LUK 23
23
Jisume Pilatke Keralo Bomaname
(Mt 27:1-2,11-14; Mk 15:1-5; Jn 18:28-38)
1Delokrongem kebang tabude gerepla bím Pilatkíng gíboto. 2Delo bulu bím sikepe ajéng luketla luto, “Ngolu sim ami sim ngoluke opínem bulmokanpe antung. Bí Kaisarme kajanang binamem akdung delokke agíem Kristo roja emsudung.”
3Dekepe iname Pilat bí Jisume, “Nua Judai kídí lokke roje?” emla íngkíto.
“E, nokke ponam pakde” emla Jisu bí poyansuto.
4Delokrongem Pilat bí rínekídí lolang delokke mibam delo pokan bito, “Ngo sim ami sim ajéng luketnam leríng mapaamang.”
5Idakkom bulu pokam keramkai, “Bíkke luyillok Judia among takame belengkai. Bí Galillokke ilangala enko tabung sope engen modung.”
Jisume Herodkíng Melíkname
6Sim tatla, amide Galil amikodí emla Pilat bí íngkíto. 7Edílo bí Jisu bí Herodke among goora lokke emla kéntodí, delo bí Jisume depe iduem Jirusalemlo duuna Herod kíng melíktoku. 8Herod bí Jisume kaayédelo, bojérupe ashénge ito kapeila kerango pekai bí Jisume kangkírupe emla míítíto. Jisuke legangem bíkke tatnampe, bí irisinyo ayoko ibidomílo emla mííbomto. 9Bí deddí kokai agomem ínge íngkurla Jisume ííto, idokom Jisu bí bím atí poyansumang. 10Ríne kídí elang ukilkídíe delo dakla agírupe ajéng luket líkdung. 11Delokrongem Herodlang bíkke sipaying kídíe bím lupu luyééla ngilka songkaala ito. Galuk bodonako píllík pala bulu bím Pilatkíng melat líktoku. 12Delo longedelo Pilatlang Herod bínyi angong kumsupe ikai. Sokke kerape annyi si mirupe mííbo sudungai.
Jisume Petdope Luyinname
(Mt 27:15-26; Mk 15:6-15; Jn 18:39—19:16)
13Pilat bí rínekídí emlang ruutum kídí emlang ami kídíem tomdum supala 14bulum poto, “Nolu sim ami sim ami kídíem ebín bonakope mííla bomatung. Ngo noluke keralo íngka bengkaname, noluke bím ajéng luket peko leríng ngo mapaamang. 15Nolu agíe kaasudung, Herod teng bím lukapeko bedang kaapa mala, ngolukíng bím melat sutungku. 16Delok legape ngo bím ingéé geyéla delokrongem bím melenyéku.”#23:16: Ayokon agome bím. 17 Delo adeng ape longedelo Pilat bí buluke legape pateklo duuna akonem melen bikupe ayonko kato.
18Podu attellok bulu, “Sim ami sim nyokmotoka! Barabbame ngolum melen bikui!” emla ugonla poto. 19(Barabba me taonlo ebín ibola ami petgalok pateklo metungai.)
20Jisume melenkupe míídola Pilat bí bulum rogu tokuai. 21Idakkom bulu, “Bím pansaatoka, bím pansaatoka!” emla goktíbomto.
22Lengumnape bí bulum poto, “Kapeila? Ingkona imemko si ami si itune? Ngo bím pansaa nana leríng mapa rumang. Delok legape ngo bím mongéé geyéla melen yéku.”
23Idakkom bulu bím pansaape aido emla botteyape manduk yayang ibomkai, iname buluke tayyémpe mankolok ikai. 24Delo Pilat bí buluke konamem ibipe emla míílen sukai. 25Bí amikídí lokke kolen kunam ebín ibola, ami petkolok patek líknam amidem melen bitoku delokke Jisume buluke mínggípe iyépe emla melíkto.
Jisume Pansaaname
(Mt 27:32-44; Mk 15:21-32; Jn 19:17-27)
26Bulu bím gínyok bodagem Kureni lokke Simon emnam amiko gakla krossdem bíkke gordulo pyalíkla Jisuke méélamdelo joola gímoto.
