TIRLON 3
3
Ke kiak Khat Damna
1Pitar le Johon ning lam na ranga nitak pha dan thum han biakinn na an lui che. 2Han a nu vonsung tenna ke kiak pasal ankhat an hong choia, biakrup lut ranga a hong mingai jiang kutjado a lam ranga biakrup sat tak kotkolla anitin an lui tet. 3A man Pitar le Johon ha biakrup sunga an lut tiang amua a kut adoa a hong lam. 4Han Pitar le Johon le kan ruaia ama ha an en chiak anti, keini jiang na enro. 5Hale anmani tenna imo khat mu rang kani tia a ngaidon na a man anmani jiang lung lut a en, 6Tak-ha Pitar ning a ti, kei ruphai le sana nei making, aninnum kein ka nei ha nang jiang ka na pek; Nazaret Jisu Khrista minga lonro. 7Han Pitar ning a chang tiang a kut a o va akei thui jui, hava lai tak han ama akele aketharui a ngar jui. 8Hava han a man a kan chomma a chaijel jui Pathian amanpak anmani le kan ruaia biakinn sunga a lut jui. 9A man a lon ti tirra Pathian amanpak ha mitammin an mu. 10Biakinn sat tak kot a om kutjadopa ani tihi anmanin an hong jet ama jiang isuak chuan ha an ngak ban,
Biakinn Sunga Pitar Chongri
11A man Pitar le Johon ha a o va a om lai han, mitammin an ngak Solomon atual anti han anmanin an hong tan jui. 12Hale Pitar ning a mu pha, mingai jiang a hong ti, “E, Israel mingai hiva mipa chunga itamo hi ang khan nan ngak? A ma kein in kan man lon titir hi keini ranak anin nom, Pathian takngai jarra anin nom, nan lui tho tia mo nan na en chiak?” 13Abraham, Isak, Jakop Pathian kan pa kan pungai Pathian ha ning, asuak Jisu ha mahok na lian tak a pek jui, nang nin ama ha a chong che ngai kut chunga nan pek Pilat ning masua rang ati ha nang nin jot mak che u. 14Tak-ha nang nin a thiang, mi dik lam ha nan enda va, asat mak tho mikhatpa lam ha masua ranga Pilat jiang nan lam ma nan om. 15Hale nang nin ringna neipu lam nan that jui ama ha Pathian ning a thi ngai kar tenna a man ringkhir jui, hiva arui ajarra keini shakhi kan om. 16Han ama minga takngai aneijarra nang nin nan mu an khat om nan jet pasal ha ama a ming jarra i man ratke, ama jak ha takngai na a nei jarra nang ni rakip madonna a man a tak adamver ani.
17“Atun e, U le naingai, nang ni nan neipungai ning an thi ang han nang ni ning om jet luia hava nanthoke tihi kein ka jet. 18Tak-ha Pathian ning ama Khrista a pong khodengthei a dui na ha tashantheingai baisua a rapa ilui manjet ha a man a man tung jui. 19Hiva jarra nang nin nan siatna ngaiha abuiphir na rang kansir unnang Puma jiang hong kan heiru. 20Ha aninko nang ni ranga athang suaksa Khrista tiko Jisu ha a man hong tir nati. 21Irakip veikhat ansinkhir maje, ama ha vanram ma man om nati, hiva jarra Pathian ning a tuan lai tenna ama tashanthei athiangngai baisua amanrijui. 22Mousi ning a ti, “Puma Pathian ning nang ni ulenaingai karra nang ni ranga kei, ang chat ama tashantheingaihi khat hongman suak nati, a man nang ni jiang a ri rakip chong ha ngairu.’ 23Hi ang hin ninati, Pathian tashanthei chong ha a ngai lui mirakip ha manmang nati. 24Samuel tenna a don don na an hong suak Pathian tashanthei rakip in an lui ri rakip ha anmanin hiva pha ranga an lui ri jui. 25Nang niko Pathian tashantheingai le Pathian ning nan pa napungai le chongtan na iluinei pasalnaingai nan ni, Pathian ning Abraham jiang an chong tanna han a ti, nang na vonchoi sunga ramuolla a om inn sung rakip jiang phual mu nanti u. 26Pathian ning a rapa tak nang ni jiang ama asuak ha a hong man suak jui, nang ni nan ma sialna nan siatna jarra mirakipngai ha an lung an hongthul rang han nang ni ravansat na ranga ama ha a hong tir jui.”
Currently Selected:
TIRLON 3: AIMOLBSI
Highlight
Share
Copy
Want to have your highlights saved across all your devices? Sign up or sign in
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.
