55-64; Jn 18:19-24)
66Píange iyédem kebang ami kídíe, rínekídí elang delokke ukil kídíe dumsula, delo Jisume buluke keralo langaato. 67“No Kristomílo, ngolum potola,” emla bulu mankai.
Jisu bí poyansukai, “Ngo nolum podokom, nolu ngom arope míímayé, 68delokke ngo nolum agomko íngkídokom nolu ngom pobimayé. 69Idakkom supak kelokke ila Tanike Ue tolna Shédíke lakbíklo duuyéku.”
70Bulu takam íngkíto, “No demílo Shédíke ua?”
Bí poyansukai, “Nolu ngom depe emnamde aropage.”
71Delokrongem bulu pokai, “Ingkona hakii yangko ngolu míídun? Ngolu bíkke nappalok tatyinsuto.”
Currently Selected:
LUK 22: adiBSI
Highlight
Share
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