27Deddína miti milinge bím ankína mime kídíe bíkkíng gímín geto. 28Jisu bí ngengkut sudo langkula bulum poto, “Jirusalem lokke ome kídara, ngokke legape kapmapeka; nolu kepelang noluke ome-oo yétíng legape kaplangka. 29Kapeila ‘Koo omana negen kídíe delokke anyun sunkí mana mime kídíde gérne!’ emla noluke podí longeko pííyé. 30Delokrongem, bulu dííte moopangem poyé, ‘Ngolum benjéttoi!’ Delokke edíng eragem poyé, ‘Ngolum bénlumtoi!’#Hos 10:8 31Esing ane yayii dungadape tanie depe imílo sokke ereng yékuem kape iyén?”
32Ayonlok imemna midum annyikote, pansaape emla bíkkíng bomtaksuto. 33Bulu tuklong among emkodelo pííla bím delo bottepe imemna ami annyi demteng akonem bíkke lakbík danlo delokke akonem bíkke lakké danlo lekope bím pansaato. 34Jisu bí pokai, “Yayie, bulum maab langka, kapeila bulu ingkuem idudí dem kénsumang.”
Delo bulu luturi sola bíkke ege kídíem orpansuto. 35Ami kídíe kaala dakkai, delokke ruutum kídíe bím ngilkaato. Bulu pokai, “Bí abídem mopítdo; bí ullennam Shédíke Kristomílo, agíem mopít sumotoku.”
36Sipaying kídíete aala bím luman lusanto. Bulu bím onggur alangem bidola 37pokai, “No Judaikídíke Rojemílo, agíe mopít sukíto.”
38Delo bíkke teyodelo sikepe atbila medak;
SI JUDAI KÍDÍ LOKKE ROJE.
39Imemkolok pansaanam ami akon dete bím lupu luyééla luto, “No Kristo manía? Agíemlang ngolum mopít tokupena?”
40Idola akonde bím ludola poto, “No agíete akamope pansangkolo daklate Shédíme peso manía? 41Ngolum aro ayonlok ingéétung, kapeila ngoluke agér adulok ngolu sim paadung. Idola si ami si atí imem kama nakuai.” 42Delo bí Jisume poto, “Jisua nokke rojape aayékuem ngomkom míípang sulangka.”
43Jisu bí bím poyansuto, “Ngo nom aruem podung, silo no ngokke yékolo yémín geyé.”
Jisuke Siname
(Mt 27:45-56; Mk 15:33-41; Jn 19:28-30)
44Depe iduem konang bajilokke ila adeng angum bajilope among tabude kaamue ito, 45kapeila doonyie angun biyimato. Delokrongem kumkeng ekum delokke lamgé donkom nana ege annyikope bétpan sukai. 46Jisu bí agíípe ulo gokla pokai, “Yayie, nokke alaglo ngokke aidem melík sudungku.” Bí depe emdola bínkai.
47Sipaying ruutumkone dekedem kanggeyéla Shédíme yidgeto delokke poto, “Berok si ami si deena amikuai.”
48Pansaa namem kaape emla aana ami takame kape ikadí dem kényin kaayinto, bulu agí angkengem kíssu langaala gíkaku. 49Idakkom bím kénna kídíe Galil lokkekai mamín gena mime kídíete ampelo sim atí takam sim kaala dakto.
Jisume Yuname
(Mt 27:57-61; Mk 15:42-47; Jn 19:38-42)
50Depe iduem kebang ruutum membor, milo arona, edíína, Joseph emnamko, 51buluke luyin iyin namem tolík mínmana amiko katuai. Bí Judialo duuna Arimathia taonlo duula Shédíke yétem toya nakuai. 52Pilatkíng gíla bí Jisuke simadem koto. 53Delokrongem bí dem laayila egelok yéllum pala lííreng líípíklo sékomete yukímangko agolo yuto. 54De iruu sarudí longe, delokke Sabbath longe anínpage.
55Galil lokke Jisukíng mamín gena mime kídíe Josephkíng gímín gela agodelo bíkke simadem kape kísa yutodí dem kaato. 56Delokrongem bulu ekumpe entoku delokke késiképa delokke nampona atíeke iruuto.
Idola bulu Sabbath longedelo ngiitom agompe nyola duuto.
Currently Selected:
LUK 23: adiBSI
Highlight
Share
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
